Аар Айыылар алгыстара Саха араадьыйатын эпииригэр
(Саха сирин араадьыйатын 95 сылыгар)
Араадьыйа. Аан дойду араас үтүө-мөкү сонунун-нуомаһын истэр-билэр тэрилбит, олохпут аргыһа. Олох-дьаһах өрөгөйдөөх-үөрүүлээх, кыайыылаах-хотуулаах, хомолтолоох, санньыардаах да түгэннэрин Сахабыт сирин бары муннугар тиийэ дьиэ аайы күнү өрөөбөккө сэһэргии, кэпсии-ипсии турдаҕа. Хас биирдии киһи сэргээн умнубакка истэр биэриилэрдээх. Эндэппэккэ билэр куоластаах, сөбүлээн истэр суруналыыстаах. Ол, арааһа, кини кэпсиир сырдатар тематыттан, сэһэргэһэр киһититтэн тутулуктааҕа дуу? Элбэх истээччи эндэппэккэ билэр, күүтэр, итэҕэтиилээхтик субу утары көрөн атах тэпсэн олорон кэпсэтэр курдук араадьыйа диктордарыттан икки тус билэр, сирэй көрөн кэпсэппит дьонун туһунан кылгастык кэпсээтэххэ.
2006-2007 сс. араадьыйа биэриилэрин дириэктэрэ Тарасов Тарас Лукич дьаһалынан » Киһи-аймах уонна ийэ айылҕа», » Итэҕэл — киһи-айылҕа уонна олох» диэн биэриилэргэ уһулуччулаах эмчити, норуот үгэстэрин, итэҕэлин, ойууннааһыны улахан чинчийээччини Владимир Алексеевич Кондакову кытта сэһэргэһии тэриллибит. Бастакы биэриилэри Анастасия Атласова ыыппыт. Суруналыыс Валентина Петрова Владимир Кондакову аан бастаан » Омурҕаҥҥа» биэриигэ студияҕа кэпсэппит. » Кыараҕас, киһи тыына-быара ыгыллар ыарахан салгыннаах миэстэ эбит» диэн 2008 сылтан » Аар Айыылар Алгыстарынан» авторскай биэриини В.А. Кондаков үлэлиир дьиэтигэр устан бэлэмниир буолбуттар. Владимир Алексеевич ити биэриигэ дьон-сэргэ сахалыы эмтээһин үгүс сүрүн ыарыылары эмтиир кыахтааҕын биллин, эрэннин диэн санааттан ылсыбыт буолуохтаах. Биэрии күүтүүлээх буоларыгар Валентина Петрова наҕыл, намыын куолаһа, суруналыыс быһыытынан сатабыла, кини сэргэх сэһэнин истэ үөрүйэх дьон чөрбөйө түһэрэ эмиэ көмөлөстөҕө. Владимир Алексеевич «Сарсын Валентина кэлэр» диэн эрдэттэн сэрэтэрэ, бэлэмнэнэрэ, үлэтин онно дьүөрэлээн сааһылыыра. Эбиэт кэннэ икки-үс чаас устата үлэлииллэрэ. Владимир Алексеевич ыарыы төрүөтүн быһааран, хайдах эмтэнэри сүбэлээн баран, истээччилэргэ анаан Үрдүк Айыыларга эмтиир Алгыс ыытара. Ол курдук тахсан, табыллан үлэлээн, балтараа сыл устата бары сүрүн ыарыылары эмтиир Алгыстар уһуллубуттара. Бу биэриилэр араадьыйа кыһыл көмүс фондатыгар харалла сытар буолуохтаахтар. Улахан эйгэлээх, аптаах-хомуһуннаах Айыы ойуунун абыраллаах эмтиир-томтуур, Куту-Сүрү бөҕөргөтөр алгыстара хайа да кэмҥэ дьоҥҥо-сэргэҕэ туһалыы туруохтара. Валентина Дмитриевна Улахан киһини кытта алтыһан үлэлээбитин үтүөтүк саныыр, олоххо-дьаһахха, үлэҕэ-хамнаска да элбэҕи саҥалыы көрөргө көмөлөспүтэ диэн махтанар.
Араадьыйаҕа сыһыаннаах В.А.Кондаковтуун билсибит, өр сылларга үлэлэспит Саха театрын артыыһа Кирилл Семенов биир эмиэ дьон-сэргэ кэтэһэр, сөбүлээн истэр » Ахтан-санаан ааһыаҕыҥ», «Литературнай ааҕыылар» биэриилэр диктордара. Кини 2002-2008 сылга диэри Владимир Алексеевич улахан үлэлэрин бэчээттээбитэ. Ордук «Аар Айыы итэҕэлэ» үлэ биэс чааһын барытын, «Аар Айыылыы эмтээһинтэн» , » Хоһооннорум — хомуйбут санааларым, ырыаларым — ыраас дьиппиэ тылларым» кинигэлэргэ кыттыгастааҕынан киэн туттар. Сүдү киһини кытта алтыһыы саха түҥ былыргы итэҕэлин дириҥ киэҥ билиитин өйдүүргэ, сүрэхпинэн дууһабынан ылынарга улахан сабыдыаллаах диэн билинэр.
Араадьыйа үлэтэ күнтэн күн кэми кытта тэҥҥэ хардыылаан сайда турдун. Өссө да эдэр-эмэн болҕомтотун тардар, үөрдэр-көтүтэр, уйадытар биэриилэр үксүү турдуннар!
+7 (999) 174-67-82
