Уран иис маастардара «Сылаас куобах суор5ан» бырайыакка

«Сылаас куобах суор5ан» проект бүттэ. Уран иис маастардара араас улуустартан маастар күнүгэр мустан саха киһитин тыйыс тымныыларга, аччык, сут дьылларга тыыннаах хаалларбыт куобах барахсаңңа сүгүрүйэн үс күңңэ куобах суор5аны тигэн бүтэрдилэр.

Проекка Республикабыт араас муннуктарыттан «Уран иис» түмсүү иистэңньэңнэрэ Дьокуускайтан, Хаңаластан, Сунтаартан, Бүлүүттэн, Үөһээ Бүлүүттэн, Ньурбаттан, Мэңэ Хаңаластан, Амматтан, Кэбээйиттэн түмсэн тигистилэр. Ону таһынан ыраах сирдэртэн Орто Халыматтан, Томпоттон, Верхоянскайтан, Москваттан самолет сыаната ыарахан буолан кыайан кэлбэтэх иистэңньэңнэр куобахтарын булан, тириитин имитэн, таңаска сирийэн ыытан кытыннылар. Бу манна М.К.Аммосов аатынан ХИФУ археология уонна этнография музейа (дир. Л.Л.Алексеева) иистэнэр хос булан биэрэн төһүү күүс буолла. Кулун тутар 3 күнүттэн са5алаан, ким сололоох кэлэн имитэн, сирийэн куобах суор5ан холбонон бүттэ. Куобах суор5ан билигин ХИФУ археология уонна этнография музейыгар Сунтаартан кэлбит «Сунтаар ситимнэрин» иистэңньэңнэрин «Сүктүү» выставкатыгар биир эмиэ мааны экспонатынан турда. Маннык проект бара турарын НВК сонуннарыттан истэн Нам улууһуттан норуот эмчитэ Алексеев Федот Дмитрьевич диэн эдэрчи киһи тиийэн кэлэн эдьиийдэрин- иистэңньэңнэри хомус тыаһынан до5уһуоллаан, эттэрин сииннэрин алгыстаах дэйбииринэн ырааһырдан, сылааларын таһаарар алгыс этэн иистэңньэңнэри үөрдэн барда. Бу «Куобах суор5ан» проект «Уран Иис» түмсүү иистэңньэңнэрин өбүгэ үгэһин тилиннэрэр, биир сыалга түмэр, кинилэри сомо5олуур анал проект буолар.