Көхтөөх, үрдүк таһымнаах тэрээһин буолла

Дьокуускай куоракка А.Кулаковскай аатынан культура киинигэр дьон тоҕуоруһа муһунна. Сунтаар улууһун Элгээйи нэһилиэгин тэриллибитэ 255 сыла, П.Х. Староватов аатынан Элгээйи орто оскуолата аһыллыбыта 150 сылын бэлиэтээри тыһыынча биэрэстэлээх сиртэн элбэх массыынанан айаннаан 125 киһи, ол иһигэр элбэх кыра кылаас оҕолоро эмиэ кэлбиттэр. Кинилэр культура киинигэр толору мустубут Туймаада хочотугар олорор биир дойдулаахтарыгар үрдүк үөрүүнү бэлэхтээтилэр. Көрсүһүү киэҥ бырагыраамалаах буолла.

16 чаастан талба талааннаах дьон уран оҥоһуктарын быыстапката буолла. Элгээйи асчыттарын минньигэс астарын атыыта тэрилиннэ.

17 чаастан Элгээйилэр Саха сирин устун сураҕырбыт үҥкүү тыла этээччилэр кыттыылаах “Оһуохай түһүлгэтэ” элбэх дьону түмэ тарта. Оһуохай алгыстаах абылаҥын ытыктыыр, туһанар дьон элбэҕэ көһүннэ.

18 чаастан “Элгээйи оскуолата” диэн саҥа дьоһуннаах, бөдөҥ кинигэ сүрэхтэниитэ аныгылыы быһыылаан, кинигэ сүрүн геройдарын театральнайдык дьүһүйүү көрүҥүнэн көрөөччүлэри астыннарда. Кыттааччылар оруолларын итэҕэтиилээхтик толордулар.

Кинигэ сүрэхтэниитин сүрүн ыытааччы Уйбаан Нуолур аатынан библиотека сэбиэдиссэйэ Семенова Татьяна Афанасьевна дириҥ ис хоһоонноохтук, иһирэхтик, өйдөнүмтүөтүк, кумааҕыны көрбөккө, кинигэ ис хоһоонун бэйэтин тылынан кэпсээтэ, көрөөччүлэри сөбүлэттэ.

Дьэ, онтон СӨ культуратын туйгуннара Тускулаана Горохова – Кобельянова, Григорий Гурьев Элгээйи нэһилиэгин талааннаахтарын үтүөкэн концертарын истээччилэр санааларын көтөҕөрдүү иилээн-саҕалаан ыыттылар. Саала иһэ көрөөччүлэр күүстээхтик ытыстарын таһынан үҥкүүһүттэргэ, ырыаһыттарга махтаннылар. Биир нэһилиэккэ талааннаах элбэх үҥкүүһүттэр, ырыаһыттар сайдан, үүнэн тахсыбыттара киһини сөхтөрөр. Ол эрээри толкуйдаан көрдөххө, ити барыта өр сыллаах, системалаах үлэ культура эйгэтигэр ыытыллыбытын түмүгэ буолар.

Элгээйи кулуубугар Сергей Зверев – Кыыл Уолун дойду үрдүнэн киэҥник биллибит ансаамбыла сайдан тахсыбыта. Кини ансаамбыла “Оһуор үҥкүүтүнэн” 1957 сыллаахха Москваҕа ыччаттар Аан дойдутааҕы фестивалларыгар кыттыбыта уонна бастакы истиэпэннээх дипломунан наҕараадаламмыта.

1998 сыллаахха Элгээйитээҕи оҕо музыкальнай искусствотын куруһуогун уопуттаах музыка учуутала, СӨ культуратын үтүөлээх үлэһитэ Семенова Мария Сергеевна арыйбыта. Бу куруһуок үөрэнээччилэрэ “Домисолька” диэн группа тэриммиттэрэ. Элбэх үлэ түмүгэр “Домисолька” группа үүнэн-сайдан тахсыбыта уонна 2007 сыллаахха оҕолорго аналлаах “Евровидениеҕа” ситиһиилээхтик кыттыбыттара, ааттара-суоллара бүтүн Россия үрдүнэн биллибитэ. Кырачаан Ваня Трофимов ырыаларын Саха сиригэр дьон биһирээн истэр буолбута.

Элгээйи нэһилиэгин аныгы ыччата урукку көлүөнэ үтүө үгэстэрин, үҥкүүнү, ырыаны сайыннаран иһэллэриттэн биһиги үөрэбит. Үҥкүүгэ, ырыаҕа талааннаах Элгээйи аныгы ыччатын үрдүк таһымнаах, көрөөччүнү дуоһутар, астыннарар концертара ситиһиилээхтик түмүктэннэ. Туймаада хочотугар олохсуйбут биир дойдулаахтарыгар нэһилиэк төрүттэммитэ 255, оскуолабыт арыллыбыта 150 сыллаах юбилейдарын түмүктүүр тэрээһинин Элгээйи оскуолатын директора Игнатьева София Васильевна, Элгээйи нэһилиэгин баһылыга Самойлов Аркадий Геннадьевич кыһаллан туран тэрийбиттэрэ үтүө түмүктээх буолла. Дьон-сэргэ юбилейдарга анаммыт дьаһалларга астынан туран сырыттылар, барҕа махтал тылларын эттилэр.

Арай киһи өйдөөбөт биир түгэнинэн инники өттүгэр хатыламматын диэн этиэххэ сөп. Итиччэ ыраах сиртэн элбэх кыттааччы айан ыараханын көрсөн, кыһаллан туран Дьокуускай куорат олохтоохторун дьоһуннаах үбүлүөйдэринэн эҕэрдэлээбиттэригэр, СӨ үөрэҕин министерствотын, Дьокуускай куорат мэриятын аатыттан махтал тыла этиллибэтэҕэ тутах курдук. Инникитин учуоттанара наада этэ.

Климент ИВАНОВ, госсулууспа ветерана, СӨ бочуоттаах олохтооҕо.

Айталина Ильина аатынан оҕо тыйаатырдарын бэстибээлэ түмүктэннэ