Саханы саха дэппит күммүтүн бэрт сэмэйдик көрүстүбүт

Улуу Өрөгөй үйэ аҥаардаах үбүлүөйэ

Бу дьэ дьиҥнээх Өрөгөй этэ… Ол кэмҥэ мин Иркутскай куоракка үөрэххэ туттарсан, тус бэйэм ситиһиилэнэ сылдьар этим. Аны туран, 1967-1968 үөрэх сылыгар Саша Иванову кытта Сунтаар оскуолатыгар биир кылааска, ону ааһан биир паартаҕа олорон үөрэммит буолан ордук чугастык ылыммытым. Онтон 1976 сыллааҕы от ыйын 31 күнэ бүттүүн саха норуотугар улуу үөрүүнү, саха диэн аатынан киэн туттууну аҕалбыта.

Ханнык да омуна суох, сахалар тустарынан аан дойду аан бастаан 1972 с. сайыныгар, Германия Мюнхен куоратыгар буолбут Олимпийскай оонньууларга Роман Дмитриев чаҕылхай кыайыытынан сиэттэрэн билэр буолбута. Онтон түөрт сыл буолан баран, улуу Куоркуҥҥа уһуйуллубут үс саха уола эмиэ бэйэлэрин муус-хаар кыаһааннаах хотугу дойдуларын дорҕоонноохтук ааттаппыттара. Саха сирин ити кэмҥэ аан дойду алмааһынан-көмүһүнэн, Тымныы полюһунан, күндү түүлээҕинэн буолбакка, Роман Дмитриев, Павел Пинигин уонна Александр Иванов баһырхай ситиһиилэринэн билбитэ. Эппитим курдук, ол этэ Дьиҥнээх Өрөгөй! Бу ураты суолталаах тылы кэлин сэмэй да соҕус ситиһиилэргэ сыһыары тутан, дьиҥ ис суолтатын намыратан кэбистибит.

Онтон ыла саха дьоно-сэргэтэ бу үс боотурдарбыт Өрөгөйдөрө хатыланарын эрэнэ күүтэн кэллибит. Сылтан сыл ол эрэлбит уота уҕарыйан иһэр. Көҥүл тустуубут сайдыытын, баараҕай тутуулар, үгүс элбэх тренер үлэтин туһунан этэбит, кэпсиибит, тустуу ис хоһооно, быраабылалара, сайдыытын тэтимэ уларыйбытын, онон үйэ аҥаарын анараа өттүгэр буолбуту бүгүҥҥү күнү кытта тэҥнии сатыыр оруна суоҕун дакаастыыбыт.

Ол тэҥинэн бүгүн Өрөгөйү бэлиэтээтибит. Араас түгэннэргэ дирбиэннээх-дарбааннаах бырааһынньыктарын тэрийэр бэйэбит, саханы саха дэппит күммүтүн бэрт сэмэйдик көрүстүбүт. “Өрөгөй” успуорт дыбарыаһын тэлгэһэтигэр турар үс олимпиецтарбыт пааматынньыгар сибэкки ууруута буолла. Успуорт миниистирин бастакы солбуйааччы, билигин миниистир эбээһинэһин толорооччу Гаврил Мохначевскай, Олимпиада үрүҥ көмүс бириистээҕэ Александр Иванов, успуорт өрөспүүбүлүкэтээҕи түмэлин дириэктэрэ Михаил Друзьянов эҕэрдэ тыл эттилэр. Олимпийскай оонньуу чөмпүйүөнэ Павел Пинигин Москубаҕа Россия көҥүл тустууга чөмпүйэнээтигэр эдэр бөҕөстөргө сүбэ-ама биэрэ сылдьар. Онтон тэрээһиҥҥэ Роман Михайлович кэргэнэ Антонина Дмитриева баара да, тыл эппэтэ.

Бу күннэргэ дойдубут тустуутугар бастыҥнары быһаарар түһүлгэ тэлгэннэ. Отуттан тахса бөҕөс тиийбититтэн бэҕэһээ икки киһибит боруонсаҕа киирсэр кыахтанна. Бүгүн уолаттарбытыттан ким эмит убайдарын албан ааттарын чиэһигэр кыайан, дьонугар-сэргэтигэр үөрүүнү бэлэхтиэ дуо?

https://vk.ru/album198528372_311444662