Ытык Оһуохайбыт кэнчээри ыччакка хааларын туһугар түмсүүлээхтик үлэлиэхпит!

Дархан этээччи Уйгулаах Күбэйэ Саарын кыыһа: «Ытык Оһуохайбыт кэнчээри ыччакка хааларын туһугар түмсүүлээхтик үлэлиэхпит!» 

       Оһуохай күрэҕин өссө биир бастыҥ этээччи аатын ылла Уйгулаах Күбэйэ Саарын кыыһа:

       — Мин Уйгулаах Күбэйэ Саарын кыыһа диэммин. Сунтаар улууһун ,кэрэ -мааны айылҕалаах Тэҥкэтиттэн төрүттээхпин, Тэҥкэттэн ыал буолан кэлэн Илимнииргэ Васильев Алексей Егоровичтыын 5 оҕону күн сирин көрдөрбүппүт. Оҕолорум Денис, Анастасия, Егор, Айсен, Федор туспа суоллаах -иистээх дьоннор, элбэх сиэннэрдээхпин.      

       Мин тапталлаах ийэм Сунтаар Бордоҥуттан төрүттээх,өр сылларга Тэҥкэҕэ Матросов Алексей Николаевичтыын ыал буолан олорбуттара, онно олохтоох Егорова Анастасия Гаврильевна оһуохайын түһүлгэтин иһигэр оҕо эрдэхпиттэн олорон, Оһуохай ураты тыынын эппэр -хааммар иҥэрэн, ийэбин, өбүгэ дьоммун утумнаан, үрдүк таһымҥа Оһуохайдьыт  быһыытынан үүнэн таҕыстаҕым.

       Оһуохай ураты алыптаах эйгэтигэр 2006 сыллаахха энтузиаст оһуохайдьыт, Оһуохайы өрө туппут мин ытыктыыр ,махталынан ахтар-саныыр Уһуйааччым Уһун-Күөлтэн төрүттээх Иннокентий Федорович Чириков  «Хочо куолаһа» Оһуохай түмсүүтүн күрэҕэр таба көрөн, батыһыннара сылдьан, үөрэтэн-такайан ,элбэх оһуохайдьыттары кытта алтыһыннаран, маннык үрдүк ааты ситистим диэн  Иннокентий Федорович сырдык аатыгар махталым улахан . 

     Быйылгы Туймаада ыһыаҕын күрэҕэ үрдүк таһымҥа ааста диэн сыаналыыбын. Дьон -сэргэ сахалыы Ийэ куттара уһуктан Оһуохай курдук сүдү ,суолталаах үҥкүүбүтүгэр кынат буолар дьон ,сылтан сыл элбээн иһэллэрэ үөрдэр. Кынат дьоно суох Оһуохайдьыт үүммэт, күүстээх алгыһынан кэлэр ньэгир ылбат, онон сэргиир, мэлдьи аттыбытыгар баар кынатчыттарга махтал.      

      Куорат баһылыгар, бас-көс киһибитигэр Евгений Николаевич Григорьевка саха төрүт культуратын,чуолаан Оһуохайы суолталаан өйүүрүгэр дириҥ махталбын биллэрэбин .  

      Күрэх сыаналыыр састаабар, икки күннээх-түүн тура тэбэн үлэлээтилэр Саха сирин Оһуохайын түмсүүтүн иилээн -саҕалаан  хамсатар Александр Джурович Даниловка — Дьулуур Хааҥҥа, Саха сирин Аар Дархан этээччитигэр Розалия Тихоноваҕа, Саха сирин Дархан этээччилэригэр Марта Николаеваҕа, Валентин Хоруновка, Евдокия Павловаҕа, Саха сирин Бырабыыталыстыбатын бэрэссэдээтэлин солбуйааччы Сергей Васильевич Местниковка, Дьокуускай куорат баһылыгар Евгений Николаевич Григорьевка махтанан туран, Оһуохай сайдарын туһугар үлэҕит үтүө түмүктэрдээх, саха норуотун сомоҕолуур, итэҕэлгэ иилиир -саҕалыыр ЫТЫК ОҺУОХАЙБЫТ кэнчээри ыччакка хааларын туһугар биир тыыҥҥа, биир сыалга, түмсүүлээхтик үлэлиирбитигэр баҕарабын!

Кистэлэҥим диэн күрэхтэһиэм иннинэ чуумпуран уоскуйабын