Михаил Коколов оҥорбут үтүөтэ үйэлэргэ умнуллуо суоҕа…

Ытыктыыр күндү киһибит, Аҕа дойду Улуу сэриитин ветерана, Саха Өрөспүүбүлүкэтин тыатын хаһаайыстыбатын Үтүөлээх үлэһитэ Михаил Иннокентьевич Коколов биһиги кэккэбититтэн букатыннаахтык туораабытынан аймахтарыгар, чугас дьонноругар, Сунтаар улууһун олохтоохторугар дириҥ кутурҕаммытын тириэрдэбит.

Михаил Иннокентьевич “Полярная звезда” орден кавалера, өр сылларга таһаарыылаах үлэтэ элбэх правительственнай наҕараадаларынан​ бэлиэтэммитэ. Кини Сунтаар улууһун Кириэстээх, Тойбохой​ нэһилиэктэрин Бочуоттаах олохтооҕо.

Өрөспүүбүлүкэҕэ биир бастакынан тыа хаһаайыстыбатын саҥалыы сайыннарыыга туруммута, туох баар күүһүн-күдэҕин тыа сиригэр олох тупсарын туһугар бэйэтин бэриниилээх, таһаарыылаах үлэтинэн дьону-сэргэни элбэх ситиһиилэргэ угуйбута.

Кини үтүө-мааны майгыта, дьоҥҥо истиҥ, сайаҕас сыһыана, олоххо дьулуура эдэр көлүөнэ ыччакка холобур буола туруоҕа.

Михаил Иннокентьевич Коколов төрөөбүт улууһугар, республикатыгар оҥорбут үтүөтэ үйэлэргэ умнуллуо суоҕа.

Саха Өрөспүүбүлүкэтин бастакы президиэнэ Михаил Ефимович Николаев, Саха Өрөспүүбүлүкэтин Норуот хаһаайыстыбатын Үтүөлээх үлэһитэ Климент Егорович Иванов, Саха Өрөспүүбүлүкэтин Ил Түмэн дьокутаата Матвей Николаевич Евсеев.