«Сылгыһыт күрэһэ-2023»

Республикаҕа 2016 сылтан ыытыллар Сылгыһыт күнүн чэрчитинэн, бүгүн, кулун тутар 11 күнүгэр Элгээйи нэһилиэгэр Сунтаар улууһун уонна Элгээйи нэһилиэгин дьаһалталарын көҕүлээһининэн Ленин орденнаах «Элгээйи» совхоз биир киэн туттар Саха АССР үтүөлээх сылгыһыта Александр Афанасьевич Александров төрүөбүтэ 95 сылыгар уонна Саха АССР үтүөлээх сылгыһыта Александров Парфений Ивановичка аналлаах  улуустааҕы «Сылгыһыт күрэһэ-2023» үрдүк таһымнаахтык ыытылынна,  Сарсыарда 10 чааска «Оһуор» Култуура киинигэр күрэскэ кытта кэлбит ыалдьыттары нэһилиэк баһылыга  Павел Анатольевич Григорьев, улуус баһылыгын солбуйааччы Борис Серафимович Васильев, улуус тыа хаһаайыстыбатын начальнигын солбуйааччы Готовцев Григорий Семёнович, Александров А.А. төрөппүт кыыһа Альбина Александровна Романова, Александров П.И. төрөппүт кыыһа Ангелина Парфеньевна Попова эҕэрдэлээтилэр. Ону тэҥэ күрэскэ кэлбит хамаандалары билиһиннэрии, бастыҥ сылгыһыттарга наҕараадалары туттарыы үөрүүлээх чааһа буолла.

Салгыы нэһилиэк урукку аэропордун территориятыгар күрэс сүрүн чааһа буолла.Ол курдук түөрт этааптан турар хамаанданан күрэххэ Бордоҥ, Маар Күөл, Күндэйэ, Күүкэй, Элгээйи нэһилиэктэрэ кыттыылаах 5 хамаанда  күөн көрүстүлэр. Хас биирдии хамаанда састаабыгар түөртүү эр бэрдэ киирэр. Сүрүн күрэхтэһии республиканскай балаһыанньанан ыытылынна. Ол курдук хамаандалар ат сүүрдүүтүгэр, сыал ытыытыгар күрэхтэстилэр. Күрэс түмүгүнэн 8 мүн.04 сөк.бастыҥ көрдөрүүлээх  Бордоҥ нэһилиэгин хамаандата 1 миэстэни ылан күрэс сүрүн спонсордара Александров Александр Афанасьевич оҕолоро, сиэннэрэ туруорбут 60 000 суумалаах сүрүн бирииһи тутан үөрүү өрөгөйүн биллилэр.

2 бочуоттаах миэстэҕэ 8 мүн.41 сөк.бириэмэни көрдөрөн Күүкэй нэһилиэгин хамаандата тигистэ уонна Сунтаар улууһун УСХ туруорбут 30 000 бирииһин хаһаайынынан буоллулар. 3 миэстэҕэ 8 мүн.51 сөк.кэлбит Маар Күөл сылгыһыттарын хамаандата таҕыста уонна Сунтаар нэһилиэгин «Булчут» маҕаһыын (Попов С.В.)туруорбут 20000 суумалаах сертификатын тутан үөрдүлэр.
Салгыы биирдиилээн кыттааһыннаах күрэскэ, 1200 миэтэрэҕэ ат сүүрдүүтүгэр 10 кыттааччыттан Маар Күөл ат сүүрдээччитэ Иванов Руслан Анатольевич биэтэккэ бастакынан кэлэн бочуоттаах 1 миэстэни ылан Александров Парфений Иванович оҕолоро, сиэннэрэ туруорбут 30 000 сууммалаах МР-155 саа ыларга сертификатынан наҕараадаланна. Бу күрэскэ 2 миэстэни Хоро сылгыһыта Игнатьев Михаил Семенович ылан Сунтаар нэһилиэгин «Булчут» маҕаһыыныттан ыларга Ананьев Николай Константинович аймахтара туруорбут 12 калибрдаах 250 ботуруон сертификатын тутта.
3 миэстэҕэ Элгээйиттэн Петров Демьян Никифорович тигистэ уонна «Булчут»маҕаһыын 5 тыҺ.уонна Ананьев Н.К.аймахтара туруорбут 3 тыҺ.сууммалаах сертификаттарын тутта.
Бэргэн ытааччы күрэһигэр 12 киһи кыттыбытыттан, Бордоҥтон сылдьар Павлов Иван Александрович бочуоттаах 1 миэстэни ылан  Игнатьев Алексей Романович ген.дир. ООО»Кэмпэндээйитээҕи туус компанията» туруорбут 1 туонна тууска сертификатын уонна СИТИМ туруорбут 5 тыһ.сууммалаах сертификатын тутта.

2 миэстэни Маар Күөл бэргэн ытааччыта Иванов Руслан Анатольевич ылан эмиэ Кэмпэндээйитээҕи туус компанията туруорбут 1 туонна тууһу ылар сертификатын уонна 2 тыһ.ылла. 3 миэстэни Элгээйиттэн Кондратьев Андрей Арианович ылан Элгээйи нэһилиэгин Иванова Д.Е., Иванова Г.Е, Петров Д.Н. КФХ туруорбут 10 000 уу харчытынан наҕараадаланна. Тоҥ хаарынан ат сүүрдүүтүгэр Муҥутуур Кыайыылааҕынан Маар Күөл бастыҥ сылгыһыта Иванов Руслан Анатольевич буолан  Иванов  Николай Алемфьевич туруорбут 5 куул эбиэһинэн наҕараадаланна.
Күрэс тэрээһинигэр улахан көмөнү оҥорбут тэрилтэлэргэ: ХЭТ «Айан-Суол» (сал. Крыжановскай В.В. ат суурэр площадкатын бэлэмнээбитигэр), КФХ Львов В.М, Попов С.В. олохтоох бородууксуйаннан кыттааччылары күндүлээбиттэринэн махталбытын тириэрдэбит.
Ити курдук Элгээйи нэһилиэгин дьаһалтата быйыл республикаҕа биллэриллибит Үлэ сылынан, үлэһит дьону чиэстиир, тыа сирин тутаах үлэһиттэрин-сылгыһыттары, кинилэр сыралаах, эппиэттээх үлэлэрин көрдөрөр, билиһиннэрэр, бу салааҕа ыччат дьону тардар сыаллаах бу улахан тэрээһини үрдүк таһымҥа ыытта.
Күрэһи тэрийсибит, ыыппыт, спонсордаабыт, судьуйалаабыт, ыалдьыттары аһатарга көмөлөспүт бары дьоммутугар-сэргэбитигэр дириҥ махталбытын тиэрдэбит! Салгыы үйэлэри уҥуордаан бүгүҥҥү күҥҥэ тиийэн кэлбит саха төрүт дьарыга-сылгыны иитии өссө да сайдыа, сылгыһыт   үлэтэ өрө тутуллуо диэн туран кыһыҥҥы бытарҕан тымныыга, сайыҥҥы өҥүрүк куйааска аһаҕас халлаан анныгар сылдьан, сыспай сиэллээҕи тэнитэр туһугар сыралаһан сылгыһыттарга Сылгыһыт күнүнэн итиитик-истиҥник эҕэрдэлиибит!Ситиһиилээх үлэни, чэгиэн доруобуйаны баҕарабыт!