Бойца СВО и журналиста Алексея Семенова проводили в последний путь в НВК «Саха»
Младший сержант, известный журналист, ведущий информационных передач «Саха сирэ» и «Күнтэн күн», Алексей Семенов погиб в ходе специальной военной операции при исполнении своего долга.
Церемония прощания с Алексеем Семеновым прошла в НВК «Саха». Проститься пришли близкие, коллеги, представители власти, общественности и местные жители.
Доҕорбут сырдык кэриэһигэр
Анал байыаннай дьайыыга бойобуой сорудаҕы толоро сылдьан тыына быстыбыт младшай сержант, «Саха» национальнай көрдөрөр-иһитиннэрэр хампаанньа биллэр суруналыыһа Алексей Семеновы кытта бырастыылаһыы ыытыллар.
Манна СӨ бырабыыталыстыбататын, араас тэрилтэлэр бэрэстэбиитэллэрэ уонна Алексей дьиэ кэргэнэ, чугас дьоно, доҕотторо, бииргэ үлэлээбиттэрэ уонна олохтоохтор кэллилэр.
«Алексей Никитич олоҕо, үлэтэ-хамнаһа – дьоҥҥо-сэргэҕэ, ыччакка үтүө холобур»
Суруналыыс, байыас Алексей Семеновы кытта бырастыылаһыы сиэригэр-туомугар СӨ бырабыыталыстыбатын бэрэссэдээтэлин солбуйааччы Сергей Местников кутурҕанын биллэрдэ:
«Саха сирин биллэр кэрэспэдьиэнэ — Алексей Никитич Семенов кыргыһыы хонуутугар тыына быстыбытынан дьиэ кэргэнигэр, оҕолоругар, чугас дьонугар уонна бииргэ үлэлээбит коллективыгар СӨ Бырабыыталыстыабытын аатыттан уонна тус бэйэм ааппыттан дириҥ кутурҕаммын тиэрдэбин.
Алексей Никитич олоҕо, үлэтэ-хамнаһа дьоҥҥо-сэргэҕэ, ыччакка үтүө холобур буолар. Ол курдук, кини үөрэҕин бүтэриэҕиттэн ыла суруналыыстыкаҕа, телевидениеҕэ олоҕун анаабыта. Алексей оҥорор матырыйааллара олус толору ис хоһоонноох, дьоҥҥо-сэргэҕэ тиийимтиэ буоларын бэлиэтиибит. Ханнык баҕарар хайысханы кини сөпкө сырдатааччы, тыа дьонугар анаан биэриилэрин биһиги бары өйдүүбүт. Бу маннык талаан киһиэхэ мээнэ бэриллибэтэ буолуо. Алексей Саха сирин олоҕун, дойду үлэтин-хамнаһын барытын билэр киһи. «Күнтэн күн» диэн нэдиэлэни түмүктүүр сонуннар биэриилэрэ сөптөөх, толору, сиһилии буолаллара. СӨ бырабыыталыстыбатын, министиэристибэлэрин үлэлэрэ-хамнастара кини нөҥүө сөптөөхтүк сырдатыллан киэҥ эйгэҕэ тахсыбыттара.
Дойду чиэһин көмүскээһиҥҥэ, харысхаллаах буолуутугар, өстөөҕү туоратарга аналлаах Алексей Никитич хорсун быһаарыыны ылыммыта. Кини СВО-ҕа инники күөҥҥэ сылдьан араас киирсиилэргэ, түүҥҥү-күнүскү кыргыһыыларга кыттыбыта. Анал байыаннай дьайыыга эр санаатын, хорсун быһыытын көрдөрөн бу дойду ытык чиэһин көмүскүүргэ тыына быстан, олохтон туораата».
Алексей телевидениеҕэ анаан төрөөбүт киһи буолар
Суруналыыс, байыас Алексей Семеновы кытта бырастыылаһыы сиэригэр-туомугар «Саха» НКИХ генеральнай дириэктэрэ Олег Марков кутурҕанын биллэрдэ:
«Күндү, Наталья Анатольевна, биһиги доҕорбут, коллегабыт оҕолоро Саша, Байдам, Сайаана эһиэхэ биһиги улахан, иллээх коллективпыт аатыттан дириҥ кутурҕаммытын тиэрдэбитин көҥүллэҥ. Биһиги аһыыгытын тэҥҥэ үллэстэбит.
Биһиги бүгүн Саха сирин биир саамай талааннаах, чаҕылхай суруналыыһын, доҕорбутун тиһэх суолугар атаараары муһуннубут.
Алексей биһиги хампаанньабытын ис сүрэҕиттэн таптыыр, сөбүлүүр. Кини телевидениеҕэ анаан төрөөбүт киһи буолар.
Алексей кылгас, ол эрээри чаҕылхай олоҕу олордо. Ол курдук, кинини билбэт сахалыы тыллаах саха киһитэ диэн өрөспүүбүлүкэ үрдүнэн суох буолуохтаах. Алешабыт олус талааннаах суруналыыс буолан олус чаҕылхай, дьоҥҥо-сэргэҕэ тиийимтиэ, киһиэхэ сүрэҕэр-быарыгар киирэр сюжеттары бэлэмнээн, биэриилэри ыытан бэйэтин аатын-суолун дьоҥҥо-сэргэҕэ букатыннаахтык хаалларда».
Трагическая гибель Алексея Семёнова: ведущий «Саха сирэ» погиб в зоне боевых действий