Күн кыыһа- Сардаана Барабанова

2000 сыллаахха “Далаһа” сурунаалы тэрийэрбэр Сардаана журфагы бүтэрэн кэриспэндьиэнинэн үлэлээбитэ. Бэйэтин кэмигэр айар ыччаты түмпүт кэрэхсэбиллээх бырайыак этэ. Бүгүн Сардаана Барабанова “Күн оҕолоро” студия салайааччыта. Бу камераларын илиилэригэр ыллылар да Саха сирин хайа баҕарар муннугар ойон тиийэн устан барар тутулуга суох, көҥүл кинематографистар. Быһатын эттэххэ – романтиктар. Инньэ гынан республика элбэх нэһилиэгин киинэлээтилэр. Миэхэ диискэҕэ сүүрбэччэ киинэлэрэ баар. Биһиги “Көмүөл” кинигэ кыһата нэһилиэк туһунан кинигэ оҥорорбут курдук кинилэр документальнай историческай хроника оҥороллор. Кинигэттэн уратыта дьону тыыннаахтыы көрдөрөллөр.

 Кыайыы күнүгэр “Күн оҕолоро” саҥа бырайыактарын көрдөрдүлэр. Сэрии кэмигэр тыылга эрэйи көрбүт кырдьаҕастар ахтыыларын устан баран ону уруһуйунан, анимация оҥорон көрдөрдүлэр. Быһатын эттэххэ мультик. Бэрт интэриэһинэй буолан тахсыбыт. Уруһуйдьуттара, худуоһунньуктара талааннара, профессиональнайдара бэрт эбит. Инникитин норуокка биллэр кыахтаах дьон. Олох Эйзенштейн курдук устубуккут дии, — диибин “күн оҕолоругар” оонньоон. Биллэрин курдук сэбиэскэй кинематогабы төрүттээбит Сергей Эйзенштейн “Броненосец Потемкин” киинэтин хас биирдии кадра – искусство” диэн сыаналаабыттара.

Бүтэһигэр кылгас титр:

Кылаабынай режиссер, салайааччы – Сардаана Барабанова

Сүрүн аниматор – Влад Потапов

Монтаж режиссера – Михаил Эверстов

Худуоһунньуктар – Феодосий Заровняев, Станислав Захаров,

Көмөлөһөөччүлэр – Юлиана Ксенофонтова, Лилиана Ермолаева.