Оо, таптал, таптал… Улуу иэйии

Ханнык да үйэҕэ таптал саамай үрдүк чыпчаалга турар, олоҕу киэргэтэр, суолталыыр уонна күүс биэрэр улуу иэйии буолар. Таптал туһунан айымньылар хас биир суруйааччыга баар диэтэхпитинэ, букатын да сыыспаппыт буолуо. Кинигэлэргэ, хоһооннорго, кэпсээннэргэ таптал араас өрүтүн арыйан хоһуйаллар. 

Ааспыт өрөбүллэргэ «Оо, таптал» диэн кинигэбит ааптардарын кытта сүрэҕи долгутар, уйан дууһаны таарыйар сэргэх көрсүһүү уонна автограф-сиэссийэ буолан ааста.

Бу күн таптал араас өрүтүн арыйар айымньылар тула ирэ-хоро кэпсэттибит. Ааптардарбыт Нина Дьячковская, Надежда Логлоҕор, Евдокия Иринцеева-Огдо, Сардаана Корякина-Сардаана, Надежда Егорова-Намылы ааҕааччыларга айымньыларын туһунан аһаҕастык кэпсээтилэр, ыйытыыларга хоруйдаатылар.

Ону таһынан, кылгас сэргэх викторина буолан ааста, кэлбит дьон уонна ааптардар бэйэлэрэ кинигэ сүүйүүлээх бардылар.

«Оо, таптал» кинигэ амарах сүрэҕи долгутар, уйан дууһаны таарыйар айымньылар ааҕааччыга таптал араас өрүтүн арыйыахтара: сороххо бу истиҥ иэйии дьолу бэлэхтиэ, сороххо эрэйи кэккэлэтиэ. Ол гынан баран, дьиҥнээх ыраас таптал хаһан да умнуллубат аналлааҕын, киһи олоҕун устата сырдыгынан эрэ сыдьаайарын итэҕэтиилээхтик сэһэргиэхтэрэ. Бу кинигэни «Айар» бары маҕаһыыннарыттан ылан ааҕыаххытын сөп.

Реклама. АО НИК “АЙАР”, ИНН 1435328670

Erid: 2VtzqwcFf75