Улуустар салайыыларыгар Ытык Оһуохайга анал штаты көрүөххэ!

      Биллэрин курдук, сотору кэминэн, Саха Сиригэр Ыам ыйын 25 күнүгэр Оһуохай күнэ бэлиэтэнээри турар.

       Биллэр Дархан этээччилэри, Оһуохай түмсүү кыттыылаахтарын кытта билиһиннэрэр матырыйааллары таһаарарбытын салгыыбыт.

     Бястинова Мария Михайловна — Саха Өрөспүүбүлүкэтин үтүөлээх оһуохайга кыната, Нам улууһун Искра нэһилиэгин бочуоттаах олохтооҕо, Нам улууһугар Ленскэй нэһилиэккэ култуураҕа уонна духуобунай иитии сайдыытыгар киллэрбит үтүөлэрин иһин бэлиэлэр хаһаайкалара, Үлэ бэтэрээнэ, биһиэхэ кини Оһуохай хамсааһына хайдах өссө сайдыахтааҕын туһунан санаатын үллэһиннэ:

      —  Бястинова Мария Михайловна, 72 саастаахпын,Нам улууһугар Ленскэй нэһилиэккэ олоробун, урут культура салаатыгар кулуупка үлэлээбитим. Билигин сынньалаҥҥа олоробун.

     «Эҥсиэли оһуохайа» түмсүүгэ 2013с. кулун тутар ый бүтэһигэр Аппааны нэһилиэгин олохтооҕо Евсеева Татьяна Ивановна оһуохай түмсүү тэрийэбин, онно биһиэхэ кэл диэн ыҥырбытыгар үөрүүнэн сөбүлэһэн түмсүүгэ киирбитим. Бэйэм оһуохайы эппэппин, кынаттаһабын. Онтукайыҥ эмиэ туһугар олус эппиэттээх буолааччы. Оһуохайы хоһуйар, этэр киһи, 3-4 үчүгэй кыната-батыhааччыта суох буоллаҕына, оһуохайа тахсыбат. Кынаттар этэр киһи бүтэһик дорҕоонун бары бииргэ үтүктэн ылластахтарына, олус кэрэтик, күүстээхтик иһиллээччи.

      Татьяна Ивановна бэйэтэ тыа хаһаайыстыбатыгар үлэлээбит буолан тэрийэр, салайар өттүгэр сыһыана суох буолан, кини солбуйааччытынан үлэлээн кэллим.

       Татьяна Ивановна бэйэтэ кылыһахтаах тойуксут, оһуохай да этэр, ырыаһыт талааннаах бөҕө, дьоҥҥо тылын ылыннарар үтүө киһи, Саха Өрөспүүбүлүкэтин үтүөлээх оһуохай этээччитэ. Биһиги түмсүүбүтүгэр уопсайынан бары да олус талааннаах, энтузиаст, патриот дьон түмсэн үлэлээбиппит.   

         Улуус Ытык киһитэ, учууталлар учууталлара, угуйааччылара Черноградская Людмила Павловна биһиги ортобутугар баар, биһиэхэ таҥара бэлэҕин курдук сыаналыыбыт. Кини олоҕу, дьону билэрэ, көрөрө, ким да кини тылыттан тахсыбат, ол курдук дьоҥҥо убаастатара биһиги дьону, салалтаны кытары үлэбитигэр сүдү күүс буолар.

      Маҥнай тэриллэрбитигэр, нэһилиэктэртэн бэтэрээннэр түмсүүлэрэ өйөөбүттэрэ. Ол иһин барыта аҕам саастаахтар түмсүбүппүт. Инньэ гынан эдэр ыччаттарбытын оһуохайга чугаһатаары оҕо уһуйааннарыгар, оскуолаларга, үөрэҕирии колледжыгар ый ахсын биирдиитэ былааннаахтык сылдьарбыт. Оччотооҕу улуус баһылыга Атласов Александр Павлович биһиги улууска оһуохайы сайыннарарга саҥа саҕалааһыммытын өйдөөн, өйөөн нэһилиэктэргэ, атын улуустарга сылдьарбытыгар, айанныырбытыгар анаан 100000 солк. улуус бюджетыттан көрбүтэ. Онон улууспут нэһилиэктэрин барытын кэрийбиппит, хас да улуустарга сылдьыбыппыт, түмүгэр икки улуус нэһилиэгэр, бэйэбит биэс  нэһилиэктэрбитигэр Оһуохай түмсүүлэрэ тэриллибиттэрэ улахан ситиһиибит буолар.

     Биһиги ханна тиийдибит да сорохторбут уһуйааннарга, сорохторбут оскуолаҕа, кулуупка тиийэммит сахаҕа сиэр-туом тутулун, олоххо алгыс өйдөбүлүн кэпсээн, оһуохайдатан, онтон киэһэтин кулуупка кэнсиэрдээн, оһуохайдаан дьон махталын истэн, үөрэн — көтөн дьиэбитигэр тиийэрбит.

