Үс мөлүйүөн саха үөскээтин, түөрт мөлүйүөн саха төрөөтүн! Доом!

Ыам ыйын 15 күнүгэр, Өрөспүүбүлүкэ пресс — киинигэр Оһуохай күнүн көрсө пресс — конференция буолан ааста.
Саха Сирин культураҕа уонна духуобунай сайдыыга миниистирин бастакы солбуйааччыта Мария Турантаева, Өрөспүүбүлүкэтээҕи норуот айымньытын дьиэтин дириэктэрэ Сергей Семёнов, Оһуохай түмсүү салайааччыта Александр Данилов, кини солбуйааччыта, Ил Дархан стипендиата, Дархан этээччи Марта Николаева, Саха Сирин Дархан этээччитэ Валентин Хорунов уонна да атын этээччилэр кыттыыны ыллылар.

Мария Турантаева:
— Бары билэргит курдук, ааспыт сыл балаҕан ыйын 7 күнүгэр Ил Дархан Айсен Николаев Оһуохай күнүн бэлиэтиир туһунан дьаһал баттаабыта.
Ол курдук биһиги быйылгыттан Ыам ыйын 25 күнүгэр Оһуохай күнүн көрсөр буоллубут. Бу күн Өрөспүүбүлүкэ үрдүнэн араас таһымнаах тэрээһиннэри бэлэмнии сылдьабыт.
Оһуохай биһиги саха дьонугар сүдү суолталаах, ону бары өйдүөхтээхпит, өйүөхтээхпит, биһиги олохпутугар кини баар буолуохтаах. Саха Сиригэр олорор киһи барыта Оһуохайга хайаан даҕаны кыттыыны ылыахтаах диэн бэйэм тус санаалаахпын.
Саха Сирин Бырабыыталыстыбатын бэрэссэдээтэлин солбуйааччы Сергей Местников салайааччылаах хамыыһыйа тэрийилиннэ. Араас тэрээһиннэрдээх 5 сылга улахан былаан оҥоһулунна, барыта олоххо киирэрин ситиһэргэ үлэ ыытарга бэлэммит.

Александр Данилов Дьулуур-Хаан:
— Этиллибитин курдук Саха Сирин Бырабыыталыстыбатынан Оһуохай сайдыытын туһугар улахан былаан баттанан, үлэҕэ киирээри турар.
Оһуохай күнэ биллэриллибитигэр биһиги Ил Дархаммытыгар Айсен Николаевка улахан махталбытын биллэрэбит.
Манна сиэттэрэн Оһуохайбыт сайдарын туһугар билигин өссө улахан үлэни ыытыахтаахпыт.
Хас биирдии нэһилиэккэ Оһуохай этээччи баар буолуохтаах. Түмсүү кыттыылаахтара кинилэри угуйуу, уэрэтии үлэтин ыытарга бэлэммит.
Оһуохай диэн саха былыргы итэҕэлбит биир көстүүтэ буолар. Биир киһи: Этээччи, тыл күүһүн туһанан алгыс этэр, Үрдүк Айыыларга үҥэр, ону атыттар үтүктэллэр, бары тутуспутунан биир сомоҕо буолаллар, күүс-уох ылаллар, Оһуохай норуоту сомоҕолуур. Тыллаах, сирдээх, итэҕэллээх буоллахпытына, сахалар симэлийиэхпит суоҕа, күүстээх сайдыы кэлиэ, ахсаан өттүнэн эбиллиэхпит. Оһуохай сайдыбыт сирдэригэр, үксүнэн Бүлүү улуустарга, госстатистика этэринэн оҕо төрөөһүнэ элбээтэ. Биһиги Оһуокай Түмсүү девизпыт маннык: «Үс мөлүйүөн саха үөскээтин, түөрт мөлүйүөн саха төрөөтүн! Доом!»
Оһуохай күнүгэр, оскуола Бүтэһик чуораанын тыаһыыр кэмигэр бары оскуолаларга Оһуохай түһүлгэлэрэ тэриллиэхтэрэ.

Уонна эмиэ бу күн, Ыам ыйын 25 күнүгэр, Дьокуускай куоракка киэһээ биэс 0чаастан Доҕордоһуу болуоссатыгар Добун Оһуохай түһүлгэтэ буолуо. Саха сирин олохтоохторун уонна ыалдьыттарын барыларын ыҥырабыт!

  Афанасий Егорович Алексеев, Аар Дархан этээччи:
  - Оһуохай күнэ баар буолуохтаах диэн мин даҕаны, түмсүү атын да кыттыылаахтара уруккуттан туруорсар этибит. 
 Ону бу этиибитин сөпкө өйдөөн өйөөбүтүгэр Саха Сирин Ил Дарханыгар Айсен Сергеевич Николаевка махталбытын тиэрдэбит! Айсен Сергеевич бэйэтэ эмиэ Оһуохайга чугас киһи, кини эһээтэ Андрей Титович Титаров - Саха Сиригэр Аар Дархан оһуохайдьыт, олоҥхоһут, тойуксут этэ. Киниэхэ анаан, уруулара аймахтара араас тэрээһиннэри ыыталлар. 

Саха Сиригэр, аан дойдуга оһуокай дуораана үйэлэр устун дьиэрэйэ турдун!