Саха театра Олоҥхо ыһыаҕар үрдүк таһымнаахтык кытынна

🎭🍃 Саха театрын айар бөлөҕө Кэбээйигэ ыытыллыбыт Олоҥхо Ыһыаҕар үрдүк таһымнаахтык кытынна

Кэбээйи сиригэр киэҥ далааһыннаахтык ааспыт Олоҥхо Ыһыаҕа саха норуотун култууратын, духуобунаһын түмэр улахан бэлиэ түгэн буолла. Бу улахан тэрээһиҥҥэ Былатыан Ойуунускай аатынан Саха академическай театрын айар бөлөҕө көхтөөхтүк кыттыыны ылла.

Саха театрын делегациятыгар дириэктэр Петр Макаров, РФ үтүөлээх, СӨ норуодунай артыыһа Анатолий Николаев, Олоҥхо Ыһыаҕын уус-уран салайааччыта, РФ норудунай артыыһа Андрей Борисов ытыктабыллаах ыалдьыт быһыытынан кытыннылар.

Санаттахха, ыһыах үөрүүлээх аһыллыытын режиссерунан — Саха театрын сүрүн режиссера, СӨ искусствотын үтүөлээх диэйэтэлэ Руслан Тараховскай буолла. Оттон сабыллыы сиэрин-туомун Роман Дорофеев иилээн-саҕалаан туруорда. Тэрээһин техническэй өттүн, туруоруу үлэтин Илья Стручков салайааччылаах постановочнай чаас сулууспата үрдүк таһымнаахтык хааччыйда. Онтон аһыллыы сиэригэр Саха театрын артыыстара кыттан, көрөөччүлэргэ умнуллубат кэрэ дьүһүйүүнү бэлэхтээтилэр.

🎭 Бөдөҥ тэрээһин иитинэн, от ыйын 4 күнүгэр, «Сайдам» норуот айымньытын дьиэтигэр Саха театра Николай Якутскай «Төлкө» арамаанынан туруоруллубут биллэр-көстөр испэктээкилин көрдөрдө. Саала толору көрөөччүлээх аншлагынан ааһан, туруоруу улахан биһирэбили ылла. Ураты ис хоһоонноох, дириҥ суолталаах айымньыны көрөөччүлэр итиитик-истиҥник көрсөн, артыыстары уһуннук алгыс тылларынан атаардылар👏🏻

Бэлиэтээн эттэххэ, Кэбээйи улууһа– РФ үтүөлээх, СӨ норуодунай артыыһа Анатолий Николаев, СӨ култууратын туйгуна Дмитрий Татаринов, ону таһынан М.С. Щепкин аатынан Үрдүкү театральнай училище бүтэрбит эдэр артыыстар Айаана Егорова уонна Григорий Иванов төрөөбүт дойдулара.

Бу курдук Сахабыт сирин биир саамай күүтүлээх уонна суолталаах тэрээһинин ыыппыт Кэбээйи улууһун дьонугар-сэргэтигэр уонна тэрийэр хамыыһыйаҕа барҕа махталбытын тиэрдэбит. Быйылгы Олоҥхо Ыһыаҕа өбүгэбит үтүө үгэһин уонна республикабыт айар кэлэктииптэрин күүһүн түмэн, кэлэр көлүөнэҕэ кэрэ өйдөбүл буолан хаалыаҕа.