Бүгүн киэһэ дьиэбитигэр өтөрүнэн буолбатахтыы манньыйан кэллибит…

Сырдык сыдьаайдаах саҥа киинэ

Бүгүн киэһэ дьиэбитигэр өтөрүнэн буолбатахтыы үөрэн-көтөн, манньыйан кэллибит. Астыммыт, дуоһуйбут төрүөппүт – “Мин аатым Таптал” диэн саҥа киинэ сүрэхтээһинэ. Бу айымньы киэҥ көрүүгэ тахсыан инниттэн, устар бөлөх састаабыттан, оонньуур артыыстарыттан сылыктаатахха, сонун көстүү буолара саарбахтаммат этэ. Оннук да буолла.

Саҥа киинэ ис хоһоонун ааҕааччыга тиэрдэн “спойлердаабакка”, бэйэм санаабын үллэстиим. Бастатан туран, бу курдук ыраас, сырдык кииинэлэри биһиги айар дьоммут усталлара буоллар диэн ыраламмытым, хас киинэ сүрэхтэниитигэр ол туһунан туруорааччылартан көрдөспүтүм буолла? Биһиги Сахабыт сирин туһунан хараҥа, хаалыылаах, туох да инникитэ суох дэриэбинэлэргэ арыгыһыт, иирээки аҥаардаах дьон олороллор диэн өйдөбүлү соҥнуур киинэлэри көрөбүт, онон “аатырабыт”, итиннигинэн олохпутун тупсарар, куһаҕан кэмэлдьибитин көннөрүөх үһүбүт. Киһини наар куһаҕанын көрдөрөн, “эн манныккын” диэн сирэйинэн киргэ-хоххо, сыҥсарга умса анньан кинини кэрэҕэ, сырдыкка уһуйбаппыт. Олохпут онто да суох үгүс ыарахаттардаах. Бу иннинээҕи Любовь Борисова “Мин үрдүбэр күн киирбэт”, “Кэрэни көрбүт”, Валентин Макаров “Кэрэли”, “Дьулуур”, Михаил Лукачевскай “Кыталыктаах кырдалга” айымньылара саха норуотун бастыҥ өрүттэрин көрдөрөллөр, кэрэни түстүүллэр, үтүөҕэ, сырдыкка сирдииллэр.

Оруолларга биһиги тыйаатырдарбыт биллэр-көстөр артыыстара, ону таһынан, аныгылыы эттэххэ “медийнэй лиичинэстэр” оонньообуттара киинэни үрдүк профессиолнальнай таһымҥа таһаарар.
Ордук сүрүн оруолу толорбут Татьяна Легантьева барыбытын үөртэ, долгутта, дьоллоото. Бэйэтэ билинэринэн, кини хас Саҥа дьыл аайы кумааҕыга “Миэхэ режиссердар үчүгэй сүрүн оруолу биэрдиннэр” диэн ыра санаатын суруйар эбит. Ол баҕа санаата туолан, бу киинэҕэ сулустаах оруолу толорбут. Таняны мин саҥа тыйаатырга үлэлии кэлиэҕиттэн сүрдээҕин сөбүлээн көрөбүн. Кини оруолу көннөрү оонньоон эрэ кэбиспэт, хас биирдии оруолугар кини оонньуур киһитин олоҕун толору олорор, бэйэтин дууһатын бүтүннүү ууран, сүрэҕин сылааһын биэрэн.

Туруорааччы режиссер Валентин Макаровы эмиэ өр кэмҥэ билэбин, ордук “Дьулуур” диэн киинэни бэлэмниир, устар кэмнэригэр үгүстүк алтыспыппыт. Мин сөбүлүүрүм, Валентин бэйэтин хартыыналарыгар олох уустуктарын хараҥа эрэ өрүттэрин көрдөрбөккө, кини геройдара ол ыарахаттартан өрүү кыайыылаах, инникигэ эрэллээх тахсаллар.
Саҥа киинэбитигэр үгүс тыйаатыр артыыстара уонна биллэр дьон кыра, быстах да кэмҥэ көстөн ааһар оруоллары оонньууллара көрөөччү болҕомтотун тардыаҕа, ол иһигэр Федот Львов, Дьулустаан Семенов, Ильяна Павлова, Анна Флегонтова, Елизавета Далбараева, “Уот Дьулустаан” сериал Екатерина Семенова, Маргарита Борисова, тэлэбииһэр экраныттан түспэт, саха дьоно бэркэ билэр сулустара Лиза Газизова, Дмитрий Баишев, Изабелла Егорова, Бронислава Габышева.
Бу киинэбит уратыта – кини сахалыы тыыннаах, сахалыы куттаах. Ол иһин мин кинини “Бриджит Джонс”, “Секс в большом городе” диэн аан дойду киинэлэрин кытта тэҥнии тута сатыылларын ылыммаппын. “Мин аатым Таптал” киинэн бүттүүн дьиэ кэргэнинэн көрүөххэ сөп, ордук улахан саастаах оскуола оҕолоро сэргиэхтэрэ дии саныыбын.

Биһиги сахабыт киинэтигэр өссө биири сөбүлүү көрөрүм – манна бүтүн хамаанда үлэлиир эрэ буолбатах, устуу кэмигэр бары биир ыал курдук олороллор, доҕордоһоллор. Онтон киинэлэрэ сүрэхтэниитигэр бары кыттыгастаахтар ааттара ааттанар, титрга суруллар, сыанаҕа бииргэ тахсаллар – сынаарый ааптарыттан туруорааччы режиссертан суоппарыгар уонна уоту тутан биэрээччигэ тиийэ. Бу да сырыыга эмиэ оннук буолла.
Сахам дьоно, бу киинэни хайаан даҕаны көрүҥ, эһиги киинэ тыйаатырыттан дуоһуйа сынньанан, астына күлэн, сырдыгынан, үтүөнэн сыдьаайан тахсыаххыт!