Суругунан пааматынньык: Хаҥаластан хааннаахтар. Тигиилээхтэн төрүттээхтэр…

Кулун тутар 3 күнүгэр «Арчы дьиэтэ» духуобунай кииҥҥэ Василий Гоголев-Уйулҕан «Хаҥаластан хааннаахтар. Тигиилээхтэн төрүттээхтэр. Уһун Дьуона» историческай арамаанын сүрэхтэниитэ буолан ааста.

Суруйааччыны кинигэтэ сүрэхтэнэр үөрүүлээх өрөгөй күнүнэн саха биллэр учуонайдара, литературоведтара, Күөх Ньурбаттан, Мэгэдьэк нэһилиэгиттэн, арамаан сүрүн дьоруойун Ион Семенович Егоров-Уһун Дьуона оҕолоро, сиэттэрэ, халыҥ аймахтара эҕэрдэлээтилэр.

Билэлиэгийэ билимин дуоктара, бэрэпиэссэр Варвара Окорокова, педагогика билимин дуоктара, бэрэпиэссэр Евдокия Поликарпова, билэлиэгийэ билимин хандьыдаата Саргылаана Ноева арамаан тылын-өһүн, сюжетын үрдүктүк сыаналаатылар, суруйааччы дьоруойдарын уобарастарын арыйар ньымата күүстээҕин бэлиэтээтилэр, үүнэр көлүөнэҕэ үтүө, сырдык сыһыаны иҥэриигэ, иитиигэ айымньы табыгастааҕын эттилэр. Саха литэрэтиирэтэ өссө биир, дэҥҥэ көстөр дьоһун, историческай арамаанынан байбытыттан үөрүүлэрин үллэһиннилэр!

Уйулҕан киһи быһыытынан үрдүк култууралааҕын, саха буоларынан киэҥ толкуйдааҕын, суруйааччы быһыытынан үрдүк таһымнааҕын буруолуу сылдьар арамаанынан көрдөрдө! Ньурба киэн туттар чулуу киһитин Уһун Дьуонаны олоҕун кинигэҕэ суруйан САХА ТАРБАХХА БАТТАНАР ҮТҮӨ САЛАЙААЧЧЫЛАРЫГАР БАРЫЛАРЫГАР суругунан пааматынньык туруорда!

Василий Гоголев-Уйулҕан айар үлэтигэр иэйиини, ситиһиилэри баҕарабыт, өссө да саҥа айымньылары күүтэбит!