Үрүҥ Айыы Тойон, сүгүрүйэбит!

Бэс ыйын 7 күнүгэр Үрүҥ Айыы Тойон ыйыгар аналлаах «Сүрэхпэр- өбүгэм алгыһа» диэн бырайыак чэрчитинэн  «Үрүҥ Айыы Тойон, сүгүрүйэбит!» диэн тэрээһин  Өксөкүлээх Өлөксөй аатынан норуоттар доҕордоһууларын дьиэтигэр  сахалыы эйгэлээх дьону биир түһүлгэҕэ түмтэ.

Бу күн Үрүҥ Айыы Тойон алгыһын бар дьонугар иҥэрдэ «Тирэх», «Арыллыы», «Дьүөрэлэһии» үөрэхтэри сүрүннээччи, алгысчыт, арчыһыт Сыдьаайа Филиппова.

Үрүҥ тунах ыһыах чугаһаабытынан Үрүҥ Айыы Тойону уруйдаан, самаан сайыны айхаллаан ырыанан-тойугунан, хомуһунан эҕэрдэлээтилэр, М.Н.Жирков аатынан Дьокуускайдааҕы музыкальнай колледж устудьуоннара, «Махтал иэйиитэ» ырыа бөлөҕө (сал. СӨ култууратын туйгуна Станислав Петрович Олесов), ырыаһыт Марианна Романова-Тайыына.

Бэс ыйын сиэрэ-туома, ыһыах туһунан «Кут-Сүр» кыһа сэһэнньитэ, ХИФУ профессора, философскай наука доктора Андрей Саввич Саввинов сэһэргээтэ. Сэһэҥҥэ Үрүҥ Айыы Тойоҥҥо сүгүрүйүү, ыһыах суолтатын туһунан элбэҕи билэммит Айыы алгыһынан аартыкпытын арынан Күн дьоно, Айыы киһитэ дэтэн, Айыы санаанан салаллан саха буолан сандааран, киһи буолан килбэйэн, улуу саха омуга дэтэн тапталлаах Сахабыт сиригэр үйэттэн үйэҕэ тэнийэ, сайда, кыаҕыра түстүбүт.

Ыһыах дьиҥ өйдөбүлүн, сиэрин-туомун, дириҥ суолтатын сүтэрбэт гына бары кэлэн элбэҕи билэммит өбүгэлэрбитин удьуордаан кэлэр кэнчээри ыччакка салгыы сахабыт омугун сүдү күүһүн, баайын — Алгыһы, Ыһыаҕы хааллараммыт, өбүгэбит итэҕэлин тириэрдэммит Үрүҥ Айыы Тойоммут бэттэх көрөн мичик гынан үүнэрбитин төрүттээн, айылгыбытын анаан, уһун уйгулаан, кэтит кэскиллээн Үрүҥ күн быатын тутуохпут, алгыс баһын арыйыахпыт – диэн бу тэрээһинтэн сүргэбит көтөҕүллэн, оһуохайдаан санаабыт көнньүөрэн тарҕастыбыт. 

Кэлбит дьон Өксөкүлээх Өлөксөй аатынан Норуоттар доҕордоһууларын дьиэтин айар кэлэктиибигэр (генеральнай директор Антонида Николаевна Корякина)  «Саха эйгэтэ» (сал. Екатерина Петровна Новикова), «Кэрэ олох» (сал. Матрена Андреевна Ядрихинская) уопсастыбаннай түмсүүлэригэр  махталларын тириэртилэр.