       Үлэбитигэр Өрөспүүбүлүкэбит «Ытык Оһуохай» түмсүү салайааччыта Данилов Александр Джурович сүбэтэ, көмөтө тугунан да кэмнэммэт сөҕүмэр. Ол курдук саҥа тэриллэн эрдэхпитинэ, хантан истибиттэрэ буоллар, сыалай биир автобус дьон тиэллэн кэлэн, саҥа аһыллыбыт Олоҥхо дьиэтигэр мунньан сүбэлээн, былаан оҥосторбутугар, түмсүүбүт ааттаах буолуохтааҕын, сыл түмүгэр Ытык Оһуохайга отчуоттуур буоларбытыгар сүбэлээбиттэрэ, хаһан баҕарар ыарырҕатар боппуруостарбытыгар көмөлөһүөх буолан эрэннэрбиттэрэ. Онон бары бииргэ үлэлиибит, биһиги ситиһиибититтэн тэҥҥэ үөрэллэр, санааннан да, үбүнэн да элбэх көмөнү оҥороллор.

     2017 с. Өрөспүүбүлүкэҕэ үлэбитинэн бастакы миэстэни ылбыппыт. П.П. Ядрихинскай-Бэдьээлэ аатынан Олоҥхо дьиэтин салайааччыта Колпашникова Вера Васильевна коллективын кытары уонтан тахса сыл бииргэ үлэлээтибит.

     2021 с. Вера Васильевнаттан Ленскэй нэһилиэккэ Оһуохай күнүн олохтотуохха, көмөлөс, сүбэлээ диэн көрдөспүппүтүгэр, оччотооҕу баһылыкка Новгородов Андрей Григорьевичка сайабылыанньабытын суруйан биэрбитэ, элбэхтик туруорсуу түмүгэр 2023 сылтан олунньу ый бастакы бээтинсэтэ сыл аайы Оһуохай күнэ буоларын туһунан Ленскэй нэһилиэк баһылыга Сокольников Петр Григорьевич илии баттааһыннаах уураах тахсыбыта, онон быйыл иккис сылбытын Оһуохай күнүн оскуолаларга, тэрилтэлэргэ, культура Дыбарыаһыгар сахалыы таҥнан, симэнэн оһуохайдар тэриллибиттэрэ.

      Биһигиттэн бачыым ылан быйыл ыам ыйын 25 күнэ, аны сыл аайы Өрөспүүбүлүкэҕэ Оһуохай күнүнэн биллэрилиннэ диэн үөрэбит, киэн туттабыт!

       Бу Оһуохай концепцията баттаммыта олус үчүгэй, бириэмэтэ кэллэ. Ил Дархаммытыгар Айсен Сергеевич  Николаевка уонна Өрөспүүбүлүкэ Бырабыыталыстыбатын бэрэссэдээтэлин солбуйааччы Сергей Васильевич Местниковка махтаныах эрэ тустаахпыт!      

        Ол гынан баран, мин көрөрбүнэн, оһуохай үлэтин саҥалыы олохтоохтук тэрийиэххэ наада. Бу биһиги сахалар итэҕэлбит сорҕото буоларын өйдөөн, оҕо уһуйааннарыттан саҕалаан үлэлэһиэххэ, оччоҕо оҕо эрдэхтэриттэн бииргэ түмсэ,сахалыы таҥнан сомоҕолоһо үөрэниэ, Саха буолалларынан киэн тутта, ыраас өйдөөх санаалаах, итэҕэллээх буола улаатыа этилэр.  Холобура кып — кыра уһуйаан оҕолоругар тиийэн илиилэриттэн тутуһан, күн эргииринэн хаамтаран оһуохайга үҥкүүлэттэххэ, олус үчүгэйдик үҥкүүлэһэн бараллар, саха хааныгар былыргаттан оһуохай баара онтон биллэр дии саныыбын, учуонайдарбыт оһуохай боппуруоһугар үлэлэһэн ыйар, сүбэлиир кинигэлэри суруйан, бэчээккэ таһаараллара буоллар, улахан көмө буолуо этэ үлэлиир дьоҥҥо.

       Уонна түмүкпэр эбэн эттэххэ, улуустарга оһуохай салайааччытыгар культура отделыгар анал штат көрүллэрэ буоллар, оччоҕо дьэ көдьүүстээх, үтүө түмүктэрдээх үлэ тахсыа этэ, атын салаа үлэлэргэ хайа таттарбакка, наар оһуохай үлэтин киэҥник, кыра оҕотуттан улаханыгар тиийэ былааннаан, сылы быһа үлэни быспакка.

Если вы увидели интересное событие, присылайте фото и видео на наш Whatsapp
+7 (999) 174-67-82
Если Вы заметили опечатку в тексте, просто выделите этот фрагмент и нажмите Ctrl+Enter, чтобы сообщить об этом редактору. Спасибо!
Система Orphus
Наверх