Олох кырдьыга уонна кэм тыына…

Олох кырдьыга уонна кэм тыына: саха суруйааччыларын кытта истиҥ көрсүһүү

​Кинигэ историяны харыстыыр эрэ буолбакка, киһи киһини өйдүүрүн, дууһатын истэрин ситиһэр саамай күүстээх ньыма. Муус устар 27 күнүгэр «Бичик+» маҕаһыыҥҥа икки атын эйгэни арыйар саҥа кинигэлэр суруйааччыларын кытта көрсүһүү буолла. Биирдэстэрэ — дьахтар уйан кутун туһунан болҕомтону тардар буоллаҕына, иккиһэ 90-с сыллар «быыһык кэмин» кырдьыгын арыйар.

​Галина Нельбисова: Хас биирдии дьахтар бэйэтин көрүнэр сиэркилэтэ

​Арассыыйа Суруйааччыларын сойууһун чилиэнэ, биллэр прозаик Галина Нельбисова үбүлүөйдээх күнүн көрсө «Айар» кинигэ кыһатыгар «Санаам ытарҕата эйэҥэлиир…» диэн саҥа хомуурунньуга бэчээттэнэн таҕыста.

Галина Васильевна «Ааҕааччым эн кэтэһэриҥ тухары…» диэн аан тылыгар суруйар, айар идэтин туһунан кылгастык билиһиннэрэр. Кини бастакы «Кытылга кыыс ытыыра» кэпсээннэрин хомуурунньуга 2005 сыллаахха тахсыаҕыттан ааҕааччы сэҥээриитэ кинини айар остуолга тиэтэтэр.

​Бу саҥа кинигэҕэ олоҕу олорбут, көмүс күһүннэрин чараҥар үктэммит кэрэ аҥаардар дьылҕаларын, дьахтар аналын, олох күннээҕи үөрүүтүн-хомолтотун арыйар кэпсээннэр түмүлүннүлэр. Ааптар суруналыыс буолан, үлэтигэр көрсүбүт дьонун уопсай портреттарын холбоон, дьиҥнээх геройдары айан таһаарар. 

Көрсүһүүгэ кинигэ геройдарын биирдэстэрин кыыһа кэлэн, ийэтин олоҕун туораттан ааҕан төһөлөөх долгуйбутун билиммитэ — бу кинигэ хас биирдии ааҕааччыга «мин туспунан суруллубут курдук» диэн санааны күөртүүрүн туоһута.

​Борис Павлов Кэм: Көлүөнэ дьылҕатын кэрэһитэ

Суруйааччы, суруналыыс Борис Кэм «Өйбөр туппут куоратым» саҥа кинигэтигэр атын, уустук кэми — 1990-с сыллар уларыйыылаах-тэлэрийиилээх хамсааһыннарын арыйар. Ааҕааччы иннигэр бүтүн көлүөнэ олоҕо «сүүнэ улахан хараабыл» курдук устан ааһар.

​Борис Павлов бу кэми «быыһык кэм» диэн ааттыыр. Үйэ, эпоха уларыйыытын бэйэлэрин эттэринэн-хааннарынан ааспыт дьон дьылҕата сурукка тиһиллэн хаалыахтаах диэн кини бэйэтигэр улахан эппиэтинэһи ылбыт. Бэйэтэ урбаанньыт, издатель быһыытынан киэҥ эйгэлээх киһи буолан, ол кэм туһунан кырдьыгы суруйуу норуот устуоруйатыгар туһааннаах диир. 90-с сыллар саха норуотугар улаханнык дьайбыт кэм буолан, кырдьыгын кэлэр көлүөнэ билиэхтээх. Ааптар өссө да атын устуоруйа кэрэһилэрин сурукка киллэрэр былааннааҕын ааҕааччылар үөрэ иһиттилэр. 

Борис Кэм саҥа айымньыта — билиҥҥи саха литэрэтиирэтигэр киирбит сонун сүүрээн эрэ буолбакка, ааптар айар үлэтин үрдүк таһымын бигэргэтэр дьоһуннаах арамаан буолар 

​Көрсүһүү түмүгэр ааҕааччылар сөбүлүүр ааптардарын кытта хаартыскаҕа түстүлэр, истиҥник кэпсэттилэр уонна анал бэлиэ суруктаах кинигэлэри ылан үөрдүлэр-көттүлэр. Галина Нельбисова уйан кэпсээннэрэ уонна Борис Павлов кэм кырдьыгын арыйар сэһэнэ хас биирдии дьиэ кэргэн кинигэтин кэккэтигэр бэйэлэрин таба миэстэлэрин булуохтара диэн эрэнэбит.

​Саҥа кинигэлэри «Айар» кыһа бары лааппыларыттан уонна ayar.ru интэриниэт-маҕаһыынтан атыылаһыаххытын сөп.