Сайа: Тииһин-уоһун көрдөрбөккө ньимийэн сылдьан баран, саха дьонун сэнээтэ…

КӨМҮСКЭЭТЭХПИТИНЭ САТАНАР
Геннадий Зюгановпыт өссө да баар эбит дии. Орулуур отуттан тахса сыл Госдумаҕа бэрт сылаастык-сымнаҕастык оннун булан олохсуйан олорон Ленинградтан саҕалаан үлүгэрдээх куораттар, болуоссаттар ааттара уларыйыыларыгар, пааматынньыктар сууллууларыгар, сэбиэскэй кэм бэлиэлэрэ туора сотуллууларыгар тииһин-уоһун көрдөрбөккө ньимийэн сылдьан баран, Дьокуускай куорат саҥардыллыбыт болуоссата ааттаныытыгар суостаах болҕомтотун уурда. Кыайарын-хоторун дьэ булбуттуу тутунна. Кини көннөрү утарарын туһунан эппэтэ ээ: Өрөспүүбүлүкэ Баһылыгын солотуттан үүрэргэ, киниэхэ ыар буруйу сүктэрэргэ тиийэ үүнэ-тэһиинэ суох тылласта, “историяны билбэт” саха дьонун таарыйа сэнээтэ. Мин бу суоһурҕаныыга Саха Өрөспүүбүлүкэтин тэрийбит чулуу уолаттарбытын суорума суоллаабыт хара балыыр, ыар буруй ыстатыйатын дорҕоонун истэммин этим тарта, сүрэҕим долгуйда.
ХХ үйэ саҕаланыытыгар Арассыыйаҕа ыраахтааҕы былааһа бөҕө туруктаах этэ, ол саҕана аҕыйах сылынан улуу империя үрдүнэн “силлиэлээх холорук” туруо диэн түһээн баттаппат этилэр. Ыраахтааҕылаах тутул ол курдук бэйэтигэр энчирээбэт эрэллээх буолан, бастакы аан дойду сэриитин биир сүрүн кыттыылааҕа буолбута уонна бу сэрииттэн саамай улахан охсууну ылан, сууллубута. Ыраахтааҕы дьиэ кэргэнин кытта суута-сокуона суох ытыллыбыта. Дойду үрдүнэн гражданскай сэрии ытылҕана турбута. Ким бэйэтин көмүскэнээри, ким былааска, баайга тиксээри, ким үрдүк ыра санаа туһугар саа-саадах туппута. Ленин салайааччылаах былааска кэлбит коммунист партията тутулуга суох буолары туруулаһан эрэр бары норуоттарга тэҥ бырааптаах Өрөспүүбүлүкэлэр Сойуустарын эрэннэрэр дьаһал таһааран эрэ өрө турууну тохтоппута, бу норуоттары бэйэтин диэки тарпыта. Ол да иһин саха өрө турааччылара “эһиги буолбатах, эһиги бэлиитикэҕит биһигини кыайда…” диэн сэптэрин-сэбиргэллэрин ууран биэрбиттэрэ.
Сэбиэскэй былаас олохтоноотун кытта төһөлөөх нуучча да, атын да омуктар историяларын бичигэр киирбит ааттар уларыйбыттарай?! Тыһыынчанан, сүүһүнэн сылларга иҥэн турбут ааттары аҥар кырыытыттан революционердар, партийнай диэйэтэллэр ааттарынан солбуйбут кэмнэрин туоһулара буолабыт, билигин да ол уулуссаларга олоробут.
Саҥа кэм, саҥа тутул историяҕа бигэргэммит сорох ааттары төннөртөөтө, ол иһигэр Саха сиригэр Хаҥалас, Таатта улуустара диэн баар буолбуттарын ама, ким сириэй? Киин болуоссаппыт икки аҥы араарыллан, биирэ – Ленин аатынан, биирэ Өрөспүүбүлүкэ болуоссата буолара саамай сөптөөх быһаарыы. Общественнай истиилэри ол туһугар өссө киэҥник тэрийдэхтэринэ норуот өйүүр саҥата күүстээх буолуоҕар саарбахтаабаппын. Оттон Ленин аата хаалара эмиэ сөптөөх – историябытын мэлдьэһэр табыллыбат.
Онуоха диэри Геннадий Зюганов Грознайга Ленин проспега Ахмат Кадыров аатынан буолбутун, Махачкалаҕа Ленин проспега Расул Гамзатов аатын сүкпүтүн уларытарга ылыстын, суостаах сутуругун бу Өрөспүүбүлүкэлэр салалталарыгар көрдөрдүн. Ааспыт үйэҕэ репрессия хас да долгунун тыйыс охсуутун билбит саха омук бэйэбитин уонна салалтабытын көмүскээтэхпитинэ сатанар.

Зюганов сравнил главу Якутии с нацистами и пригрозил требованием отставки. Читайте здесь

Депутат Госдумы выступил против переименования площади Ленина в Якутске

За Ленина! Коммунисты Якутии уже ночью начали протестные действия

Реском КПРФ призывает всех якутян встать на защиту своей истории

Главный архитектор Якутска: Ленина не переименуем, новые пространства создадим