Ыччат олоҥхото күн сирин көрдө

Ахсынньы 7 күнүгэр Юрий Борисов «Баһырҕастаах ааттаах Баабый Баатыр» оҕо, ыччат олоҥхотун кинигэтин биһирэмэ буолан ааста. Тэрээһини  Олоҥхо ассоциациятын бэрэсидьиэнэ Февронья Васильевна Шишигина ыытта.

Эдэр олоҥхоһуту  М.К. Аммосов аатынан ХИФУ  бэрэсидьиэнэ Евгения Исаевна Михайлова эҕэрдэлээтэ. Олоҥхону үйэтитиигэ, тарҕатыыга, ыччакка тиийэригэр Юрий Борисов сүҥкэн үлэни ыытарын бэлиэтээтэ. «Айар» национальнай кыһа Оҕо уонна үөрэх кинигэтин киинин салайааччыта Марина Георгиевна Никифорова «Баһырҕастаах ааттаах Баабый Баатыр» бу эрэ күһүн тахсан баран хайыы-үйэ улахан аҥаара атыыга барбытын туоһулаата. Ол аата олоҥхо ааҕааччытын булан, сыалын сиппит диэн бэлиэтиибит! Маны сэргэ баҕа санаатын, алгыс тылын кинигэҕэ олус кэрэхсэбиллээх аан тылы суруйбут педагогика билимин хандьыдаата Галина Семеновна Попова-Санаайа эттэ. Эдэр олоҥхоһуттары кытта дириҥ хорутуулаах, истиҥ сыһыаннаах, ситимнээх үлэ ыытылларын бэлиэтээтэ. Айылҕаттан айдарыылаах, уус тыллаах ыччаты харыстаан илдьэ сылдьыллыахтаах диэн тоһоҕолоон ыйда.

Биһирэмҥэ Юрий Борисов олоҥхоҕо аан маҥнайгынан уһуйбут учуутала Татьяна Тарасовна Степанова кэлбитэ, киниэхэ биир маҥнайгынан тыл биэрбиттэрэ ураты истиҥ суолталаах түһүлгэни төрүттээтэ. Ону сэргэ ааптар биир дойдулаахтара Амма улууһун Эмис нэһилиэгин ыччата кэлэн эҕэрдэлээтилэр. Биһирэмҥэ Юрий Борисов бииргэ үлэлэһэр оскуолаларын учууталлара кэлбиттэрэ элбэҕи этэр. Олоҥхоһут уус тылын кэнчээри ыччакка тиэрдэрин бэлиэтэ! 

«Баһырҕастаах ааттаах Баабый Баатыр» олоҥхо эрэдээктэрэ Сардана Тимофеева кинигэ фишкаларын билиһиннэрдэ. Олоҥхо кэрэтэ, сүмэтэ истиигэ сытар. Ол курдук кинигэҕэ баар QR-куодунан В.Г. Короленко аатынан Амма 1 №-нүөмэрдээх орто оскуолатын толоруутугар испэктээги көрүөххэ уонна Юрий Борисов бэйэтин толоруутугар дьоруойдарын ойуулуур кэрчиктэри истиэххэ сөп.

«Баһырҕастаах ааттаах Баабый Баатыр» олоҥхону «Айар» бары маҕаһыыннарыттан атыылаһыаххытын сөп. Ыччаккытыгар саха тылынан уус-уран айымньытын, күндү баайбытын олоҥхону тиэрдиҥ, өбүгэ ситимин салҕааҥ!