Кыайыы Оһуохайыгар маанылаах ыалдьыттар буолуҥ

ТУЙМААДА ЫҺЫАҔА – 2025 с.

«КЫАЙЫЫ ОҺУОХАЙА»

    Эн үрдүк ааккын анаан – минээн, ааттаан – суоллаан туран, истиҥ илдьиппитин  ыытабыт.  Улуу Кыайыы 80  Өрөгөйдөөх сылыгар бэс ыйын 28 – 29  күннэригэр самаан сайын сатыылаан, итии – куйаас түһэн, үөһээ үрдүк Айыылардыын алтыһар, кэрэ – бэлиэ кэммитигэр Дьокуускай куорат дьоллоох – саргылаах туонатыгар, Үс Хатыҥ миэстэтигэр Улуу Туймаада Ыһыаҕа ыһылларын туһунан дьоһун сураҕы, иһиттэргин да, иһитиннэрдэҕим буоллун.

Айыыһыттыын аргыстаһан, Иэйиэхситтиин эҥэрдэһэн, төрүт үгэһи сөргүтүһэ, көрү – нары көҕүлэһэ, куту – сүрү күүһүрдэ, Тойон Сэргэбит тула төрдүс нүөмэрдээх түһүлгэбитигэр алгыстаах “Кыайыы Оһуохайыгар” маанылаах ыалдьыта буолуоҥ диэн ыҥырабыт.

    Оһуохай диэн  сахалар биир былыргы сиэрдэрэ-туомнара, кинилэр күн-дьыл эргиирин үгэстэрин, самаан сайын сатыылаан турдаҕына, күн саамай уһаан турар кэмигэр толорор Алгыстара — күҥҥэ сүгүрүйүү, күнү көрсүү туомуттан төрүттэнэн кэлбит ытык сиэр.

    Оһуокай Үс улуу идэни түмпүт көстүү- Тылы, Үҥкүүнү, Ырыаны. Тыл абылаҥын, тыл кэрэтин, хоһоонньут киһи Оһуокай этээччи дэнэр. Билиҥҥи кэмҥэ төрүт тылбытын харыстаан, саха тылын сүмэһинин Оһуокай нөҥүө ыччакка тиэрдэбит, эппит тылбытын иччилиэ, экчи ылыныа диэн эрэли кытта Саха республикатын Оһуохай түмсүүтүн баһылыга Александр Джурович Данилов – Дьулуур Хаан.  

Ыытыллар кэмэ, миэстэтэ: Дьокуускай куорат — Үс Хатыҥ 4 – с нүөмэрдээх Оһуокай түһүлгэтэ.

Бастакы күн — Бэс ыйын 28 күнүгэр, күнүс икки чаастан Дьокуускай куорат, Үс Хатыҥ, төрдүс нүөмэрдээх “Оһуокай” түһүлгэтигэр буолар  (Киин түһүлгэ аттыгар турар).  

Иккис күн – Бэс ыйын 29 күнүгэр, түмүктүүр чааһа, Дьокуускай куорат, Үс Хатыҥ,  төрдүс нүөмэрдээх “Оһуокай”  түһүлгэтигэр,  11 чаастан күнүс 15.00 чааска дылы буолар, ону тэҥэ 4 – с түһүлгэҕэ “Көҥүл оһуохай” буолар.

Кыттааччыларга быһаарыы күрэс хайдах буоларын:

    — Кыттааччылар ирдэбиллэрэ 17 саастарыттан үөһээ

   — Сайаапкаҕытын бу ссылканнан киирэн түһэрэҕит — https://docs.google.com/forms/d/1b4f1ikB12A1lHhjUi0TtQMDvU6v5_TgnfIhSwkyw-dM/edit

    — Кыттааччы сайаапкатыгар ирдэнэр –  толору аата суола, паспорын нүөмэрэ прописката, паспорын хаһан хантан ылбыта уонна төлөпүөнүн нүөмэрэ, ИНН нүөмэрэ.    

     — Сэрэбиэй күрэхтэһии саҕаланыан иннинэ эрэ ыытыллар. Ол кэннэ, сэрэбиэйи тардыбатах этээччи кыттыбат.

      — Этээччи кынат дьонун бэйэтэ булан, түһүлгэ саҕаланар бириэмэтигэр бэлэм буолуохтаах. Ыҥырыллыбыт кэмигэр кэлбэтэҕинэ күрэхтэһииттэн уһуллар.

— Этээччи этэр бириэмэтин, тиэмэтин дьүүллүүр сүбэ миэстэтигэр быһаарар.

— Этээччилэр бириэмэлэригэр эттилэр даҕаны баран хаалбакка, атын этээччини өйөөннөр кынат буолан кытталлара учуоттанар.

-Уус-уран тыла – өһө, ис хоһооно, түһүлгэни тутуу, куолас, таҥас, хамсаныы  сыаналааһына дьүүллүүр сүбэ балаһыанньатынан барар.

    Кыайыыны быһаарар ирдэбиллэр:

— Этээччи хоһуйуутун ис хоһооно, уус – уран тыла, амарах алгыс тыла, үтүө дьайыылаах хоһооно.

— Этээччи куолаһа чуора-кэрэтэ, түһүлгэни тутара, сахалыы таҥаһа-саба, сиэри-туому тутуһуута, хамсаныыта.

— Оһуокай түһүмэхтэрин тутуһуу (туойан саҕалааһына, хаамтарыыта, көтүтүүтэ, налытыыта)

— Саха Түөлбэ оһуокайдарын билсии, үөрэтии, көҕүлээһин.

— Бэриллибит тиэмэтин тутуһуута

        Дьүүллүүр сүбэ чилиэттэрэ этээччилэри миэстэтигэр көрөн, истэн сыаналыахтара баал туруоруохтара, бастыҥ этээччилэри талыахтара.

Билсэр телефоннаргыт: 89142385487 – Тарский А.Л.

                                 89141056326 – Макарова В.З.

Сахабыт сирин олохтоохторо,  дьоно-сэргэтэ!

Өрөспүүбүлүкэбитин уруйдуур – айхаллыыр, алҕыыр тыллаах Оһуокайга кэлэҥҥит кынат буолан кыттыҥ, доҕор буолан холбоһуҥ!!! Кэлиҥ!! Кыттыҥ!! Дьоҥҥутун өйөөн!! Өбүгэлэрбит төрүт үгэстэрин быстыспат ситимин үйэлэргэ ааттатыҥ!!

 Саха сирин Оһуокайын Түмсүүтэ

   Ыһыахха куорат тэрилтэлэрин түһүлгэтин тэрийээччилэрин ыҥырыыларынан Оһуокай Түмсүү этээччилэрэ кэлэн, оһуокай этиэхтэрин сөп. Ону түһүлгэ тэрийээччилэрэ эрдэттэн Оһуокай Түмсүүгэ (89142385487, 421155 төл.)  сайаапка түһэриэххитин наада.