Норуот эмчиттэрэ сымыйа ааты-суолу сырсымаҥ

Олох оҥкулларын, очурдарын, омсолорун уонна ол—бу араас көнө да, тиэрэ да көстүүлэр тустарынан оччугуйдук аҕыйах тылы этиэм

5. Норуот эмчиттэрэ сымыйа ааты-суолу сырсымаҥ

Россияҕа араас харчы киллэринэр коммерческай кооперативтар элбэхтэр. Кинилэр дьиҥ иһэ олус аҕыйах киһилээх буолаллар. Ол гынан баран сүүнэ корпорация да курдук этиниэхтэрин, кэпсэниэхтэрин сөп. Балар биир-икки күн үөрэппитэ буола түһэ-түһэлэр, туох да киһи сатаан эппэт ааттарын, званиеларын дьоҥҥо иҥэрэллэр. Холобур, «Лучший целитель третьего тысячелетия», «Целитель мира», «Лучший целитель России последнего десятилетия» уо.д.а. ааттаах сертификаттары, мэтээллэри бу үөрэппитэ буолбут дьонугар атыылыыллар. Дьэ, ол ким кээмэйдээбитэй, чуолкайдаабытай, Россия, Аан дойду бастыҥ эмчитэ кимин?! Хайдахтаах акаары буолуохха сөбүй, «Лучший целитель третьего тысячелетия» диэн мэтээли, сертификаты ыларга?!! Аны 1000 сылынан ханнык туох эмчиттэр баар буолуохтарын билэн?! Россияҕа оннук мэтээли, сертификаты атыыласпыт хас киһи баарый?! Арааһа, элбэх киһи итинник мэтээллээх буолуохтаах. Биир, уруккута механизатор киһи, биир улахан чымадаан итинник араас сертификаттааҕын, элбэх мэтээллээҕин билэбин. Биир ньиэрбэтэ улаханнык алларыйбыт, миэхэ эмтэммит дьахтар «Лучший целитель мира» диэн сертификаттааҕын өйдүүбүн. Бу норуот эмтээһинигэр үөрэтии буолбатах, бу дьиҥнээх албыҥҥа олоҕурбут бизнес буолар. Ону өйдөөн, итинник сертификаты, мэтээли ылбыт дьон, өйдөөх өттүлэрэ Сахаларын сиригэр кэлээт, кистээн кэбиһэллэр уонна саҥарбаттар. Итинник чааһынай кооперативтартан элбэх евролаах, доллардаах буоллаххына, Петр I орденын да, И.П. Павлов мэтээлин да атыылаһыахха сөп. Ити сымыйа орден уонна мэтээл буолаллар. Петр I орденын дьиҥнээҕин, холобур, государство эрэ туттарар бырааптаах. Онон бу эйгэ силиһэ-утаҕа холуобунай эйгэҕэ кэлэр. Саха сиригэр араас итинник орденнаах, мэтээллээх дьон үгүстэр.

Сорох норуот эмчиттэрэ, дьэ, манан реклама оҥостон ахан эрэллэр. Ону хамаҕа бэйэлээхтик, эмиэ сорох дииргэ тиийэбит, суруналыыстарбыт араас вердикт курдук быһаарыылары биэрэ-биэрэ суруйан имитэн иһэллэр. Арааһа, эмтээһини наһаа билэр дьон быһыылаах. Оттон кэпсэтиилэриттэн өйдөөтөххө, көрдөххө оннук үрдүк таһым көстүбэт.

Оҕоҕо Ийэ куту иҥэрэбит дэһэллэр. Оҕо Ийэ кутун үөһэ биир Таҥарабыт Ахтар Айыыһыт Үрдүкү Таҥарабытыттан Үрүҥ Аар Тойонтон ылан, эр киһиэхэ уу дьулайынан иҥэрэр. Оттон бу сиик тыыннаах, симэһин хааннаах, буордаах уллуҥахтаах, илдьирийэр эттээх, эт мэйиилээх, үөһээ үргүөрү тулуйбат, аллараа аргыары анааран кыайбат, босхо бастаах бороҥ урааҥхай, орто илбииһит, оҕо Ийэ кутун, хантан уонна кимтэн ылан, хайдах иҥэрэрий?! Аны Таҥара буола сатааһын сатыылаан эрэр дуу?!

Мин саха уһулуччулаах эмчитэ, бокуонньук, А.И. Герасимовтан биирдэ маннык ыйыппытым: «Эн тоҕо соҕуруу баран, биир эмэ кууруска үөрэнэн, докумуон, мэтээл ылан кэлбэккиний?» – диэн. Онуоха киһим курус баҕайытык сонньуйан баран эппитэ: «Мин соҕуруу баран, аҕыйах хонуктаах миэхэ туһата суох кэпсэли истэн баран, сымыйа мэтээл ылан кэлэн, тугу туһанабын?! Ол мэтээллэрин үксүн көрөттөөбүтүм. Ол-бу мэтээллэри ылбытым мин эмтиир таһыммын үрдэппэт. Хас биирдии эмчит эмтиир таһыма Үөһээ Дойдуга суруллан, оҥоһуллан турар. Итинник аат-суол сырсыыта кыра уонна сымыйа эмчиттэргэ наада ини. Эн биһикки итинник сүүрэрбит наадата суох буолуохтаах. Тохтуу түһэн баран, эн этэр Аан дойдутааҕы Ассоциацияҕар киириэҕим, онон бүтэр». Дьэ, чахчы үчүгэй эппиэт.

Саха эмчиттэрэ, сахалыы эмтээһиҥҥитин сирийэн, дириҥник үөрэтиҥ. Оттон кыахтаах буоллаххытына, Аан дойдутааҕы Ассоциацияларга киирэн, дьарыктаныҥ. Холобур, Аан дойдутааҕы профессиональнай гипнотизердар Ассоциацияларыгар кыайан киирдэххитинэ А. Король, В. Кандыба, А. Кашпировскай, А. Игнатенко, Т. Журавленко, В. Синицкэй, А. Озиги уо.д.а. курдук улуу дьону кытта бииргэ дьарыктаныаххыт. Киирии бэрэбиэркэтэ чахчы ыарахан.

Онон сымыйа ааты-суолу сырсымаҥ, норуоккутун бутуйумаҥ.

Источник:«Аар Айыылыы эмтээһин», В.А. Кондаков. Дьокуускай. 2008. 162-164 с. СӨ Аар Айыы итэҕэлин тэрилтэтэ.

Аар Айыы итэҕэлин туһунан

Ойууннааһын туһунан

Үрүҥ Аар Тойонтон тоҕо куттаналларый?

Киһи-аймах наһаа түргэнник уларыйан иһэрэ олус биллэр буолла