Сунтаар улууhугар оскуола иннинээҕи үөрэхтээһин 100 сыла

Сунтаар улууhугар оскуола иннинээҕи үөрэхтээһин 100 сылын бэлиэтии олунньу 18 күнүгэр оҕо иитиитигэр олохторун анаабыт, аҕа саастаах дьоннорбутун чиэстиир үөрүүлээх түһүлгэ тэрилиннэ.

Үөрүүлээх тэрээһиҥҥэ Сунтаар улууһун Аҕа баһылыга Анатолий Григорьев оскуола иннинээҕи үөрэхтээһин тэрилтэлэрин бары үлэһиттэрин уонна бэтэрээннэрин үрдүк трибунаттан эҕэрдэлээн туран, уһуйааннары салайыыга өйдөрүн-санааларын ууран, өр сыллаах сыралаах үлэлэрин, улуус оскуола иннинээҕи үөрэхтээһинин сайдыытыгар сүҥкэн кылааттарын иһин “Сунтаар улууһа (оройуона)” Муниципальнай оройуон Бочуотунай Грамоталарынан уонна түөскэ кэтэр үрүҥ көмүс бэлиэлэрин Сунтаардааҕы 5с нүөмэрдээх “Ньургуһун” оҕо сайдар киинин салайбыт педагогическай үлэ ветераныгар Светлана Руфоваҕа, Устье нэһилиэгин “Светлячок” оҕо сайдар киинин салайбыт педагогическай үлэ ветераныгар Раифа Бакулинаҕа уонна Сиэйэ нэһилиэгин “Сарыал” уһуйаанын салайбыт педагогическай үлэ ветерангар Зоя Семеноваҕа туттарда. 

Тэрээһиннэр чэрчилэринэн үбүлүөйдээх көһө сылдьар Кубок эстафетатын улуус үөрэҕириитин саламтатын салайааччыта Альберт Иванов, улуус үөрэҕириитин саламтатын уопсай үѳрэхтээhин салаатын кылаабынай испэсэлииһэ Нина Павлова Түбэй-Дьаархан нэһилиэгин баhылыгар Сергей Ивановка уонна “Сэргэ” уhуйаан салайааччытыгар Агния Михайловаҕа туттардылар.