«Туйаарыма Куо» музыкальнай драма-олоҥхо премьерата күн сирин көрүө

Олунньу 11 уонна 12 күннэригэр «Туйаарыма Куо» музыкальнай драма-олоҥхо премьерата күн сирин көрөр.

Олунньу 10 уонна 11 күннэригэр Нам сэлиэнньэтигэр саҥа аанын тэличчи аспыт М.К.Аммосов аатынан култуура уонна духуобунай сайдыы дыбарыас сценатыгар күүтүүлээх П.А.Ойуунускай айымньытыгар олоҕуран, хампаһыытар В.А.Зырянов муусукатыгар «Туйаарыма Куо» музыкальнай драма-оолоҥхо премьерата тахсар. Бу үөрүүлээх, долгутуулаах премьера 2022 сылга, Саха АССР төрүттэммитэ 100 сылыгар, уһулуччулаах сэбиэскэй уонна партийнай  судаарыстыбыннай диэйэтэл  М.К.Аммосов төрөөбүтэ 125 сылыгар ананан тахсыахтаах этэ. Ол гынан кэккэ биричиинэнэн көһөн быйыл көстөр.

Бырайыак ааптара уонна музыкатын редактора – С.А. Зверев–Кыыл Уола аатынан СӨ үҥкүүтүн тыйаатырын оркестрын сүрүн дирижера, Арассыыйа култууратын үтүөлээх үлэһитэ, СӨ ускуустубатын үтүөлээх диэйэтэлэ Николай Петров, либретто ааптара, фольклор уонна этнография өттүттэн сүрүн консультант, режиссер, өрөспүүбүлүкэҕэ киэҥник биллэр уһуйааччы, алгысчыт, Арассыыйа култууратын үтүөлээх үлэһитэ, Саха АССР үтүөлээх артыыһа Афанасий Федоров, сүрүн хореограф — СӨ үтүөлээх артыыһа, өр сыллар устата Д.К. Сивцев — Суорун Омоллоон аатынан опера уонна балет тыйаатырын сүрүн балетмейстера — Мария Сайдыкулова, сценография худуоһунньуга – А.С. Пушкин аатынан судаарыстыбаннай академическай нуучча драматическай тыйаатыр сүрүн худуоһунньуга, Арассыыйа уонна СӨ үтүөлээх диэйэтэлэ, СӨ норуодунай худуоһунньуга Николай Попов.  


           Сүрүн оруоллары С.А. Зверев–Кыыл Уола аатынан СӨ үҥкүүтүн  тыйаатырын оркестрын доҕуһуолунан Нам улууһун уус-уран самодеятельноһын кыттыылаахтара толороллор.  Ону тэҥэ З.П. Винокуров аатынан Намнааҕы оҕо ускуустубатын оскуолатын оркестра уонна «Ручеек» оҕо образцовай үҥкүүтүн кэлэктиибэ кыттар. Маассабай сыаналарга Нам сэлиэнньэтин наруодунай хора, Үөдэй нэһилиэгин В.А. Зырянов аатынан наруодунай хора, «Ньургуһун» наруодунай үҥкүү бөлөҕө кытталлар.

Былырыын Саха АССР төрүттэммитэ 100 сылыгар, сахалартан бастакы хампаһыытар М.Н.Жирков төрөөбүтэ 130 сылыгар Бүлүү куоракка аан бастаан С.А.Зверев –Кыыл Уола аатынан үҥкүү тыйаатыра оркестрын доҕуһуолунан Бүлүү улууһун уус-уран самодеятельнаһын кыттыылаахтара, Н.Г.Чернышевскай аатынан Бүлүүтээҕи педагогическай училище устудьуоннара, М.Н.Жирков аатынан култуура дыбарыаһын хора, М.Н.Жирков аатынан Бүлүүтээҕи оҕо ускуустубатын дьиэтин норуодунай оркестра “Сыгый Кырынаастыыр» операны үрдүк таһымнаахтык  толорон Бүлүүгэ, Дьокуускайга, Москубаҕа П.И.Чайковскай аатынан консерваторияҕа  тиийэ көрдөрбүттэрэ улахан ситиһиини уонна биһирэбили ылбыта  уонна атын улуустарга холобур буолбута.

Өрөспүүбүлүкэ улуустарыттан Намнар иккис улууһунан профессиональнай туруорааччылар кыттыылаах үрдүк таһымнаах айымньыны таһаараллар.
           Бу нэдиэлэ устата күүстээх үлэ күөстүү оргуйар.  Оркестр артыыстара күн ахсын сарсыарда эрдэттэн Намҥа айанныыллар. Тиийдилэр да айар үлэ үөһүгэр түһэллэр. Күнүһүн кыра тохтобул кэннэ эмиэ күүстээх бэлэмнэнии салҕанар. 

Баҕарыаҕын “Туйаарыма Куо” драма-олоҥхо бары кыттыылаахтарыгар, туруорааччыларыгар чаҕылхай премьераны, таһаарыылаах үлэни, дьон кэрэхсэбилин, билиниитин, биһирэбилин уонна махтаныытын!

Вера Черноградская  
 

Если вы увидели интересное событие, присылайте фото и видео на наш Whatsapp
+7 (999) 174-67-82
Если Вы заметили опечатку в тексте, просто выделите этот фрагмент и нажмите Ctrl+Enter, чтобы сообщить об этом редактору. Спасибо!
Система Orphus
Наверх