Ыһыах үһүс күнүгэр сэрии буолла диэн биллэрбиттэригэр утуу-субу тарҕаспыппыт…

Аар Дархан этээччи Егор Осипов: «Кыыл Уолун Оһуохайа өйбөр хатан хаалбыта»…

       Үгэс быһыытынан Аар Дархан, Дархан, үтүөлээх этээччилэри, Оһуохай түмсүү кыттыылаахтарын кытта билиһиннэрэр суруйууларбытын салгыыбыт.

       Бүгүҥҥү ыалдьыппытанан буолар Аар Дархан этээччи, 97 сааһыгар сылдьар Егор Михайлович Осипов:

      — Мин 1927 сыллаахха Ыам ыйын 5 күнүгэр Сунтаар улууһун Хоро нэһилиэгэр күн сирин көрбүтүм.

        1936 сыллаахха Хоро 4-с кылаастаах оскуолатыгар үөрэххэ киирбитим, Филиппов Павел Афанасьевич, Самсонов Василий Егорович, Кириллин Николай Степанович диэн учууталлар үөрэппиттэрэ, онтон Элгээйигэ 5 кылааһы үөрэнэн бүппүтүм кэннэ 1941 сыллаахха немецкай талабырдьыттар дойдубутугар сэриинэн түһэн, киһи аймах бары сэриигэ баран, Хороҕо «Правда» колхуоспутугар аһылык суох, уот — кураан дьыл буолан, биһиги аҕабынныын Өлүөхүмэҕэ баран, онно «Сталин» колхуоска үлэлии сылдьан 1950 с. саҕалаан 1953 сылга дылы Сэбиэскэй аармыйа кэккэтигэр түөрт сыл сулууспалаан, Өлүөхүмэҕэ төннөн 2,5 сыл балык хаһаайыстыбатыгар ыскылаат сэбиэдиссэйинэн, Өлүөхүмэ «Дабаан» учаастагар 5 сыл, пайщиктар мунньахтарыгар быыбарданан Абаҕа нэһилиэк потребительскай уопсастыбатыгар 35 сыл үлэлээн биэнсийэҕэ тахсыбытым.

       Оһуохайы бастаан 1941 сыллаахха Сунтаарга «Угут күөл» ыһыаҕар, Сергей Сибиэрэп үҥкүү тылын этэрин истибитим. Ыһыах үһүс күнүгэр Элгээйиттэн кэлэн сэрии буолла диэн биллэрбиттэригэр утуу — субу тарҕаспыппыт.

      Онтон ыла Оһуохай өйбөр туох да суруга — бичигэ суох иҥэн хаалбыта, бэйэм үҥкүү тылын этиэхпин баҕарбытым.

       1987 сыллаахтан Оһуохай түмсүү кыттыылааҕа буолан, үҥкүү тылын этэн, Аар Дархан этээччи үрдүк аатын сүкпүтүм.

       Өрөспүүбүлүкэ түмсүүтүн Оһуохайдьыттара бары көхтөөхпүт, ким гармошка көмөтүнэн араас элбэх нууччалыы үҥкүүнү сөбүлүүр, сорохтор хоһоон, кинигэ суруйаллар, Дуобат, саахымат оонньууллар. Онтон 2012 сыллаахха түмсүү салайааччыта Александр Джурович Данилов ыҥырыылаах 15.293 киһилээх Оһуохай түһүлгэтэ тэриллэн Гиннесс рекордын олохтообуппут.

     Кэлиҥҥи кэмҥэ Саха сирин салалтата, Өрөспүүбүлүкэ баһылыга Айсен Сергеевич Николаев, Оһуохай түмсүү салайааччыта Александр Джурович Данилов буолан Оһуохай сайдыытын туһугар элбэх үлэни ыыттылар, ыыта да сылдьаллар. Оһуохай күнэ баар буолбута биһиги бары үөрүүбүт, дьолбут! 

    Саха тыла ордук баай, эдэр ыччаттары Оһуохай түһүлгэтигэр, өйтөн хоһуйар, хоһооннуур буоларыгар Саха уус — уран тылын билэн имигэс, иэйиилээх тылларыгар эдэр ыччаты оскуолаттан саҕалаан үөрэтэн, Саха норуота ханна да суох культуратын, Оһуохайын илдьэ сырыттаҕына чөл олохтоох буолар, аргыны — табаҕы батыспат, культуралаах дьон буолалларыгар, Саха ыччаттарыгар дьоллоох олоҕу баҕарабын! Сайдыҥ — үүнүҥ — чэлгийиҥ! 96 саастаах Саха Сирин Оһуокай Түмсүүтун Аар Дархан этээччитин үтүө тыллара олоххо киирдиннэр!