Ньурба көмүс күһүнэ: Айар кыттыыны ылла

«Айар» кыһа «Ньурба көмүс күһүнэ» литэрэтиирэ бэстибээлигэр кытынна!

Бастакы күн буруолуу сылдьар саҥа тахсыбыт «Ньырбакаан» историческай романы биллэр суруйааччыга, Саха Сирин суруйааччыларын сойууһун чилиэнэгэр, «Ньурба уоттара» литературнай түмсүү салайааччытыгар, роман ааптарыгар Дмитрий Пономарев-Дьолуолаахха «Айар» кыһа салайааччыта Август Егоров кинигэни үөрүүлээх быһыыга-майгыга туттарда.

Ону тэҥэ, бэстибээл чэрчитинэн Ньурба тыйаатырын киэҥ уораҕайыгар Саха норуодунай бэйиэтэ, СӨ Суруйааччыларын Сойууһун бэрэссэдээтэлэ Наталья Ивановна Харлампьева «Тыл күүһүгэр итэҕэйэбин» айар киэһэтэ буолан ааста. Быйыл Наталья Ивановна айар үлэтин 50 сыллаах үбүлүөйдээх сыла! Тыйаатыр толору мустубут айар куттаах дьон, суруйааччылар, култуура уонна үөрэх үлэһиттэрэ, ыалдьыттар бэйиэт иэйиилээх тылларын биир тыынынан иһиттилэр. Биэчэр үрдүк таһымҥа ыытылынна, Наталья Ивановна араас сылларга суруйбут хоһооннорун ааҕан, мустубут дьону долгутта. Наталья Ивановна тыл этэригэр бары туран улахан убаастабылы биллэрдилэр.

«Айар» кыһа салайааччыта Август Егоров тыл этэригэр Наталья Ивановна айар дьоҕурун уонна салайар талаанын бэлиэтээтэ:

1.  Саха тылын маастара: «Наталья Ивановна Саха тылын дэгэтин, уус-уранын баһылаабыт күүстээх бэйиэт. Киһи дууһатын уйадытар, долгутар элбэх хоһооннордоох.»

2.  Талааннаах салайааччы: «Үксэ дьон Наталья Ивановнаны бэйиэт, суруйааччы быһыытынан билэллэр. Кини ону таһынан күүстээх салайааччы. Улахан судаарыстыбаннай толкуйдаах, өйдөөх-санаалаах киһи. Хайдах бу икки эйгэни (поэзияны уонна салайыыны) дьүөрэлээн илдьэ сылдьара буолла диэн сөҕөбүн, махтайабын.» Август Васильевич бэлиэтээбитинэн, Наталья Ивановна «Айар» кыһаҕа сүрүн редакторынан үлэлээбитэ, 20 тахса сыл «Саха сирэ» хаһыаты салайбыта, уонна үйэ чиэппэрэ Саха сирин суруйааччыларын сойууһун айымньылаахтык илдьэ сылдьар.

3.  Арассыыйа таһымнаах билиниллиитэ: «Наталья Ивановна Арассыыйа үрдүнэн биир сойуус тэрийиитигэр ыытыллыбыт съезкэ, Владимир Путин көмөлөһөөччүтэ Владимир Мединскэй салайыытынан тэриллибит 50 чилиэннээх бырабылыанньаттан национальнай өрөспүүбүлүкэлэртэн киирбит 3 эрэ киһиттэн биирдэстэрэ буолбута. Бу кини талаанын уонна үлэтин судаарыстыба таһымнаах билиниитэ буолар.

Наталья Ивановна Харлампьева – дьиҥнээх лидер уонна айар куттаах киһи, кини олоҕо уонна үлэтэ барыбытыгар холобур буолар.

Иккис күҥҥэ дьикти кэрэ айылҕалаах Дьиикимдэ сиригэр «Таптал» тулаһатыгар уонна үбүлүөйдээх суруйааччы Степан Прокопьевич Федотов төрөөбүт-үөскээбит Дьөттүн алааһыгар салгыы буолла.

«Таптал» тулаһатыгар быйыл төрөөбүттэрэ 90 сылын бэлиэтиир сүдү дьоммут, Степан Федотов, Ксенофонт Уткин, Николай Чуор үрдүк ааттарыгар аналлаах дьүһүйүүнү көрдүбүт, Дьөттүҥҥэ «Саха киэн туттар дьоно» сиэрийэ чэрчитинэн «Айар» национальнай кинигэ кыһата бэчээттээн таһаарбыт «Степан Прокопьевич Федотов» кинигэ сүрэхтэниитэ буолла. Август Васильевич Ньурбатааҕы кииннэммит библиотекаҕа кинигэ экземплярдарын туттарда.

Уонна Ньурбатааҕы киин библиотекаҕа «Ньырбакаан уобараһа үһүйээннэргэ уонна аныг литератураҕа» интириэһинэй уонна ис хоһоонноох брейнсторминг ыытылынна. Ырытыыга «Айар» национальнай кинигэ кыһатын генеральнай дириэктэрэ Август Егоров, «Айар» генеральнай дириэктэрин солбуйааччы Валерий Луковцев, СӨ норуодунай суруйааччыта, бэйиэт уонна прозаик, тэлэбиидэнньэ суруналыыһа Наталья Михалева-Сайа, ону тэҥэ бэйиэт уонна суруналыыс Иван Николаев-Уххан уо.д.а. бэйэлэрин санааларын үллэһиннилэр.

Бу түгэҥҥэ суруйааччы Дмитрий Пономарев-Дьолуолаах саҥа тахсыбыт «Ньырбакаан» арамаана ураты болҕомтону тарта. Август Васильевич үөрүүлээх быһыыга-майгыга ааптарга кинигэлэрин туттарда. Кинигэни таптааччылар тута миэстэтигэр ааптар илии баттааһыннаах кинигэтин төгүрүйэн туран атыыласпыттара.

Реклама: АО НИК «Айар», ИНН 1435328670

erid:2Vtzqwxz8yH