Ыһыах үчүгэй тэрээһиннээх — Туймаада ыһыаҕа суолтатын сүтэрбит…

Дорообо!

Бэҕэһээ ыһыахха аһыллыытын көрдүм, алгыһын иһиттим. Бэйэбит ас буһарынан илдьибит аспытын,алгыстатан аһаатыбыт.

Быйыл шатл диэн транспортарыгар олорсон абыранным. Кырдьаҕастары бастакыннан олодоллоро махталлаах. Блогердар бэркэ үлэлииллэр.

Элбэх олорон аһыыр, сынньанар сирдэри оҥорбуттара үчүгэй. Оһуохай обществота саҥа балаҕаннаммыт, олус үчүгэй оҥоһуулаах. Киирэн сынньанан тэрийээччилэрин кытта кэпсэтэн,сэргээн таҕыстым.

Оһуохайга киһи элбэх. Мин ҮөБ оһуохай этээччитин Егор Егорович түһүлгэтигэр киирэн үҥкүүлээн үөрдүм. Дьоһуннаах этээччи түһүлгэтин налыччы тутан, бэрээдэктээн хаамтара олус үчүгэй.

Онон үчүгэй тэрээһиннээх ыһыахха сырыттым. Сонунум итинник.

Дорообо!

Үс Хатыҥ ыһыаҕа, Туймаада ыһыаҕа суолтатын сүтэрбит. Спортивнай күрэхтэһиигэ кубулуйбут.

Онтон атыннык этэр кыаҕым суох.

Бүгүн ыһыахха киирэ сырыттым.

Ыһыах аһыллыыта, ыһыах алгыһа, аһыллыытын тэрээһинэ олус бэрт.

Онтон күнүс 3 чаастан саҕалаан Дыгын оонньуулара саҕаланнылар.

Уонунан тыһыынча киһи киэһээҥҥэ диэри ону көрөөрү олорон таҕыстылар.

Ол кэмҥэ оһуохай түһүлгэтигэр киирэн үҥкүүлээри гыммытым туох да иһиллибэт. Тоҕо диэтэххэ Дыгын оонньууларын комментаторын саҥата Үс Хатыҥ үрдүнэн барытынан, киирэр аантан саҕалаан ылан кэбиспит.

Эчи саҥата улаханын, дьон икки ардыларыгар кэпсэтэр да кыахтара суох буолбут, микрофоннара оннук улаханыгар турар.

Оһуохай этээччи саҥата уон да хаамыылаах сиртэн иһиллибэт.

 Аны, оһуохай түһүлгэтигэр дьон олус аҕыйаабыт, ыччаттар олох да суохтар.

 Этээччигэ уон эрэ мүнүүтэни биэрэллэр. Ханнык этээччи итиччэ кылгас бириэмэҕэ аһыллан этиэй?

 Ити оннугар оһуохай этээччилэргэ көҥүллэ биэрэннэр, хас да түһүлгэҕэ тэҥинэн этэллэрэ, төһө баҕарар уһуннук, төһө баҕарар элбэх дьону түмэ тардан этэллэрэ буоллар оһуохайбыт сайдыа да этэ.

Оттон жюриларбыт остуолга олорон эрэн этээччигэ туһаайан «Этэн бүтэриҥ биир мүнүүтэ хаалла!»- диэн тойорҕуу олорбокко, түһүлгэни кэрийэ сылдьан ханнык этээччи улахан түһүлгэлээҕин, куолаһа төһө чөллөркөйүн, төһө бэркэ хоһуйарын иҥин сыаналыахтаах этилэр.

Маннык бардахпытына сотору оһуохайбытын сүтэрииһибит.

Өскө Кыыл Уола оһуохай этэрин уон мүнүүтэ иһигэр хааччахтаабыппыт буоллар итинник улахан этээччи баар буолуо этэ дуо?

Суох буоллаҕа.

90-с сылларга киин улуустар ыһыахтара биир да оһуохайа суох спортивнай күрэхтэһиигэ кубулуйбута.

Сарсыардаттан киэһээҥҥэ диэри күрэхтэһиини көрөн, онтон лотерея тэҥнээһинин көрөн түүҥҥэ диэри олороллоро.

Онтубут Туймаада ыһыаҕар кэлбит.

Түмүкпэр этээри гынабын Дыгын оонньууларын туспа күҥҥэ ыытыахха.

Микрофоннарын көрөөччүлэр эрэ истэллэрин курдук кыччата түһүөххэ.

Үс Хатыҥ (эссе)

Ыһыахчыттар санаалара

Фото: Алексей Пудов