СААСКЫ ФЕСТ — тыа сирин олохтоохторугар!

ТААТТА улууhугар»СААСКЫ ФЕСТ-2025″ фестиваль буолан ааста. Бу үгэс буолбут тэрээһин быйыл саас киин куоракка буолбакка, тыа сиригэр олорор дьоҥҥо-сэргэҕэ чугаһаан Саха сирин улуустарынан буолла. Тэрээһин «Көмүлүөк» хампаанньа тэриллибитэ 20 сылыгар ананна. Кулун тутарга «Көмүлүөк» «Туой-арт» мастарскыайын күөсчүттэрэ Бүлүү бөлөх улуустарыгар, Горнайга сылдьыбыттара. Онтон ааспыт өрөбүл күннэригэр Тааттаҕа Ытык-Күөлгэ саха тапталлаах ырыаһыта Сиэйэ Уола- Айыллыата Дьырылыаты кытта тахсан дьон-сэргэ  сүргэлэрин көтөхтүлэр, улаханнык сэргэхситтилэр.

«Сааскы фест» чэрчитинэн туойтан оҥорорго үөрэтэр маастар-кылаастары тэрийдилэр, саха күнээҕигэ туттар таас, туой иһитин-хомуоһун, алтан симэҕи, саха таҥаһын, дьиэҕэ-уокка туттар малы » Көмүлүөк. 20 сыл бииргэ» диэн дьаарбаҥкаҕа таһаардылар, атах тэпсэн олорон саха материальнай куултуратын, креативнай экономикатын инникитин туһунан санааларын үллэһиннилэр.

Онтон киэһэ Таатта бастыҥ түһүлгэтин сыанатыгар Сиэйэ Уола дьонун-сэргэтин иннигэр саҥа айар аатын Айыллыата Дьырылыаты сүрэхтээтэ, бастыҥ ырыаларын бэлэх уунна. 

Дизайнердар Арылы Сандаар, Андрей Зыков айбыт » Сандаар» диэн саха аныгы таҥаһын уонна » Аар Алтан» алтантан симэҕин Таатта кэрэ куолара таҥнан-симэнэн көрдөрдүлэр. 

Дьон өргө дылы Айыллыата Дьырылыаты сыанаттан ыыппакка  ытыс тыаһын ньиргиэригэр уйдардылар, кэрэхсииллэрин күүскэ биллэрдилэр. 

Иккис күнүгэр » Көмүлүөк» хампаанньа маастардара Баайаҕа ытык сиригэр баран Мандар уус кыһатыгар, музейыгар сырыттылар, ытык кырдьаҕас уҥа илиитэ, нэһилиэк бас-көс киһитэ Николай Иванович Егоровы — Баайаҕыыны кытта көрүстүлэр, бу манна мунньуллубут кэрэни, бөҕө ис турук уонна күүстээх санаа үйэлээх баайын-дуолун көрөн кэрэхсээтилэр, сөхтүлэр-махтайдылар, алгыс ыллылар. Онтон бу өрөбүлгэ » Сааскы фест» Мэҥэ-Хаҥаласка, Майа5а буолуоҕа.