Дьокуускай куорат күнүгэр Оһуохай дуорайда!

      Биллэрбиппит курдук, балаҕан ыйын 13 күнүгэр, Доҕордоһуу болуоссатыгар Дьокуускай куораппыт 393 сааһынан Оһуохай түһүлгэтэ тэрилиннэ.

      Түһүлгэни иилээн — саҕалаан ыыппыт Дархан этээччи Марта Николаева:  

     — Куорат күнүн көрсө Доҕордоһуу болуоссатыгар куорат 393 сылыгар аналлаах Оһуохай түһүлгэтэ үрдүк таһымнаахтык ыытылынна. 

      Оруобуна 1 чаастан саҕаланна уонна киэһээ 6 чааска бүттэ. Куорат күнүгэр Дьокуускай этээччилэрин сэргэ Сунтаартан Дархан этээччилэр Лилия Дмиөриевна Михайлова уонна Мэҥэ — Хаҥаластан  Дархан этээччи Станислав Иванов, Уус — Алдантан үтүөлээх этээччи Уйбаан Бурцев уонна да атын атыттар үҥкүү тылын дуораттылар. Үөрэрбит диэн эдэр оҕолор эмиэ кэлэн этэр буоллулар, ол курдук бүгүн Куорат 2 -с  нүөмэрдээх оскуолатын үөрэнээччилэрэ Ольга Мухоплева уонна Уля Егорова кыттыыны ыллылар. 

     Хас биирдии түһүлгэ этээччитэ элбэх дьону хапта, куорат олохтоохторун түмтэ. Дьоллоох Дьокуускай куораппыт сайда турарыгар алҕаатылар. Кэлбит дьон Оһуохай түмсүү кыттааччыларыгар уонна кини салайааччытыгар Александр Джурович Данилов улахан тэрээһини үрдүк таһымнаахтык ыыппыттарыгар махтаннылар!