Ааппын ааттаар, көрдөһөөр

Ааппын ааттаар, көрдөһөөр:

Абааһы саҥнаахтар

Ааккын алдьатаннар

Ардьаҥнаһа үөрэн,

Албыннык мичээрдээн,         

Алларастыы күлэн,

Ас-үөл тэринэннэр

Араллааннаан мустан,

Аймалаһан кэлэн

Аһыыр кэмнэригэр.

Ааппын ааттаар, көрдөһөөр:

Буруйа суох сылдьан

Буруттанар-үөҕүллэр,

Биир муостанан хааман,

Быраабыҥ быһыллан

Быраҕыллар-сэнэнэр,

Барбахсыйар-тэбиллэр,

Быстыы-ойдуу кэлэр,

Быстарыктаах иэдээн

Быһылаан түгэнигэр.

Ааппын ааттаар, көрдөһөөр:

Кыһалҕа кыһарыйар,

Кырыыс-таныар кыланар,

Кытыыга үтүрүллэр,

Кырыы харах кынчыаттыыр,

Кырааска-той суураллар,

Кырдьыы-бохтуу кыпчыйар,

Кылаан-өргөс мүлүрүйэр

Кылыйар кэм ааһар

Кыһарҕан күнүгэр.

Ааппын этэн ыҥырымаар:

Туспа хонуу иэнигэр

Түһүлгэ тэринэн,

Төгүрүччү олорон,

Түһүмэхтээн аһаан,

Төбөт соҕус дьоннордуун

Төлө биэрэн кэпсэтэн,

Төтөлө суох күлсэн,

Төгүрүччү көрсөн

Тохтоон көрүлүүргэр.