Виктория Варламова-Контоева СВО-5а геройдуу охтубут күндүтүк саныыр күтүөтүн туһунан – III

Күтүөппүт Вася кылгас олоҕуттан истиҥ ахтыылар 3 чааһа

#василийданиловотважныйкомандир

#викиныневыдуманныеисторииизжизни

2016 сыл атырдьах ыйыгар ыччаттарбыт сыбаайбалаатылар. 200 киһилээх бэртээхэй уруу буолла. Бырааһынньыгы бэлэмнээһиҥҥэ Нарыйалаах Вася бэйэлэрэ сүүрбүттэрэ-көппүттэрэ. Кыыспыт олох режиссер курдук, идея бөҕө, фотосессия, видеоҕа уһуллуу.

Эр дьон итинниги соччо сөбүлээбэттэрин курдук, Вася эмиэ «кыһалҕаттан» эрэ фотосессиялыыр?

Сыбаайбабытыгар тура-тура үҥкүүлээ да үҥкүүлээ. Кыыспыт дьүөгэлэринээн үҥкүүлээтилэр, сыбаайбалааччылар вальстара, уруу ыалдьыттара бары кыттыылаах флешмоб. Уол табаарыстара эмиэ үҥкүүлэтилэр быһылаа5а, онно эбии мин Айталыыналыын музыкальнай бэлэхпит эмиэ үҥкүү. Биримээнэ Индия киинэтин дьонун курдукпут арай?

????Ыалдьыттар олус астынан, биһиги бырааһынньыкпыт табыллан үөрэн-көтөн тарҕастыбыт.

Үгэс быһыытынан сарсыҥҥы күнүгэр биһирэмҥэ муһуннубут. Ресторан мансардаҕа баар этээһигэр остуол тартыбыт. Арай чэйдии олордохпутуна саалабытыгар чыычаах көтөн киирдэ. Саастаах дьон сөбүлээбэтилэр. Мин эмиэ чыычаах соччото суохха дьиэҕэ киирэр диэни истэр этим. Онон үүрсэр түбүккэ түстүбүт. Барабыай чыычаах быһылааҕа, дьиэ өһүөтүгэр кэтиллэ-кэтиллэ балачча өр көтө сырытта, ол кэннэ киирбит сиринэн тахсан барда. Эдэр дьон кыһамматылар. Мин чэ мансарда5а өрүү киирэр-тахсар олохтоох чыычаах ини диэн куһаҕаны саныы сатаабатым. Уонна уопсай үөрүүгэ олорсон сотору буолан баран итини умнан кэбистим.

Бу кыһын ыар сүтүктээх хара күннэр сабардаан кэлбиттэригэр ити түгэни өйдөөн кэлбитим, ийэбэр эппитим. Соһуйуом иһин, ийэм эмиэ биһирэмҥэ куһаҕан бит буолан кэлбит чыычааҕы санаабыт этэ….