Сунтаарга сылгыһыт күнүн бэлиэтээтилэр

Кулун тутар 19 күнүгэр Сунтаар тыа хаһаайыстыбатынан дьарыктанар биир улахан улуус буолан, быйылгы Сылгыһыт күнүн бэлиэтээһинэ Маар – Күөл нэһилиэгэр кииннээн тэрилиннэ.

Бу күн Сунтаар улууһун “Бочуоттаах олохтооҕо”, Сунтаар улууһун чулуу сылгыһыта, үлэ, тыыл бэтэрээнэ, ат сүүрдүүтүгэр 25 сыл устата 10 рекордсмен сүүрүк аттары, 27 оройуон призердарын бэлэмнээн таһаарбыт Петров Егор Николаевич 85 сааһыгар аналлаах «Сылгыһыт күрэҕэ» тэрилиннэ.

Тэрээһин үөрүүлээх арыллыытыгар Егор Николаевичка улуус Аҕа баһылыга Анатолий Григорьев СӨ тыатын хаһаайыстыбатын министиэристибэтин “За вклад в развитие табунного коневодства” уонна “Почетный ветеран Сунтарского улуса” бэлиэлэри туттарда.

Сылгыһыттарга хамаанданнан уонна биирдиилээн араас көрүҥнэринэн күрэхтэһии тэрилиннэ. Манна улуус араас нэһилиэктэриттэн уопсайа 12 хамаанда кэлэн кыттыыны ылла.

Күрэхтэһии симэхтээх аттары сиэтэн киллэрэн сылгыһыттар парадтарынан арыллан алта түһүмэҕинэн ыытылынна. Онно хамаанданнан ат ыҥыырын көтөҕөн сүүрүү, атынан көтүтүү уонна сыарҕалаах атынан куоталаһыы буолла. Биирдиилээн эстафетаҕа сүүрэн тиийэн аты көлүйүү, тоҥуу хаарынан ат сыарҕатын соһуу, туут хайыһарынан сүүрүү уонна сыал ытааһына киирдилэр.

Күрэх түмүгүнэн хамаанданнан эстафетаҕа 3-с миэстэ Күндэйэ нэһилиэгэ, 2-с миэстэ Маар-Күөл нэһилиэгин иккис хамаандата, 1-кы миэстэ Хадан нэһилиэгэ буоллулар.

Биирдиилээн эстафетаҕа 3-с миэстэни Бордоҥтон Иван Павлов, 2-с миэстэни Хадаҥтан Геннадий Пусталяков, 1 миэстэни Маар-Күөлтэн Александр Никифоров ыллылар.

Аты симээһин күрэҕэр 3-с миэстэ — Хадан нэһилиэгэ, 2-с миэстэ — Илимниир нэһилиэгэ, 1 миэстэ — Маар-Күөл нэhилиэгэ.

Бу кун дьон-сэргэ саамай күүппүт, кэтэспит үөрүүлээх түгэнэ дьиҥ саха аттарын сүүрдүүтэ «Сылгыһыт күрэҕэ» тэрилиннэ. Онно 400, 800 уонна 1600 миэтирэлэргэ күрэхтэстилэр.

400 миэтирэҕэ: 3-с миэстэ — Хоро нэһилиэгиттэн Герман Гуляев, 2-с миэстэ Күндэйэ нэһилиэгиттэн Прокопий Варфоломеев, 1-кы миэстэ — Сунтаар нэһилиэгиттэн Николай Павлов.

800 миэтирэҕэ: 3-с миэстэ Дьаархан нэһилиэгиттэн Станислав Архипов, 2-с миэстэ — Кириэстээх нэһилиэгиттэн Николай Могусов, 1-кы миэстэ — Күндэйэ нэһилиэгиттэн Прокопий Варфоломеев.

1600 миэтирэҕэ: 3-с миэстэ Күндэйэ нэһилиэгиттэн Прокопий Варфоломеев, 2-с миэстэ — Уһун-Күөл нэһилиэгиттэн Александр Иванов, 1 миэстэ — Сунтаар нэһилиэгиттэн Василий Федоров.
1600 миэтирэҕэ коммерческай сүүрүүгэ кыайыылааҕынан Кириэстээх нэһилиэгиттэн Николай Могусов буолла.