Светланалаах Валентина дьоһун хаартыскалара

Кыһыны быһа чуҥкуйан турбут Туотараптар маанылаах, тупсаҕай көстүүлээх, күндү ньээкэ тиэргэннэрэ сайын буолла даҕаны сэргэхсийэр, симэнэр. Куораттан хаһаайыттара сынньана, сайылыы кэлэн бур-бур буруо таһааран, олохтоох ыал буола түһэллэр, сэргэстэһэ, ыксалаһа олорбут ыалларын уонна кинилэр эмдэй-сэмдэй оҕолорун үөрүүнэн көрсөр.
Ол курдук дьүөгэлии, ыкса ыаллаһа олорор Светланалаах Валентина сайын үтүөтүн, маанытын билэн иккиэн бэрткэ да тапсан сайылыыллар.
Валентина Васильевна Светланата куораттан Мэйиккэ, Куруҥ Күөлүгэр сайылыы кэлэрин кыһыны, сааһы быһа күүтэр.


Иккиэн бэйэ-бэйэлэригэр хардарыта сылдьыһан, кэккэлэһэ олорон йогалааһынтан , утарыта олорон сарсыардааҥы сылабаардаах үүттээх итии чэйтэн саҕалаан, киэһээҥи аһылыгынан ыҥырсан күннэрин түмүктүүллэр. Бу маннык истиҥ, доҕордуу көрсүһүүттэн, истиҥ сыһыантан хал буолбаттар, сылайбаттар. Хата хас биирдии күннэрэ ураты иэйиилээх буоларыттан ордук үөрэллэр, доҕордоһуулара өссө чиҥник күндүмсүйэргэ дылы буоларыттан санаалыын астыналлар.
Бу хаартыскаҕа түһүөхтэрин иннинэ оҕо саастарын санаан, мэнигилээн ылан үс мастаах бүтэй үрдүгэр тахсан олорон эмиэ хаартыскаҕа түспүттэрэ.
Дьүөгэлиилэр сорох күн сибиэһэй мүөттээх салгынынан сайа тыынан бэлэсипиэтинэн астаран сир астаан эбэтэр тэллэйдээн кэлэллэр. Оҕо сылдьан бэлэсипиэт тэбэн улааппыт кыргыттар буоллахтара, онон сатыыр буолан атах тардыстан абыраналлар эбит.


«Үтүө киһи үгүс доҕордоох» диэн өс хоһоонугар сөп түбэһэн Светланалаах Валентина үчүгэйкээн хаартыскалара куйаар ситимин нөҥүө үгүс сэҥээриини ылла. Онон оҥостон, бэлэмнэнэн итиччэ үчүгэй хаартыскаҕа түһэн, аныгылыы эттэххэ фотосессиялаан түбүгүрбүттэрэ түмүктээх буолла диэн бэйэлэрэ да астыналлар.
Маны барытын идиэйэлээн, сыта- тура толкуйдаан, иилээн-саҕалаан тэрийбит, Ийэ сылыгар анаан дьоһуннаах бэлэх-хаартыскаҕа түһэрбит киһинэн буолар Светлана Васильевна кыыһа Эльвира Афанасьевна. Онон махтал мааныта Эльвираҕа ананар.

Если вы увидели интересное событие, присылайте фото и видео на наш Whatsapp
+7 (999) 174-67-82
Если Вы заметили опечатку в тексте, просто выделите этот фрагмент и нажмите Ctrl+Enter, чтобы сообщить об этом редактору. Спасибо!
Система Orphus
Наверх