Ньырбакаан үс улууһу үөскэппитэ, түөрт ууһу төлкөлөөбүтэ

Дмитрий Николаевич Пономарев-Дьолуолаах «Ньырбакаан» арамаанын биһирэмэ

Сэтинньи 20 күнүгэр СӨ Национальнай бибилэтиэкэтин устуоруйа саалатыгар Дмитрий Николаевич Пономарев-Дьолуолаах ааспыт үйэни тилиннэрэр «Ньырбакаан» арамаанын биһирэмэ үрдүк таһымнаахтык ыытылынна. 

Бибилэтиэкэ саалатыгар дьон толору мустубута айымньы сүдү суолталааҕын бигэргэттэ. Тэрээһин иннинэ автограф-сиэссийэ ыытыллан, кэлбит ыалдьыттар ааптарга илии баттатан астыннылар. 

Тэрээһини «Айар» кыһа генеральнай дириэктэрэ Август Егоров киирии тылынан аста. Кини бу арамаан аныгы литэрэтиирэ биир бастыҥ айымньыта буоларын бэлиэтээтэ. Биһирэмҥэ Ил Түмэн сис кэмитиэтин бэрэссэдээтэлэ Владимир Прокопьев, Ил Дархан сүбэһитэ, СӨ үтүөлээх юриһа Игорь Николаев, философия билимин дуоктара Андрей Саввинов, педагогика билимин дуоктара Евдокия Поликарпова, СӨ норуодунай суруйааччыта Наталья Михалева-Сайа, «Күрүлгэн» литературнай сурунаал бас эрэдээктэрэ, суруйааччы Афанасий Гуринов-Арчылан уонна да атын суруйааччылар, Ньурбаттан, Хаҥаластан, Мэҥэ Хаҥаластан ыалдьыттар, ааптар аймахтара, доҕотторо-атастара, айар үлэтигэр сүгүрүйээччилэр кэлэн, арамаан туһунан санааларын үллэһиннилэр. 

Устуоруйа чахчыларыгар олоҕурбут, ньурбалар төрүттэрэ буолбут Ньырбакаан туһунан арамаан хас биирдии саха ыалын долбуурун биир сүдү кинигэтинэн буолуо диэн эрэнэбит. 

Кэлбит дьоҥҥо барҕа махталбытын тиэрдэбит!

«Ньырбакаан» арамаан – дириҥ ис хоһоонноох устуоруйа. Бу арамаан туматтартан кыргыллыбыт, тыыннаах хаалан, туос тыыга олорон куоппут ньырбакааттарбыт аҕа ууһуттан соҕотох ордубут кыыс оҕо, кэлин Тыгын Дархан айбыт аҕата Мунньан Дархан ойоҕо буолбут Ньырбакаан олоҕун сырдатар. Кини үс улууһу үөскэппитэ, түөрт ууһу төлкөлөөбүтэ диэн устуоруйа чахчыларыгар олоҕурбут, олус кэрэхсэбиллээх айымньы! 

Билигин кинигэ «Айар» кыһа маҕаһыыннарынан аҕыйах эрэ устуука хаалла! Сыаната — 750 солкуобай.