Сунтаардар ыһыы үлэтин күргүөмнээхтик саҕалаатылар

Бэс ыйын 3 күнүгэр, улуус Аҕа баһылыга Анатолий Григорьев уонна тыа хаһаайыстыбатын управлениетын салайааччыта Иван Тихонов буолан Куокуну, Кириэстээх уонна Тойбохой нэһилиэктэрин бааһыналарын көрдүлэр-иһиттилэр.

Куокуну нэһилиэгэр «Көнүс үрдэ» диэн 130 га-лаах бааһынаҕа былырыын кэлбит 3 саҥа тыраахтыр сири чөлүгэр түһэрии үлэтин ыытар. Өрөспүүбүлүкэ биллиилээх механизатора, Кыһыл Знамя уонна Ленин уордьанын кавалера, ЯАССР норуотун хаһаайыстыбатын үтүөлээх үлэһитэ Клавдий Михайлов билиҥҥи кэмҥэ аныгы тиэхиньикэлэринэн үлэлиир таһаарыылааҕын, үлэ тэтимин түргэтитэрин бэлиэтээтэ. Кини 1976 сыллаахха сезон устата 19 күн соҕотоҕун комбайынынан 750 га сири хорутан өрөспүүбүлүкэҕэ рекорд олохтообута. Билигин маннык тиэхиникэ биир күн иһигэр 100га-бааһынаны хорутар.


Салгыы «Бүөр-Күөл» сайылыгар сылдьыы буолла. СХПК «Крестях» бэрэссэдээтэлэ Владимир Егоров иһитиннэрбитинэн, манна сүөһү мэччирэҥ сирдэрэ киэҥ уонна элбэх буолан 2019 сылаахха сайылыктааһын гранын ылан 220 төбө ыанар ынахха сайыҥҥы ыанньык тутуллубут. 250 ньирэй турар саҥа титииктэри туппуттар. Билигин хаһаайыстыба уопсайа 124 ньирэйдээх, онно 3 ньирэй көрөөччү үлэлиир. Сайылыкка барар суолу иллэрээ сыл оҥотторбуттар, онтон быйыл сорох сирдэрин көннөрө сылдьаллар. Инникитин күрүөлээһин уонна сайылыкка олорор үлэһиттэр дьиэлэрин өрөмүөннээһин үлэтин былаанныыллар.
СХПК «Крестях» Куокунутааҕы салааларыгар олус улахан үлэлэр барбыттар, ол курдук былырыын 120 төбө киирэр саҥа механизированнай хотон тутуута саҕаламмыт, быйыл бүтэн үлэҕэ киириэхтээх.

Кириэстээх нэһилиэгэр СХПК «Крестях» Бордоҥ сайылыгар бостууктар уонна ыанньыксыттар дьиэлэригэр сылдьааһын буолла. Сайылык үлэһиттэригэр СӨ тыатын хаһаайыстыбатын министерствотын үбүлээһининэн 6х6 иэннээх саҥа 3 дьиэ тутуллубут. «Полярная Звезда» уордьан кавалера, дьоруой ыанньыксыт Владимир Михайлов сайылыкка көһүү этэҥҥэ ааспытын сырдатта. Билигин 3 ыанньыксыт үлэлиир, 112 ыанар ынах баар.
Кооператив салайааччыта Кирилл Данилов Кыайыы 75 сылыгар ыанньыксыттарга «150 ударных дней» диэн күрэх тэриллибитин иһитиннэрдэ. Күрэххэ төһө үүтү туттарбыттара, үүт хаачыстыбата, ынаҕын төрөөһүнэ уонна туруга киирэр, кыайыылаахтар балтараа ыйынан биллиэхтэрэ.

Тойбохой нэһилиэгэр СХПК «Тойбохой» тэрилтэ былырыыҥҥы 127 га, ону таһынан быйыл эбии 30 га сири нүөлсүтүүгэ үлэни ыытар. Билиҥҥи туругунан 50 га сири ыспыттар. 10 га подсолнух, 30 тахса га эбиэс уонна 10 га суданскай оту ыспыттар. Ардаҕа суох халлаан туран үлэ тэтимнээхтик саҕаламмыт, инникитин кормопроизводстваҕа икки буолаҕа элбэх сыллаах оту ыһыы уонна эбиэһи сиилэстээһиҥҥэ күүскэ үлэлэһэллэрин үлэһиттэр иһитиннэрдилэр.

Если вы увидели интересное событие, присылайте фото и видео на наш Whatsapp
+7 (999) 174-67-82
Если Вы заметили опечатку в тексте, просто выделите этот фрагмент и нажмите Ctrl+Enter, чтобы сообщить об этом редактору. Спасибо!
Система Orphus
Наверх