Пентхаус абааһыта кимий? Кистэлэҥнээх түгэни долгуйа көрүҥ

Мин биири мэлдьи сөҕөбүн – саха дьоно тугу ылыстылар да, булгуччу ситиһиилэнэллэр. Ону ааһан, аан дойду таһымыгар тахсан, улуу судаарыстыбалары кытта тэҥҥэ күрэстэһэллэр, эбиитин, өрүү кыайыы көтөллөөх кэлэллэрин туһунан сонуннарга наар ааҕабыт. Олох бары көрүҥнэригэр оннук.

Бүгүн өссө биирдэ ону илэ көрөн итэҕэйэн кэллибит. “Лена” киинэ тыйаатырыгар “Пентхаус” диэн киинэни сөҕө-махтайа, астына көрдүбүт. Бу саҥа хартыынаны Малайзия диэн Соҕулуулуу-Илин Аасыйа киин куоратыгар Куала-Лумпуурга омуктары кытта кыттыһан киинэ ханнык баҕарар хайысхатыгар ураты дьоҕурдаах Степан Бурнашев устубут, сынаарыйын биллэр суруйааччы, тылбаасчыт оҕото, киинэ эйгэтигэр бэйэтэ эмиэ балайда биллэр буолбут Алексей Амбросьевтыын өссө 2023 сылга суруйбуттар. Киинэ икки сүрүн дьоруойдаах – кэргэнниилэр. Саха сириттэн төрүттээх Сайыынаны Саха тыйаатырын Кэрэ Куота, талааннаах артыыска уонна Степан олоҕун аргыһа Ирина Михайлова, онтон киинэҕэ кини кэргэнэ Дэвиды дьоппуон төрүттээх Эмиэрикэ артыыһа Содзи Араи оонньообуттар.

Киинэ омук сиригэр уһуллубут буолан, аангылыйалыы тылынан оонньообуттар, арай Сайыына эдьийин кытта кэпсэтэригэр сахалыы саҥарар, уонна Дэвид сахалыы ырыаны ыллаабыт.

Көрөөччү быһыытынан эттэхпинэ, уонна киинэни көрбүт суруналыыстар, блогердар, киинэҕэ сыһыаннаах идэлээх дьон сыанабылларынан, “Пентхаус” чахчы аан дойду таһымыгар эппиэттиир айымньы буолбут. Ирина бэйэтэ билинэринэн, бастаан С.Араи курдук биллэр артыыһы кытары бииргэ оонньууруттан долгуйбут уонна аангылыйалыы саҥарарыгар ыарырҕаппыт

 Ааптардар бэйэлэрэ этэллэринэн, киинэ хаыйсхата – триллер-дэтэктиип. Өссө биири бэлиэтээн эттилэр – бу саха киинэтин устуоруйатыгар аан бастакы омук дойдутун кытта кыттыгас, омук артыыстара оонньуур уонна бүтүннүү кыраныысса таһыгар уһуллубут хартыына буолар. Сыыспат буоллахпына, киинэни устууга 350 тыһыынча дуоллар ороскуоттаммыт. Киинэ Арассыыйа 100-н тахса куоратыгар уонна Саха сирин 100-чэ киинэ тыйаатырдарыгар көстүөҕэ.

Амма Соморсунуттан төрүттээх Степан Бурнашев киинэҕэ үлэлээбитэ быданнаата, эппитим курдук, кини араас хайысхалаах киинэлэрэ барыта көрөөччүлэргэ сөбүлэппит, араас бэстибээллэргэ хайҕаммыт айымньылар. Кини 16 киинэҕэ продюсердаабыт, 15 киинэни режиссер быһыытынан бэйэтэ туруорбут уонна устубут, онтон 11-гэр сынаарыйын суруйбут, 7 киинэни мантаастаан-маҥан оҥорбут уонна 2 киинэҕэ бэйэтэ оонньообут. Кини кэргэнэ Ирина Сунтаартан сылдаьр, номнуо 6 киинэҕэ уһуллубут уопуттаах.

Онон доҕоттор, бу киинэни көтүтүмэҥ, булгуччу сылдьан, киинэ кутталлаах, ону тэҥэ кистэлэҥнээх түгэннэрин долгуйа көрүҥ.

Черная премьера «Пентхауса» Степана Бурнашева