Ушел из жизни экс-глава улуса

Ыам ыйын 29 күнүгэр биир дойдулаахпыт, СР норуотун хаһаайыстыбатын Үтүөлээх үлэһитэ, Нам улууһун уонна улуус 15 нэһилиэгин Ытык киһитэ, техническэй наука кандидата, Россия, СР  Бочуоттаах тутааччыта, СР атыы-эргиэн туйгуна, СР олох-дьаһах хаһаайыстыбатын бочуоттаах үлэһитэ, СР тыатын хаһаайыстыбатын туйгуна, СР үөрэҕириитин туйгуна, 2008-2013 сс Нам улууһун баһылыга Альберт Иннокентьевич Ильин уһун, ыарахан ыарыыттан күн сириттэн күрэммитинэн дириҥ кутурҕаммын биллэрэбин.

Альберт Иннокентьевич Ильин 1963 сыллаахха тохсунньу 13 күнүгэр Нам улууһун Түбэ нэһилиэгэр элбэх оҕолоох дьиэ кэргэҥҥэ бастакы оҕонон күн сирин көрбүтэ. Кыра сааһыттан үлэҕэ сыстаҕаһа, үөрэххэ-билиигэ тардыһыылааҕа инники олоҕун түстээбитэ. 1980 с. Нам 1 №-дээх орто оскуолатын кыһыл көмүс мэтээлинэн үөрэнэн бүтэрбитэ. 1985 с. Новосибирскайдааҕы тыа хаһаайыстыбатын институтун кыһыл дипломунан бүтэрэн инженер-механик идэтин ылбыта. Үөрэҕин бүтэрээт 1985-1987 сс. Саха государственнай университетын уопсай техническэй дьиссипилиинэлэр кафедраларын преподавателинэн ананан үлэтин саҕалаабыта.
1987-1989 сс Альберт Иннокентьевич «Якутжилстройтрест» 5 №-дээх монтажтыыр салалтатын монтажнигынан үлэлиир. 1989-1992 сс. Москватааҕы инженернэй тутуу институтун аспирана. 1992-2000 сс. Дьокуускай к. «Конкорд» ХЭТ тутуу тэрилтэтин директора. Оччолорго дойду үрдүнэн саҥа рыночнай сыһыаннаһыылар үөскээбит кэмнэригэр Альберт Иннокентьевич саҥалыы толкуйдааҕа, аныгы көрүүлээҕэ үлэҕэ-хамнаска сэмэй хардыылары оҥорорго кыаҕы биэрбитэ.
2000 с. «Применение теплоизоляционных материалов в условиях Крайнего Севера» диэн темаҕа кандидатскай диссертациятын көмүскээн техническэй наука кандидата буолбута.
2001 с. Альберт Иннокентьевич СР Президенэ М.Е. Николаев ыйааҕынан тутуу уонна архитектура министерствотыгар министр солбуйааччытынан анаммыта. 2002 сылтан СР тутуу уонна тутуу матырыйаалларын промышленноһын министерствотыгар министр солбуйааччытынан үлэлиир. Бу сылларга уопутурбута, тутууну ымпыгар-чымпыгар тиийэ сиһилии билбитэ, республика тутууга политикатын иһиттэн толору үөрэппитэ. Ол да иһин инники өттүгэр Эҥсиэли хочото саҥа тутууларынан киэркэйэн, кытыы нэһилиэктэргэ кыра да, улахан да тутуулар харахха быра5ыллар гына барбыттара.
2005 с. олорор дьиэ тутуутун уонна ипотечнай кредиттээһин департаменын начальнига буолбута. Бу үлэлиир кэмнэригэр үлэ ис хоһоонун чопчу билэн үрдүк профессиональнай таһымнаах специалист буола үүммүтэ.

2008-2013 сс. Альберт Ильин «Нам улууһа» муниципальнай тэриллии баһылыгынан талыллан үлэлээбитэ. Дьонугар, улууһугар, өрөспүүбүлүкэҕэ улахан баай уопуттаах, мындыр салайааччы быһыытынан киэҥник биллибитэ. Улуус инники сайдыытыгар туох баар сатабылын, билиитин, дьоҕурун ууран күүскэ үлэлээн кэлбитэ. Инникини толкуйдуур, былаанныыр, ааҕар-суоттуур үрдүк таһымнаах салайааччы буолан ылсыбыт дьыалатын тиһэҕэр диэри тиэрдэр, үлэни ирдиир киһи этэ.
2008 сыллаах быыбардар кэннилэриттэн Нам улууһа биллэ сэргэхсийбитэ, үчүгэй өттүгэр тупсуу, саҥа ситиһиилэр кэлбиттэрэ. Дьон олоҕо туруктаах буолуутугар, улуус экономиката, производство сайдыытыгар, социальнай эйгэҕэ балайда элбэх үлэ ыытыллыбыта. Чуолаан, тутуу салаатыгар киэҥ далааһыннаах хамсааһын тахсан саҥа дьиэ-уот, производственнай эбийиэктэр баар буолбуттара.
2012-2014 сс ГАУ «Якутлесресурс» генеральнай директорынан үлэлээбитэ.
Альберт Иннокентьевич олорбут олоҕо, дириҥ ис хоһоонноох үлэтэ-хамнаһа, оҥорбут үтүөтэ-өҥөтө хаһан да умнуллуо суоҕа.

Юрий Слепцов, «Нам улууһа” МТ баһылыга.