АЙАР Казахстантан ситиһиилээх эргилиннэ

САХА КИНИГЭТЭ ЕВРАЗИЯ ТАҺЫМЫГАР!

Муус устар 22-26 күннэригэр Казахстан киин куоратыгар Астанаҕа буолбут «Astana Eurasian Book Fair-2026» аан дойдутааҕы кинигэ быыстапка-дьаарбаҥкатыгар Саха сириттэн «Айар» национальнай кинигэ кыһата кытынна. Евразияҕа саамай улахан кинигэ тэрээһинигэр Арассыыйаттан, Белорусияттан, Турцияттан, Кытайтан, Испанияттан, Монголиятттан уонна да атын Европа, Азия дойдуларыттан 80-тан тахса кинигэ кыһалара кыттыыны ыллылар. Бу үрдүк таһымнаах тэрээһиҥҥэ «Айар» кыһабыт салайааччыта Август Егоров, уонна тэрилтэ тутаах үлэһиттэрэ Лена Адушинова, Лена Попова тиийэн кыттыыны ылан кэскиллээх былааннары олохтоототулар. Биһиги кыһабыт бу быыстапкаҕа бэйэтин үлэтин-хамнаһын билиһиннэрдэ. Атын тэрилтэлэр үлэлэрин-хамнастарын билистилэр, саҥа партнердары кытта сибээс олохтоотулар, уопут атастастылар. Итиэннэ салгыы бииргэ үлэлээһиҥҥэ сөбүлэһэн түһэристилэр.

Ону тэҥэ «Айар» кыһа 100 сылаах үбүлүөйүнэн презентацияны уонна саха саарына Борис Федорович Неустроев-Мандар Уус «Узоры и орнаменты саха» диэн кинигэтин билиһиннэриини ситиһиилээхтик ыыттыбыт! Манна сылдьыбыт дьон кыһа историятыттан билистилэр, Мандар Уус үлэтин уратытын, кинигэ суолтатын үрдүктүк сыаналаатылар. Сахабыт норуотун муудараһа, уустук оҥоһуулаах оһуордара-ойуулара аан дойду киэҥ эйгэтигэр биллэригэр өссө биир хардыы оҥоһулунна!

Биһиги ситиһиибит – үрдүк наҕараадалар!

Быыстапка экспертэрэ «Айар» таһаарыыларын үрдүктүк сыаналаан, кыһабыт муҥутуурдук наҕараадаланна:

• I истиэпэннээх Диплом — «Бастыҥ тылбаас» номинацияҕа казах омук «Хабыланды баатыр» эпоһын сахалыы тылбааһын иһин бэрилиннэ. Бу — норуоттар доҕордоһууларын, култууралар алтыһыыларын бэлиэтэ!

• III истиэпэннээх Дипломнар — «Саха литературатын көмүс кылаата» диэн уус-уран кинигэбит уонна «Киһи аан туома» (Атлас анатомии человека) диэн научнай таһаарыы бэлиэтэннилэр. Бу наҕараадалар биһиги кинигэбит хаачыстыбатын, дириҥ ис хоһоонун бигэргэттилэр.

Ааҕар омук кэскиллээх: Казахстан уопута.

 Быыстапка кэмигэр «Айар» кыһа салайааччыта Август Егоров уонна үлэһиттэрэ Казахстан кинигэ эйгэтин кытта билсэн, элбэх туһалаах сонун иһиттилэр. Август Васильевич Казахстан судаарыстыбаннай таһымҥа «Ааҕар нация» диэн улахан бырайыагы олоххо киллэрэн үлэлэтэрин бэлиэтээтэ: «Манна оҕоттон кырдьаҕаһыгар тиийэ кинигэни аахтарарга анал үлэ барар. Сүрүн сыаллара – Казахстаны аан дойдуга саамай ааҕар уон дойду ахсааныгар киллэрэр сыаллаахтар-соруктаахтар. Казахстаҥҥа библиотека ахсаана сылын аайы элбии турар. Казахтар кинигэни олус сыаналыыллар уонна ааҕаллар. Бу – ааҕыы норуот сайдыытын сүрүн тирэҕэ буоларын чаҕылхай холобура»

Саҥа идеялар уонна иэйии!

«Айар» делегацията быыстапкаҕа сылдьан атын дойдулар кинигэ оҥоруутугар сонун ньымаларын билсэн кэлэн үлэһиттэригэр кэпсээтилэр, ааҕаааччыларбытыгар анаан саҥа, ураты  бырайыактары оҥорорго кынаттаатылар:

• Саҥа форматтаах халандаардары оҥоруу: атын дойдулар уопуттарыгар олоҕуран, дизайн өттүнэн сонун көрүҥнэри, көрүүлэри киллэрии.

• Үһүйээн дьоруойдара: Сахабыт сирин чулуу дьонун туһунан оҕолорго, ыччаттарга анал таһаарыылар былааннаналлар.

• Полиграфия саҥа таһыма: кинигэ обложкалара, оҕону сайыннарар таһаарыылар аныгылыы, тупсаҕай уонна ааҕааччы илиитигэр тутарга табыгастаах быһыылаах, сонун форматтаах бородууксуйа оҥоһуллан тахсарыгар санаалар киирдилэр.

Салайааччыбыт атын кыһалар бастыҥ бородууксуйаларын аҕалан көрдөрбүтэ, кэпсээбитэ үлэһиттэргэ улахан иэйиини уонна саҥаны айар баҕаны сахта.

Астанаҕа буолбут «Astana Eurasian Book Fair-2026» «Айар» кыһа хайысхата сөптөөҕүн, сахабыт кинигэтэ аан дойду таһымыгар сөп түбэһэрин өссө төгүл бигэргэттэ. Инникитин ааҕааччыларбытын өссө да сонун, таһымнаах бырайыактар кэтэһэллэр!