«Кимиэхэ да этимэ…»: Бу кинигэ тахсарын хаста да бобон турардаахтар

Бу кинигэ тахсарын хаста да бобон турардаахтар. Тоҕо диэтэххэ бу айымньыга цензураны ааспат ыар сидьиҥ быһыы ойууланар. Ол эрэн, ыам ыйын 21 күнүгэр, сайыҥҥылыы ыраас саймаархай күҥҥэ бу кинигэ сүрэхтэннэ!

Ыарахан быһыыга-майгыга түбэспит кыысчаан, кинигэ дьоруойун прототиба, билигин эдэр дьахтар, бу күн курдук сырдык олохтонуоҕар эрэнэн туран тэрээһиммит «Арчы дьиэтигэр» үрдүк таһымнаахтык ааста. Кинигэ сүрэхтэниитин суруйааччы Евдокия Семеновна Иринцеева-Огдо иилээн-саҕалаан ыытта. Бу киэһэ ааптар Сардаана Корякина доҕотторо, кыһа салайааччылара, эрэдээктэрдэр, суруйааччылар эҕэрдэ, биһирэм тылларын эттилэр, сибэкки дьөрбөтүн, бэлэхтэрин туттардылар.

«Кимиэхэ да этимэ» диэн кинигэ эдэр ааптар Сардаана Корякина иккис кинигэтэ буолар. «Күтүөккэ хомолто» диэн бастакы кинигэтэ дьон болҕомтотун тардан хамаҕатык тарҕаммыта. Оттон бу кинигэ өссө түргэнник, икки ый иһигэр 3/2, атыыланан бүтэн эрэр.

Олус интэриэһинэй сэһэн диэҕи киһи тыла тахсыбат, ол эрээри кылгас кэм иһигэр биир тыынынан ааҕыллар, дьиҥнээх буолбукка олоҕурбут айымньы. Орто саастаах дьахтар оҕо эрдэҕиттэн ыарахан олоҕун, төһө да ол кэм ааспыта ырааппытын иһин, ыар сүгэһэртэн кута-сүрэ уоскуйбатын, ааспыт олоҕун аһыы амтана, түүлүгэр баттатан, өссө да куолайыгар биллэрин туһунан аһаҕастык кэпсиир, өр сылларга кистии сылдьыбыт олоҕун саамай улахан кистэлэҥин арыйар. Бу айымньы ийэлэргэ, дьоҥҥо-сэргэҕэ «оҕолоргутун харыстааҥ, чугас дьоҥҥутугар, оҕолоргутугар болҕомтолоох буолуҥ» диэн сэрэтэр, харыстыыр санаалаах күн сирин көрдө.

Ааптарга Сардаана Корякинаҕа айар үлэтигэр үрдүк ситиһиилэри баҕарабыт уонна өссө саҥа айымньылары күүтэбит!

Норуодунай бэйиэт бэйэтин кинигэлэрин бибилэтиэкэ пуондугар  туттарда