Варвара Потапова туһунан испэктээги национальнай гимназияҕа көрдөрдүлэр

Бу күннэргэ Сахабыт сиригэр бастакы поэтесса Варвара Потапова төрөөбүтэ 80 сылын бэлиэтиир тэрээһиннэр ыытыллаллар. СӨ Судаарыстыбаннай Үүнэр көлүөнэ тыйаатыра, бу сүҥкэн суолталаах түгэни көтүппэккэ, Дьокуускай куорат Антонина уонна Николай Чиряевтар ааттарын сүгэр Национальнай гимназия үөрэнээччилэригэр Варвара Потапова хоһооннорунан турбут «Ойдом үүммүт хахыйах» моно-испэктээги көрдөрдө.

СӨ үтүөлээх артыыһа Валентина Якимец олус табыллыбыт ураты туруоруутугар сүрүн оруолу эдэр артыыс Татьяна Хомподоева толордо. Кини Варвара Потапова иэйиинэн илгийэр, ардыгар үөрдэр-көтүтэр, ардыгар санаарҕатар-санньытар хоһооннорун олус талааннаахтык ааҕан, поэтесса уобараһын бу баардыы арыйда, эдэр да, эмэн да көрөөччү уйулҕатын таарыйда, сүрэҕин уйадытта. Быһата, Варвара Потапова айылҕаттан айдарыытын, чараас эйгэтин, уйан дууһатын, дойдуга, ийэҕэ-аҕаҕа, уолга тапталын толору тириэртэ.

Испэктээккэ дириэктэр Валентина Пермякова өҥөтүэн 6-8 кылаас оҕолоро сырыттылар. Бары туруорууну болҕойон көрдүлэр, улуу поэтесса туһунан элбэҕи биллилэр,сөбүлээбиттэрин бэлиэтигэр өлгөм ытыс тыаһын бэлэхтээтилэр. Валентина Семеновна оҕолору гимназияттан кынат анньынан тахсыбыт артыыс Сергей Эверстовы кытта билиһиннэрдэ. Ол кэннэ оҕолор испэктээккэ оонньообут артыыстары Илья Яковлевы, Спартак Ларионовы, Никита Соловьевы кытта хаартыскаҕа түстүлэр. 

Айар: Ааҕааччыбыт сэҥээриитин хайдах ылабыт?!