Кыайыы көтөллөөх өрөгөй Оһуохайа күөх Ньурбаҕа ыытыллыа
Ньурбаҕа Кыайыы Оһуохайа түһүлгэтэ ыытыллыа
Олунньу 21-22 күннэригэр Ньурба куоратыгар "Кыайыы көтөллөөх, өрөгөй Оһуохайа" диэн ааттаах улахан түһүлгэ ыытыллара былааннанар.
Сиһилии Саха Республикатын Аар Дархан этээччитэ, Ньурба улууһун култуура5а Департаменын салайааччыта Розалия Тихонова кэпсээтэ:
— Бу сыл олунньу 21-22 күннэригэр киэҥ Ньурба киэлитигэр, оройуон киинигэр Улуу кыайыы 80-сыллаах үбүлүөйүнэн, Ийэ дойдуну көмүскээччилэр сылларынан хотуулаах хоннохтоох, хорсун хоодуот эр уоланнарбытыгар анаан, «Кыайыы көтөллөөх, өрөгөй Оһуохайа» ыраах-чугас сирдэртэн, ытык тыл ындыылаах, тохтор тойук төргүүлээх төбүрүөннээх түһүлгэни төрүттээччи Эр хоһууттар, төлкө түөрэх түһэриэхтэрэ.


Бииртэн биир дохсун дьолуо үҥкүүлээхтэр, сытыы кылыс тыллаахтар, көччөх көтөр ырыалаахтар, ыраас санааларын ыпсара Эркээйи эбэ эҥээриттэн, хоту дойду хонноҕуттан, Бүтэй Бүлүү биэрэгиттэн, суон сурахтаах Сунтаартан, Ньурба ньургуннара мустан аҥардас оһуохай эрэ буолбакка кэскиллээҕи кэрэһэлээн кэпсэтии, тускуллааҕы торумнаһыы, санааны атастаһыы былааннанар.
Туймаада эбэ хотунтан саха Оһуохайын сүрүн салайааччыта, бас-көс киһибит Александр Джурович Данилов- Дьулуур Хан, Аарктикатааҕы култуура уонна искусство судаарыстыбаннай үнүстүтүүтүн норуот уус — уран култууратын кафедратын сэбиэдиссэйэ, доцент, филологическай билим хандьытаата Афанасьев Ньургун Вячеславович, Саха сирин Дархан, Үтүөлээх этээччилэргэ уонна да атыттар кэлэллэрэ күүтүллэр.
Бу Оһуохай түһүлгэтэ сүрүн сыала — соруга диэн үүнэр көлүөнэни, эдэр ыччаты Ийэ дойдуну таптыырга бэриниилээх буоларга уһуйуу, олох үтүө үгэстэрин үйэтитии, сиэрдээх буолууну иҥэрии. Өйдөөн-санаан ааһыахпыт улуу кыайыыны уһансыбыт, дьоллоох олох оҥкулун олохсуппут ытык оһуохайдьыт убайдарбытын: Иванов Никифор Григорьевич — Һыҕаан, Степанов Николай Семенович-Хара Ньукуу, Тимофеев Семен Николаевич-Сыччыкы Сэмэн, Степанов Василий Васильевич- Хомпуоһап Баһылай уо.д.а.
Дьэ, бу курдук Айыыһыт сылыгар, Одун Хаан ыйыгар одун хаантан оҥоһуубутун, чыҥыс хаантан ыйаахпытын санаа хоту сааһылаан, ыра хоту ыпсаран ааһыахпыт!

Александр Дьулуур Хаан,Оһуохай түмсүү салайааччыта:
- Бастатан туран Ньурба оройуонун Аҕа баһылыгар Алексей Михайлович Иннокентьевка, дьахталларга Саха сиригэр бастакы Аар Дархан этээччи аатын сүкпүт, биһиги түмсүүбүт биир тутаах кыттааччытыгар, Ньурба улууһун култуура5а Департаменын салайааччытыгар Розалия Михайловна Тихоноваҕа Оһуохай хамсааһын сайдарыгар күүстээх үлэ ыыта сылдьалларыгар улахан махталбытын тиэрдэбит! Бары биир санааннан маннык үтүө Кыайыы Оһуохайын түһүлгэтигэр көхтөөх кыттыыны ылыаххайыҥ диэн ыҥырабыт!
+7 (999) 174-67-82
