Сэбиэскэй былаас саҕана оһуохай бобуллара

Оһуохай түмсүү Ыам ыйын 25 күнүгэр Оһуохай күнүн көрсө араас таһымнаах тэрийиилэри бэлэмниир.
Саха Өрөспүүбүлүкэтин үтүөлээх этээччитэ Данил Пестряков хайдах Оһуохай эйгэтигэр кэлбитин туһунан сырдатта:
— Мин Данил Михайлович Пестряков Чурапчы улууһун Ытык Бахсы нэһилиэгэр Ыам ыйын 30 күнүгэр 1955 сыллаахха төрөөбүтүм. Бахсы начальнай оскуолатын бүтэрэр сылбар, 1966 сыллаахха, учууталбыт Ытык киһи Сергей Афанасьевич Зверев — Кыыл Уолун туһунан кэпсээбитэ. Биһиги оҕолор Оһуохайы пластинкаҕа истэн сэҥээрбиппит.

Ол кэмнэргэ араадьыйаннан Сунтаар Оһуохайын биэрэллэрин сэргии истэр буолбутум. Кытаанах орто оскуолатын бүтэрэн, Сэбиэскэй аармыйа кэккэтигэр Казахстааҥҥа 2 сыл сулууспалаан ЯПУ — 1 физкультура салаатыгар студент буолбутум. Бу кэмнэргэ Сунтаар, Ньурба, Бүлүү оҕолоро Оһуохай этэллэрин сөбүлүү, сэргии истибитим. Бэйэм кыралаан Оһуохай этэргэ үөрэммитим.
1982-83 сылларга үөрэхпин бүтэрэн, Кытаанах орто оскуолатыгар физкультура учуутала буолбутум. Ити сылларга кыра түмсүүлэргэ Оһуохай тылын таһаарар этим.
1983 сыллааха СГУ студена буолабын. Дьэ бу кэмҥэ угуйааччыларым педагогическай наука кандидата Шамаев Николай Калинович уонна филологическай наука доктора Петров Николай Егорович устудьуоннарга кистээн Оһуохай тэрийэллэр этэ, Сэбиэскэй былаас саҕана Оһуохай бобуллара.
Ол үөрэхпин 1986 сыллаахха бүтэрээт, Чурапчыга физруктуур кэммэр оҕолорго Оһуохай үҥкүүтүн быспакка үөрэтэр этим. Сорох кэмҥэ физкультура уруоктарыгар Оһуохай үҥкүүтүн туттар этим.

Чурапчы ыһыахтарыгар, үбүлүөйдэргэ Оһуохай тылын этээччитинэн аатырбытым. Билигин даҕаны Туймаада ыһыаҕар сыл аайы кыттабын. Хаар айан күрэх аһыллыытыгар хас да төгүл Оһуохай төрүттээн турабын.
2013 сылтан Дьокуускай куорат Гагаринскай уокурук оскуолатыгар физруктуу сылдьабын. Данилов Александр Джурович — Дьулуур Хан салайар Оһуохай түмсүүгэ сэбиэт чилиэнинэн талбыттара, 2017 сыллаахха Саха Сирин үтүөлээх этээччитэ аатын иҥэрбиттэрэ.
Дьокуускайдааҕы Айыы Кыһата оскуолаҕа оҕолорго Оһуохайы үөрэтиигэ үлэлэһэн кэллим, сылы түмүктүүр Ыһыахха Оһуохай киэҥ түһүлгэтэ тэриллэ сылдьыбыта.
Оһуохай түмсүү аатыттан Сунтаар Сиэйэтигэр, Бүлүү Кэнтигэр Оһуохай күрэҕэр кыттан кэлбиппит. Кулун тутар 29 күнүгэр «Саха Сирэ» хаһыат бөлөҕөр киирэн, Майаҕа олорор ааҕааччыларга Оһуохай түһүлгэтин төрүттээн кэлбиппит.
Сыл аайы оскуолабар муус устар 27 күнүгэр Саха Сирин Оһуохай түһүлгэтэ тэриллэрэ үгэскэ кубулуйда.

Данилов Александр Джурович салайааччылаах Оһуохай сайдыытыгар сөҕүмэр үлэлэр улэлэннилэр. Оһуохайбыт Европа дойдуларыгар рекламалаах щиттара ыйаннылар, Аар Дархан этээччи Черноградскай С.И. кинилэтэ таҕыста, Оһуохайа омук тылынан этилиннэ. Оһуохайбыт кыттааччыларын ахсаанынан Гиннесс рекорда олохтонно.
Оһуохай түмсүү үлэтин үрдүктүк сыаналаан, Ил Дархаммыт Айсен Николаев Ыам ыйын 25 күнүн Оһуохай күнүнэн билэрбититтэн бука бары үөрдүбүт!
«Алмаас Таас» аатын ылбыт Алексеев А.Е. уонна 98 саастаах Осипов Е.М. Аар Дарханнарбытынан киэн туттабыт!
Оһуохай түмсүү үлэтэ манан эрэ бүппэт, өссө да элбэх ситиһиилэр биһигини кэтэһэллэр диэтэхпинэ сыыспатым буолуо!