Оһуохай түмсүү тэриллиитин санаатахха… 

         Оһуохай түмсүү тэриллиитин туһунан, кимнээх бастаан Оһуохай этээччилэрин биһиэхэ ол саҕаттан тэрийиигэ кыттыспыт Саргылана Георгиевна Яроскунова ахтан — санаан ааста:

     — Биллэн турар, бастаан Сэбиэскэй былаас саҕана Оһуохайы бобор этилэр. Ол эрэн биһиэхэ Сунтаарга баар этэ. Ол да иһин билигин даҕаны Сунтаартан төрүттээх элбэх этээччи баар. 

       Онтон Уураах ылыллан, 1986 сыллаахха биһиэхэ Оһуохай түмсүү диэн тэриллэр. Бастакы салайааччыннан философскай наука доктора Николай Егорович Петров талыллар. Элбэх ахсааннаах этээччилэр да буолбуттара. Ол курдук Алексеев Афанасий Егорович, Осипов Егор Михайлович, Иванова Мария Михайловна, Зверев Арсен Григорьевич, Сафонов Николай Иванович, Тимофеев Пётр Алексеевич, сэрии бэтэрээттэрэ Аманатов Дмитрий Петрович, Охлопков Роман Романович, Кумечко Пётр Петрович, Текеянов Данил Спиридонович уонна да атыттар бааллара. 

      Оһуохай тэрээһинэ интэриэһинэйдик аастын диэн үҥкүү эрэ буолбакка, спорт күрэхтэһиилэрин эмиэ тэрийэрбит, мин спортивнай секторы салайар этим. Хаамыска, хабылык, саахымат, муннук былдьаһыыта күрэхтэр ыытыллаллара. Араас маастар — кылаастар, быыстапкалар ыытыллаллара. Быырпах, эт ас бэлэмнээн күндүлүүллэрэ. 

       Бастаан Институт физкультуры ыытар этибит. 

      Дьокуускай куорат ыһыаҕа ипподром буолар эрдэҕинэ тэрийиигэ эмиэ улэспиппит. Онтон Үс Хатыҥҥа көспүтэ, онно эмиэ Оһуохай түһүлгэтин төрүттээбиппит.

      Билигин Арчы дьиэтэ арыллан, онно Оһуохайбыт чугдаарар, сайыҥҥы өттүгэр пааркаҕа сквер аһыллан онно ыытыллар буолла. 

      Бэйэм Оһуохайга анаан, этээччилэр тустарынан икки альбом таһаарбытым, олору Арчы Дьэтигэр баран көрүөххэ сөп. 

        Билигин биһиги Бырабыыталыстыбабыт, Оһуохай түмсүү салайааччыта Александр Джурович Данилов Оһуохайга болҕомто ууран, киэҥ эйгэҕэ таҕыста диэххэ наада. Ол курдук Оһуохай күнэ диэн баар буолла, араас былаан баттанан олоххо киирэн эрэр. Эдэр ыччат Оһуохайга киириитэ үксээтэ. 

      Онон биһиги Саха сирин саастаах олохтоохторо Ил Дархаммытыгар Айсен Николаевка уонна Өрөспүүбүлүкэ Бырабыыталыстыбатын бэрэссэдээтэлин солбуйааччы Сергей Местниковка махталбыт улахан. Инники улэлэригэр, тус олохторугар ситиһиини, былааннара барыта олоххо киирдиннэр! 

      Оһуохай чугдаардын, хаһан да симэлийбэтин!