Сунтаарга уран уустар маастар кылаастары ыыттылар

 “Олоҥхо Дойдутун уран уустарын түһүлгэтэ” тэрээһин чэрчитинэн биһиги улууспутугар СӨ уус-уран оҥоһуктарын маастара, «Симэх» национальнай киин норуот уус-уран айымньытын, искусствотын сырдатыыга, тарҕатыыга отделын сүрүннүүр специалиһа Дмитрий Колодезников, СӨ норуотун маастара, уһуйааччы, мас ууһа Федор Чярин, СӨ норуотун мастара, РФ худуоһунньуктарын айар сойуустарын чилиэнэ Каролина Парфенова,  «Жемчуг» ювелирнай тэрилтэ салайааччыта Юрий Иванов уонна айылҕа кэрэтин таба көрөн үйэтитэр сэдэх дьарыктаах, талааннаах тарбахтаах иистэнньэҥ Варвара Егорова бэйэлэрин хайысхаларынан олус сэргэх маастар кылаастары ыыттылар.

Кэлбит ыалдьыттарга улуус Аҕа баһылыга Анатолий Григорьев бүгүҥҥү үөрүүлээх тэрээһиҥҥэ кыттыыны ылбыттарыгар махтанан туран инникитин Саха Сирин уустарын түмэн, уопут атастаһарга маннык тэрээһиннэр тэриллэллэрэ кэскиллээҕин бэлиэтээтэ.