Кыым атыы-тутуу табаара буолбатах! Хаһыат тоҕо тахсыбата?

«Кыым» хаһыат саҥа нүөмэрэ тоҕо тахсыбата?

“Кыым” хаһыат ытыктабыллаах ааҕааччылара, сурутааччыларбыт!

Эһиги саха төрүт үгэстэригэр, саха тылыгар, култууратыгар бэриниилээх, ытыктабыллаах сыһыаннаах буолан, номоххо киирбит “Кыым” хаһыаты сурутан, атыылаһан ааҕаргыт иһин истиҥ махталбытын биллэрэбит. Ол курдук, ааҕааччыларбыт көмөлөрүнэн “Кыым” хаһыат 2025 с. бастакы аҥаарыгар 14 тыһ. тахса тираһынан тахса турар.

Ааҕааччыларбыт билэллэр: “Кыым” хаһыат атыыланар да, сурутуллар да сыанатын биһиги өр кэм устата тутан (сыана тохтообокко үрдүүр кэмигэр), төһө кыалларынан намтатан, дьон-сэргэ тииһинэрин курдук “норуодунай” таһымынан илдьэ кэлбиппитин. Араас хамсыктар, сааҥсыйалар уонна кириисистэр да кэмнэригэр “Кыым” хаһыат тохтообокко тахса, Сахабыт сирин бары улуустарыгар атыылана да, сурутулла да турбута.

Ол эрээри, бу кэнники сылларга судаарыстыбаннай типография хаһыаты таһаарарын иһин сыанатын инфляцияны да куотар таһымынан үрдэтэ турар. “Кыым” “Социальнай суолталаах хаһыат” диэн федеральнай да, өрөспүүбүлүкэтээҕи да статуһун иһин кыра да чэпчэтиини көрбөт. Санаттахха, сорох атын эрэгийиэннэргэ маннык статустаах таһаарыыларга 50 %-ҥа тиийэр суумалаах чэпчэтиилэри көрөллөр.

Биһиги бу баччааҥҥа диэри хаһыаппыт чэппиэр аайы тахсан, дьоҥҥо-сэргэҕэ тиийэрин, толору тарҕанарын туһугар туох кыаллары барытын оҥорон кэллибит.

2025 сылтан “Кыымы” “Ситим-Медиа” ХЭУо таһаарар буолла. Хаһыат тохсунньу ыйы быһа бэчээттэнэн тахсарын иһин сыаната толору төлөнөн турар. Ол эрээри, билигин типографияны кытта өҥөнү оҥоруу иһин дуогабара илии баттана илик. Тоҕо диэтэххэ, Ю.А. Гагарин аатынан   өрөспүүбүлүкэтээҕи типография билиҥҥи сыанатыгар сыһыаннаах кэккэ боппуруостар үөскээн таҕыстылар. Бу тэрилтэ сыаната хас кыбартаал аайы тохтообокко үрдүү турара араас санааны-оноону үөскэтэр.

“Ханнык баҕарар сайдыылаах аныгы уопсастыбаҕа курдук, “Кыымы” таһаарар буолбут “Ситим-Медиа” ХЭУо типография салалтатын кытта биир остуолга атах тэпсэн олорон уопсай тылы булуо, биир сүрүҥҥэ кэлиэ” диэн эрэллээхпит. Бу боппуруоһу чуолкайдаһаары биһиги ол иннинэ СӨ Сибээһин уонна информация технологияларын министиэристибэтин салалтатын кытта кэпсэтэ сылдьыбыппыт. Онно биһигини толору өйүүллэрин биллэрбиттэрэ. Ол эрээри, ол өйөбүл 2025 сыл 3 бастакы нүөмэрэ эрэ тахсарыгар көмөлөстө. Аҥаардас онтон даҕаны типография салалтата кинини салайар-дьаһайар министиэристибэҕэ хайдах сыһыаннааҕа көстөр курдук.

Быйыл олунньу 6 күнүнээҕи “Кыым” 4-с №-рэ кэмигэр, ол эбэтэр олунньу 5 күнүгэр киэһэ оҥоһуллан типографияҕа ыытыллыбыта да, типография туох да төрүөтү быһаара барбакка таһаарартан батынан кэбистэ.

Инньэ гынан, кэнники 20 сыл устата “саамай улахан тиражтаах сахалыы хаһыат” аатын ылан, тиһигин быспакка тахса турбут саҥардыллыбыт “Кыым” хаһыат аан бастаан тахсыахтаах кэмигэр (олунньу 6 күнүгэр) тахсыбата.

Онон, ытыктабыллаах ааҕааччыларбыт, типография быһаччы дьайыытынан, хаһыаппыт 4-с №-рэ тахсыбатаҕын бырастыы гынаргытыгар көрдөһөбүт. Бу күннэргэ биһиги бу боппуруос ааҕааччыларбыт туһатыгар быһаарылларын туһугар үлэлэһэ сылдьабыт, ол иһигэр, СӨ Бырабыыталыстыбатын Бэрэссэдээтэлэ Кирилл Евгеньевич Бычковка Ю.А. Гагарин аатынан судаарыстыбаннай типография сыанатын сүрүннүүрүгэр, Уһук Илин федеральнай уокуругар уонна Арассыыйа национальнай хаһыаттарыгар саамай улахан тиражтаах “Кыым” хаһыат салгыы тахсарыгар көмөлөһөрүгэр көрдөһөн таҕыстыбыт.

