Суон дурда, халыҥ хахха буолар туһугар үлэлиибит, хамсыыбыт

Айхал ГАБЫШЕВ салайааччылаах (Лига отцов Республики Саха (Якутия)) Саха сирин «Аҕаларын түмсүүтэ» общественнай тэриллии үлэтин биир сүрүн хайысхатынан —  соҕотох аҕаларга, со5отох ийэлэргэ, доруобуйаларынан хааччахтаах дьоҥҥо, оҕолорго юридическай  боппуруостарга  ыарырҕаппыт буоллахтарына сокуон хараҕынан быраап кэһиллиитин туоратан босхо көмөнү оҥоруу, материальнай өттүнэн да өйөбүл буолуу буолар.

Бу күннэргэ общественнай тэриллии бэрэссэдээтэлин юридическэй боппуруостарга солбуйааччы Любомир МИХАЙЛОВ, Ньурба куоратыгар  уопсайа 501 элбэх оҕолоох ыал бырааба күөмчүлэммитин көмүскээтэ. Ол курдук, Ньурба куоратыгар 2012 сылтан сир учаастага 501 элбэх оҕолоох ыалга түҥэтиллэн баран 8-9 сылы быһа үбэ тыырыллыбытын үрдүнэн, инфраструктура быһыытынан  уот да, суол да киирбэтэх. Любомир Михайлов элбэх оҕолордоох эдэр ыаллар көрдөһүүлэрин быһа гыммакка, 2019 сыл олунньутуттан сүүрэн-көтөн, үлэлэһэн, бу сэтинньи 16 күнүгэр суут бириигэбэрэ таҕыста, ол түмүгэр буруйдаахтар 3 сыллаах усулуобунай миэрэ5э тардылыннылар ону тэҥэ 5 мөл. 673 солк. сууммалаах харчыны Ньурба куорат муниципальнай дьаьалтатыгар төнүннэрэллэрин суут уураахтаата. Сиэниллибит үп төннөн, эһиилгиттэн 501 ыал уһаайбаларыгар уот тардыллан, суол оҥоһуллан элбэх о5олоох ыаллар дьиэ-уот туттан киирэллэрин ситистибит диэн үөрэбит.

Любомир Михайлов Саха республикатын «Аҕаларын түмсүүтэ» общественнай тэриллии бэрэссэдээтэлин быраабы көмүскүүр боппуруостарга солбуйааччытынан үлэлээбитэ хас да сыл буолла. Ону тэҥэ дьиэ кэргэн уустук балаһыанньаларыгар, алимент боппуруоһугар даҕаны адвокат быьыытынан буор босхо көмөлөһө сылдьар. Элбэх ыал быраабын көмүскээбитигэр махталбытын биллэрэбит. Үлэтигэр ситиһиини, дьиэ кэргэнигэр дьолу уонна кытаанах доруобуйаны баҕарабыт.

Манна даҕатан этэр буоллахха, Саха сирин улуустарынан тэриллэн үлэлии-хамсыы, тиргиллэ сылдьар эр дьон — Аҕалар түмсүүлэрэ аҕам саастаах дьоҥҥо муус ылан, мас тиэйэн көмөлөрө элбэх. Бу соторутааҕыта Тулагы Килдэм нэһилиэгэр аҕам саастаах бэтэрээн дьоҥҥо Дьокуускай куорат «Аҕаларын түмсүүтэ» муус ылан биэрдилэр. Улуус нэһилиэктэринэн үлэлиир Аҕалар түмсүүлэрэ кыаммат дьоҥҥо муҥхалааннар балыгынан күндүлүүллэр, дьиэ тутуутугар тиийэ, барытынан бары көмөлөһөллөр. Нэһилиэктэринэн, куораттарынан араас субуотунньукка кытталлар. Аҕалар түмсүүлэрин чилиэттэрэ, бэйэлэрин үлэлэринэн-хамнастарынан, чөл олоҕу, спорду өрө тутаннар эдэр ыччакка, эдэр ыалларга холобур буолаллар. 

Если вы увидели интересное событие, присылайте фото и видео на наш Whatsapp
+7 (999) 174-67-82
Если Вы заметили опечатку в тексте, просто выделите этот фрагмент и нажмите Ctrl+Enter, чтобы сообщить об этом редактору. Спасибо!
Система Orphus
Наверх