#Кэскил
Мин оскуолаҕа үөрэнэ сылдьан, 97 №-дээх «Аргыс» юнкоровскай пост юнкора этим. Оччолорго салайааччыбыт Федорова Анастасия Васильевна араас ыстатыйалары, заметкалары суруйарга уһуйан үөрэтэрэ, хаһыаты ааҕарга, таптыырга бастакы олуктары уурбута. Ол саҕана почта да сырыыта үчүгэй буолан, кып-кыһыл «Бэлэм буол» диэн суруктаах хаһыат кэлэрэ олус да күндү этэ. Бу маннык суругу биһиэхэ бу күннэргэ төрөөбүт түөлбэтигэр — Орто Халыма улууһун Өлөөкө Күөл оскуолатыгар 19-с сылын саха тылын уонна литературатын учууталынан үлэлиир,13-с сылын юнкоровскай куруһуогу салайан үлэлэтэ сылдьар Изабелла Ноговицына суруйан ыытта.
«Бэлэм буол» диэн кып-кыһыл суруктаах хаһыат кэлэрэ күндү этэ.
Хаһыаты сөргүтэн таһаарыы туһунан «Бэлэм буол», «Кэскил» хаһыаттарга өр кэмҥэ редактордаабыт, элбэх көлүөнэ үөрэх, иитии эйгэтигэр үлэлээбит дьон махтана саныыр, ытыктыыр киһитэ Нина Иннокентьевна Протопопова ахтыылара бааллар.
Оҕо саас хаһан баҕарар, ханнык баҕарар кэмҥэ биир.
ҮТҮӨ СЫҺЫАН
Нина Иннокентьевна ити этэрин курдук, саҥа сүүрээни үтүө санаанан, сүбэнэн көрсөрө. Ол да иһин буолуо, хорсун уонна далааһыннаах бырайыактары оҕолор, ыччаттар, учууталлар хаһыаттыын кыттыһан ыытар үтүө үгэстээхтэрэ.
Хаһыат сайдан, ыыра кэҥээн барбыта. Нина Иннокентьевна оҕо иитиитигэр үлэлиир дьону, терөппүттэри түмэр сыал-сорук туруорбута. Ситигирдик хаһыат иһигэр хаһыат үөскээбитэ. Оччотооҕу үөрэҕирии министиэристибэтин кытта ыкса үлэлээн, бастыҥ уопуту хорутуулаахтык тарҕатар «Учуутал аргыһа», «Учительский вестник» бэчээттэнэн барбыттара.
Оҕо — төрөппүт — учуутал. Бу ситими «Учуутал аргыһа» хаһыакка түмпүттэрэ.
Ольга Семенова
«Кэскил» издательство салайааччыта:
«Хаһыаттар үлэһиттэрэ күнтэн күн оҕолуун алтыһар ньыманы тобулан, аймньылаахтык үлэлээн кэллилэр. Аныгы оҕо хараҕынан сирдэтинэн, олох суолталаах ис хоһоонун тиэрдэргэ саҥа ньымалары туттуу үксээтэ.»
Сардана Коврова
«Кэскил» оҕо издательствотын салайааччытын солбуйааччы, педагогическай наука кандидата:
«Оҕо сайдыытыгар төрөппүт өйө-санаата, учуутал билиини биэрэр кыаҕа сүҥкэн суолталаах. Маны сэргэ оҕо сылдьар ыырыгар, эргимтэтигэр баар дьон-сэргэ иитэр суолталааҕын өйдүөх кэриҥнээхпит. Биһиги редакияларбыт араас сылларга ити хайысхаҕа алтыспыт тарбахха баттанар дьонноохпут. Бу үлэ салгыы сайдарыгар уопсастыба бүттүүнэкыттыһара, үөрэх, наука үүннүүрэ-тэһиинниирэ наада.»
Издательство коллективын ааттыттан тапталлаах хаһыаппытыгар араас сылларга үлэлээбит аҕа дьоммутун, юнкордары, учууталлары, доҕотторбутун истиҥник эҕэрдэлиибит. Кэлэр ыйдарга 85 сааспытын көрсөр араас тэрээһиннэрбитигэр алтыһыахпыт диэн эрэнэбит!