Оһуохай тылын эппит киһи диэн улахан баҕа санаалаах этим

Кэнники кэмҥэ саха норуотун Оһуохайа бэрт киэҥник тарҕаммытын, сайдыы үлэтэ күүскэ ыытыллар буолбутун, бары да көрө — истэ сылдьабыт.
Ол барыта Саха Сиригэр баар «Оһуохай» түмсүү күүстээх дьаныардаах үлэтин-хамнаһын түмүгэ буолар.
Бүгүн биһиги ааҕааччыларбытыгар билиһиннэрэр киһибитинэн Саха Өрөспүүбүлүкэтин үтүөлээх этээччитэ Светлана Васильевна Сосина буолар:
— Бэйэм Мэҥэ — Хаҥалас Табаҕатыттан төрүттээхпин. Оһуохай тылын эппитим 15 сылтан таҕыста, онтон Оһуохай түмсүүтүгэр сылдьыбытым 20 тахса сыл буолла.

Урут Саха Сиригэр Сельхозтехника баар эрдэҕинэ Оһуохайга кэлэ сылдьыбытым, онно улахан улуу Дархан этээччилэри, холобура Ырыа Ыстапааны, көрөн наһаа сөхпүтүм, сэргээбитим, испэр: «Оо, хайдах эрэ Оһуохайга киирэммин, уерэнэммин, кинилэри кытта тэҥҥэ сэргэстэһэн, алтыһан, Оһуохай тылын эппит киһи» — диэн улахан баҕа санаалаах этим. Ол баҕам миэнэ арыллан, дьылҕабар сүрдээҕин үөрэбин, махтанабын.
Ол кэннэ Оһуохайым дьонун кытта тэҥҥэ алтыһан, күрэхтэргэ кыттыһан сылдьарбыттан наһаа долгуйабын, дьоллонобун.
Онтон биһиги Ытык Оһуохайбыт түмсүүтүгэр наһаа элбэх талааннаах дьон баар. Элбэх дьону, эдэр ыччаты көҕүлээн, түмэн бырааһынньыктарга, араас тэрээһиннэргэ улахан болуоссаттарга Оһуохайы ыытабыт.

Бэл диэтэр, 2021 сыллаахха Сербияҕа баран сахалыы Оһуохайы тэрийэн турардаахпыт.
Саамай улахан суолталаах үлэбитинэн Гиннесс рекордын олохтооһуна буолар. Онно биһиги салайааччыбыт Александр Джурович Данилов туох да улахан суолталаах, биһиги санаабытын өрө көтөҕөн, сүбэ-ама биэрэн, баччааҥҥы дылы Оһуохайбытын өрө тута сылдьабыт.
Мин тус бэйэм үлэбин этэр буоллахха, Оһуохай Ыстапаанныын Дьокуускай куорат Доҕордоһуу болуоссатыгар улахан Оһуохайы баран тэрийбиппит, бастаан сүрдээҕин долгуйбутум, наһаа элбэх эдэр ыччат кэлэн көтөҕүллэн туран оһуохайга кыттыспыттара.
Онтон билигин биһиэхэ улахан тэрээһин Оһуохай күнүгэр (Ыам ыйын 25 күнүгэр) буолаары турар, онно биһиги бэлэмнии үлэтин ыыта сылдьабыт.

Ол тэрээһиннэргэ биһиги Оһуохайбыт түмсүүтэ улахан оруоллаах, онтон этиэм этэ биһиги кэнчээри ыччаттарбыт өбүгэлэрбит биир үтүө, кэрэ үгэстэрин өйөөннөр куруук маннык биһиэхэ кэлэннэр үөрэ — көтө, алтыһан, оһуохайдаан кэлэн баралларыттан биһиги сүрдээҕин үөрэбит, биһигини салҕыыр дьон баар эбит диэн эрэллээхпит!
Ол курдук, эмиэ Оһуохай күнүнэр, Ыам ыйын 25 күнүгэр, Саха Өрөспүүбүлүкэтин бары оскуолаларыгар үөрэҕи бүтэрээччилэр улахан Оһуохайдара тэриллээри турар. Биһиэхэ улахан күүс — көмө буолбут Ил Дархаммытыгар Айсен Николаевка махталбыт муҥура суох!