Улуус көхтөөх ыччата түмсэр

Олунньу 5 күнүгэр, улууска Үтүө дьыаланы оҥорооччу сылыгар бары нэһилиэктэртэн ыччат лидердарын, актыбыыстарын түмэн «Дни единых действий» диэн семинар тэрилиннэ.

Семинар үөрүүлээх арыллыытын чааһыгар кыттыылаахтары улуус ыччатын политикатын салайааччыта Евгений Данилов уонна СӨ волонтердарын кытары үлэни ыытар киин дириэктэрэ Алена Кычкина эҕэрдэлээтилэр. Күн бастакы аҥарыгар бэйэ-бэйэни кытта билсиһэргэ ыччакка уонна дьиэ-кэргэҥҥэ социальнай психологическай өҥөнү оҥорор киин психологтара Надежда Тимофеева уонна Валентина Илларионова тренинг ыыттылар. Салгыы семинар спикердара – «Кэскил» сокуоннай саастарын ситэ илик оҕолорго социально-реабилитационнай киин дириэктэрэ Альбина Прокопьева, Сунтаардааҕы технологическай колледж профсойууһун бэрэссэдээтэлэ, ТОС «Сомоҕо» салайааччыта Константин Тотонов, «Партизан» култуура киинин дириэктэри солбуйааччы, Сунтаар нэһилиэгин депутата Жанна Макарова уонна Кутана нэһилиэгин дьаһалтатын исписсэлииһэ, нэһилиэк ыччатын сэбиэтин бэрэссэдээтэлэ Айыына Тимофеева мунньах кыттыылаахтарыгар уопут атастаһарга истиҥ, сэргэх кэпсэтии олохтоон сүбэ-ама биэрдилэр.

Күн иккис аҥарыгар ыччаттар хамаандаларга арахсан бэйэлэрин көрүүлэринэн быйыл Үтүө дьыаланы оҥорооччу сылыгар аналлаах бырайыактарын оҥордулар.

Семинар кыттыылаахтара маннык олус суолталаах көрсүһүү буолбутуттан астынан, улууспут инники сайдарын туһугар, дьоммутугар-сэргэбитигэр үтүө дьыаланы оҥорууга өссө элбэх ыччаты угуйан бары бииргэ түмсэн үлэлииргэ баҕа санааларын эттилэр.