Билигин дойдуга да, өрөспүүбүлүкэҕэ да – уустук кэм. Оттон биһиги хаһыаппыт ханнык эрэ атыы-тутуу табаара буолбакка, сахалыы тылынан информацияны тарҕатар, дьон өйүгэр-санаатыгар дьайар уорган быһыытынан үлэлээн кэллэ. Онон типография салалтатын үлэтигэр сиэрдээх сыанабыл бэриллэригэр, ааҕааччыларбыт кырдьыктаах уонна дьоһуннаах источниктан сиэрдээх иноформацияны ылар бырааптара күөмчүлэммэтигэр эрэнэбит.

«Кыым» хаһыаты таһаарар быһаарыыны буларга туруорсуохха!

«Кыым» хаһыат бу чэппиэргэ тахсыбакка соһутта! Билбиппит – типография сыанатын үрдэтэн бэчээттиирин аккаастаабыт! Бу тугуй?
Саха тылбытын өрүһүйэр биир сүрүн хаһыаппытын — норуот сөбүлүүр хаһыатын өйүүр тоҕо табыллыбатый? — Никитина Вилюяна.

Кырдьаҕас ааҕааччыбыт, уопсастыбаннай кэрэспэдьиэммит санаатын үллэстэр: Доҕоттор!
Үлэһит буолуохпуттан, 60-тан тахса сыл устата ааҕан, суруттаран, суруйан кэлбит тапталлаах норуот хаһыата «Кыыммытын» типография бэчээттииртэн аккаастаабытын истэн олус соһуйдум, хомойдум.
Аата сүрүн!
Манна Ил Дархан, бырабыыталыстыба да орооһон, боппуруоһу түргэнник быһааралларыгар көрдөһөр эрэ буолбакка, модьуйсабын — Уйбаан Пономарев, «Кыым» кырдьаҕас ааҕааччыта

…Кэнники кэмҥэ араас сонуннар бииртэн биир күөрэйэн, соһуйартан соло булбат буоллубут. Ол да буоллар, бу сонун — СОҺУЧЧУТТАН СОҺУЧЧУ — »Кыым» хаһыат тахсыбата!
Саха тыллааҕы тыынын уһатар, кыһалҕатын, үөрүүтүн үллэстэр, саҥаны-сонуну кэпсиир, олорон ааспыт кэммит быыһын сэгэтэр хаһыаппыт тахсыбата…
Биһиги, саха тылын учууталлара, бу алҕас туоратыллыа диэн бигэ эрэллээхпит. Саха тылын үөрэтии бары кыһалҕатын тэҥҥэ сүксэн, туоратыһан, бэл, хамсык кэмигэр Арассыыйа регионнарын ыҥыран, тэйиччиттэн олорон, төрөөбүт тыл чаастарын туһунан мунньахтары, төгүрүк остуоллары тэрийэр хорсун дьонноох хаһыат — »Кыым».
Биһиги түмсүү санаабытын, баҕабытын, этэр тылбытын дьоҥҥо-сэргэҕэ тиэрдэр, киэҥ эйгэҕэ таһаарар, бииргэ үлэлэһэр тапталлаах хаһыаппыт дьылҕатыгар тустаах дьон болҕомто уурарын, харда биэрэрин күүтэбит- Жанна Барашкова, СӨ »Сайдыы» саха тылын учууталларын түмсүүтүн салайааччыта. Олунньу 7 күнэ, 2025 сыл. Дьокуускай к.

«Кыым» сотору тахсыа диэн эрэнэбит! Саха таптаан ааҕар «Кыым» хаһыата бүтүн үйэ историялаах. Онон саха өйө-санаата, национальнай толкуй олохсуйарыгар улахан суолталаах, дьиҥ норуот хаһыата буолбута ыраатта. Дьон-сэргэ тирэхтээх олоххо олус наадыйар кэмигэр хаһыаппыт тахсарыгар үөскээбит уустук дьон айманыытын, долгуйуутун үөскэтэр. «Кыым» бүтүн Саха сиригэр күүтүүлээх ыалдьыт буолан тиийэн, дойдуга буола турар быһыы-майгы туһунан кырдьыктаахтык уонна сэргэхтик билиһиннэрэр позициятын бары сэргиибит. Аан дойду, Арассыыйа, Саха сирин историятын дириҥник эҥсэн сырдатар, дьон-сэргэ санаатын этинэригэр аһаҕас былассаакка буолар хаһыаппыт социальнай, култуурунай дириҥ суолталаах. Ону тэҥэ саха тылын сайыннарыыга, тыл туттуллар эйгэтин кэҥэтиигэ улахан төһүү күүс буолар суолтата эмиэ кэмнэммэт. Саха тылын 125 сылын бэлиэтиир сылга, төрөөбүт тыл күнүн көрсө тахсыбыт маннык өйдөммөт быһыыттан соһуйдубут. Тапталлаах хаһыаппыт тахсыбатаҕа бу общество иһигэр информация тарҕаныытын күөмчүлээһин буолар — өй-санаа ситимэ быстыытыгар холоонноох. «Кыыммытын» дьоҥҥо-сэргэҕэ төнүннэрэр боппуруос сотору быһаарыллыа диэн эрэнэбит! «Ааҕар Саха сирэ»көҥүл түмсүү