Айаал Бурцев: Бу уголовнай да, административнай да өттүнэн олуллуу буолбатах

Күндү дьонум-сэргэм, убаастабыллаах биир дойдулаахтарым!

Уол оҕо — Эр киһи төрөөбүт төрүт дойдутугар ис сүрэҕиттэн бэриниилээх буолуута — бу кини ытык иэһэ. Мин тус баҕа өттүбүнэн анал байыаннай дьайыыга контракт баттаһан алта ыйга кыттыыны ыла барарга быһаарыммыппын эһиэхэ быһаарар, өйдөтөр эбээһинэстээхпин.

Хас биирдиибит кыайыы туһугар кылааппытын киллэриэхтээхпит, быһаччы кыттан, бары өттүнэн өйөөн. Мин оҕо эрдэхпиттэн Аҕа көлүөнэ үтүө, үрдүк холобуругар иитиллэн улааппытым. Бу буола турар балаһыанньаҕа туора турар кыаҕым суох, ол инниттэн өр кэм устата толкуйдаан, ыраҥалаан көрөн баран маннык быһаарыы ылынным. Бэҕэһээ улуус Сэбиэтин депутаттарын, улууспут общественнай Сэбиэтин, нэһилиэктэр баһылыктарын Сэбиэтин иннигэр тус санаабын, быһаарыныыбын эттим, өйөбүллэрин, алгыстарын ыллым.

Бу уголовнай да, административнай да өттүнэн күһэллии да, олуллуу да буолбатаҕын аһаҕастык этэбин. Манна эһиил улууспутугар буолаары турар Манчаары оонньууларыттан, эбэтэр улууспут дьонун-сэргэтин хаалларан, инники карьерабын оҥосторум туһугар баран эрэр курдук санаа да, төрүөт да төрдүттэн суох. Манна эбэн эттэххэ, Манчаары оонньуутугар бэлэмнэнии былаан быһыытынан бара турар, эппиэтинэстээх дьон ананан, бириэмэтигэр барыта туолуо.

Бу анал байыаннай дьайыыга кыттыыны ыларым улууспут туһугар, инники өттүгэр үлэбитигэр көмөлөөх буоларын туһугар туһуланар, уонна, инники эппитим курдук, кэлиэхтээх кыайыыга бэйэм тус кылааппын киллэрсэрим буолар.

Эйэлээх, көҥүл олохпут иһин күннэтэ анал байыаннай дьайыы хонуутугар туруулаһа сылдьар хорсун-хоодуот буойун уолаттарбыт барыбыт туһугар киллэрэр сүҥкэн кылааттарыгар сүгүрүйэбин, киэн туттабын, дириҥ ытыктабылбын уонна убаастабылбын биллэрэбин.

Тааттам дьоно бары түмсүүлээх буолуоҕун, түмсүүнэн, сомоҕолоһуунан эрэ инники соруктарбытын ситэбит. Кыайыы туһугар, эйэлээх олох туһугар этэҥҥэ буолуоҕун, чэгиэн чэбдик сылдьыаҕын.

Бары убаастабылы кытта Айаал Бурцев.

И он туда же: Глава Таттинского района добровольцем идет на СВО. Читайте здесь