Саха театрын 120 сыллаах үбүлүөйдээх Ыһыаҕа

От ыйын 14 күнүгэр Былатыан Ойуунускай аатынан Саха академическай театрын 120 сыллаах үбүлүөйэ үрдүк таһымнаах ыһыаҕынан бэлиэтэннэ. Күн-дьыл туран, дьоро күммүт эссэ киэркэйэн биэрдэ, мустубут ыалдьыттары, дьону-сэргэни үөртэ.

Бөдөҥ ыһыахха Саха Өрөспүүбүлүкэтин салалтатын үрдүк сололоох бэрэстэбиитэллэрэ, театр олохтонуутугар уонна сайдыытыгар сүҥкэн кылааты киллэрбит ытык дьоммут, култуура эйгэтин биллиилээх диэйэтэллэрэ кэлэн, ыһыах ытык-мааны ыалдьыттара буоллулар.

Үөрүүлээх аһыллыы театр бары үлэһиттэрин, артыыстарын, режиссердарын, техническэй үлэһиттэрин сэлэлии хаамыытынан, ыһыах ытык бэлиэтин көтөҕүү, алгыс сиэринэн-туомунан саҕаланна.

Саха Өрөспүүбүлүкэтин Култууратын уонна духуобунай сайдыытын миниистирэ Афанасий Ноев, Ил Түмэн Бэрэссэдээтэлин бастакы солбуйааччыта Александр Жирков, СӨ бырабыыталыстыбатын бэрэстэбиитэллэрэ тыл этэн, театрбыт үлэһиттэригэр бочуоттаах махтал суруктары туттардылар. Маны тэҥэ, 120-с үбүлүөйдээх айар дьыл түмүгүнэн саамай элбэх оруолу оонньообут талааннаах артыыстар Айталина Цыпандина-Винокурова уонна Айталина Лавернова наҕараадаланнылар.

Сахалартан бастакы идэтийбит режиссер, Саха АССР уонна РСФСР норуодунай артыыһа, Саха АССР искусствотын үтүөлээх деятелэ, Ленин, Үлэ Кыһыл Знамята уордьаннар кавалердара Спиридон Алексеевич Григорьев аатынан Григорьевтар дьиэ кэргэттэрэ бочуоттаах бириэмийэни режиссер Сергей Потаповка туттардылар.

Бырааһынньык күн түмүктэнэригэр өр күүтүллүбүт спортивнай оонньуулар ыытыллыннылар.

Баҕалаахтар кыттаннар, бэйэлэрин сымсаларын уонна күүстэрин холоон, түмсүүлээх санааларын көрдөрдүлэр.

Спортивнай оонньуулар түмүктэрэ:

Эр дьоҥҥо кыайыылаахтар

— Үс төгүл үс – Эдуард Захаров

— Хапсаҕай – Александр Захаров

— Үтүрүйсүү – Алдан Готовцев

 — Сүүрүү – Эдуард Захаров

Кэрэ аҥардарга кыайыылаахтар

 — Ойбонтон уу ылааһын – Мария Дегтярева

 —  Быаны эрий – Алена Саввинова

 — Сүүрүү – Айталина Цыпандина-Винокурова

Саха театрын 120 сыллаах үбүлүөйдээх Ыһыаҕа театр баай историятын чиэстээһининэн эрэ буолбакка, кини кэнэҕэски кэскиллээх кэмин уонна барыны-бары түмэр күүһүн эмиэ көрдөрдө, норуот духуобунай баайын харыстааһыҥҥа уонна сайыннарыыга суолтатын өссө бигэргэттэ.

Якутские коневоды в числе 12 тысяч всадников прошли грандиозным парадом в Монголии